နိုင်ငံရေးသမား ရောင်းရန်ရှိသည် အပိုင်း ၂

နိုင်ငံရေး သမားတွေ ငွေကြေးနဲ့ အခွင့်အရေးယူကြတာကို ဝေဖန်ကြတဲ့ အထဲမှာ ကျယ်ကျယ် လောင်လောင် အဝေဖန်ခံရပြီး တုန့်ပြန် ငြင်းခုန်မှုလည်း တော်တော်များတဲ့ ဖြစ်ရပ်တခုကတော့ မကဒတ ခေါ် ABSDF ခေါ် ကျောင်းသားတပ်မတော်ရဲ့ ကားအစီး ၆၀ ကိစ္စဖြစ်ပါတယ်။

တကယ်တော့ အစိုးရက ကားပေးသတ်တာကို ပျော်ပျော်ကြီး ခံသွားကြသူတွေဟာ လက်နက်ကိုင် တော်လှန်ရေး အဖွဲ့အစည်း အားလုံးနီးနီး ဖြစ်ပါတယ်။ အပစ်မရပ်နိုင်သေးတဲ့ ကချင်၊ တအာင်း၊ လားဟူ အဖွဲ့တွေလောက်ပဲ ကျန်ပါတယ်။

ကားယူသူတို့ရဲ့ ကျင့်ဝတ်သိက္ခာ

အားမနာတမ်း ဝေဖန်ရရင် အဲဒီအဖွဲ့တွေဟာ မော်တော်ကားနဲ့ နိုင်ငံရေး ဂုဏ်သိက္ခာလဲလှယ် လိုက်ကြတာ ပါပဲ။

ဒီလို အဖွဲ့အစည်းအားလုံး အနက်မှာ မကဒတ ကျောင်းသားတပ်မတော်ကို တော်တော်လေး ပိုပြီး ဝေဖန်ကြ တာကိုတွေ့ရတယ်။ ဘာ့ကြောင့် သူတို့ကို ပိုပြီး ဝေဖန်ကြသလဲ။

ဖြစ်နိုင်တာကတော့ မကဒတ အပေါ်လူတွေက ပိုပြီး မျှော်လင့်ချက်ထားကြလို့ ဖြစ်မယ်ထင်ပါတယ်။ မကဒတကိုတော့ ဒီလိုမျိုးကားနဲ့ လာဘ်ထိုးလို့ ရမှာမဟုတ်ဘူးလို့ လူတွေက ထင်ထားကြလို့ ဖြစ်မယ် ထင်ပါတယ်။ ဖိနှိပ်တဲ့ အစိုးရတရပ်ကို လက်နက်နဲ့ အံတုပုန်ကန်တဲ့ ကျောင်းသားတပ်မတော်ဆိုတာ ကမ္ဘာ့ သမိုင်းမှာတောင် ရှာမှရှားမဟုတ်လား။ မကဒတဟာ ပြည်သူ့ရန်သူကို ပြတ်ပြတ်သားသား လက်နက်ကိုင် ဆန့်ကျင်တိုက်ခိုက်ရဲတယ်၊ တိုင်းပြည်အတွက် သက်စွန့်ဆံဖျား ဆောင်ရွက်ဝံ့တယ်ဆိုတဲ့ သမိုင်း အစဉ်အလာရှိခဲ့တယ်။ အသက်စွန့်သွားတဲ့ ရဲဘော်တွေလည်း ရှိခဲ့တယ်။ ဒါ့ကြောင့်လည်း လေးစား အထင်ကြီး ကြတာ မျှော်လင့်ချက်ထားကြတာ သဘာဝကျပါတယ်။ ဒါပေမဲ့ ဒီလိုမျှော်လင့်မိလို့လည်း ပိုပြီး စိတ်ပျက်ကြပုံရပါတယ်။

မကဒတဘက်ကလည်း ဒီကားပါမစ် ကိစ္စနဲ့ ပတ်သက်ပြီး တော်တော်လေးခုခံပြောကြတာကို တွေ့ရပါတယ်။ အဓိက ပြောတဲ့ ဖြေရှင်းချက်တွေကတော့ ဒီငွေတွေကို ပွင့်လင်းမြင်သာမှုရှိရှိသုံးမှာပါ ဆိုတဲ့ အကြောင်း၊ တော်လှန်ရေး အကျိုးစီးပွား အတွက် သုံးမှာ ဖြစ်ကြောင်း ၊ အဖွဲ့အစည်းအတွက် သုံးမှာ ဖြစ်ကြောင်း ဆိုတာတွေ ဖြစ်ပါတယ်။ ဒါ့အပြင် မကဒတ ရဲ့ ရဲဘော်တွေ ဘယ်လောက် အနစ်နာခံကြရ ကြောင်း၊ ဘယ်လောက် အဆင်းရဲ အပင်ပန်းခံခဲ့ရကြောင်းဆို တာတွေလည်း ပါပါတယ်။

မကဒတ ရဲဘော်တွေ ပင်ပန်းဆင်းရဲကြတယ်ဆိုတာ မှန်ပါတယ်။ ဒါပေမဲ့ နိုင်ငံရေးလုပ်ပြီး ပင်ပန်း ဆင်းရဲတာ ခင်ဗျားတို့ချည်းပဲတော့ မဟုတ်ဘူး။ ပြည်တွင်းမှာလည်း ဆင်းရဲဒုက္ခခံကြရသူတွေ၊ ဘဝတွေ အသက်တွေ ပေးခဲ့ကြရသူတွေ အများကြီးပါ။ တော်လှန်ရေးအတွက် ၊ အဖွဲ့အစည်းအတွက် ပွင့်လင်းမြင်သာမှု ရှိရှိ သုံးစွဲ မယ်ဆိုတာလည်း ဖြစ်နိုင်လောက်တယ်လို့ ယုံကြည်ပါတယ်။ ဒါပေမဲ့ ပြဿနာက ဒီငွေက ဘယ်ကငွေလဲ။ ဘယ်သူ့ငွေလဲ။ ပေးတဲ့သူတွေကရော အဲဒီငွေကို တကယ်ပိုင်တဲ့ လူတွေဟုတ်ရဲ့လား။ ပေးပုံပေးနည်းကရော ရိုးသားရဲ့လား ဆိုတဲ့အချက်တွေကို ထည့်မစဉ်းစားလို့ မဖြစ်ဘူး။

ဒီငွေတွေ ၊ ဒီကားပါမစ်တွေဟာ ဘယ်သူပိုင်တဲ့ ပစ္စည်းတွေလဲ။ ကားပါမစ်ဆိုတာ၊ ကားတင်သွင်းခွင့်လိုင်စင်ဆိုတာ တကယ်တော့ အခွင့်အရေးပဲ။ အထူးအခွင့်အရေးပဲ။ အထူးအခွင့်အရေးမို့ အထူးငွေကြေးအမြတ်အစွန်းတွေ ရတယ်ဆိုတာ အားလုံးသိပြီးသားပါ။ ကားပွဲစား တောင်သိပါတယ်။ အဲသလို အထူးအခွင့်အရေးမျိုးတွေကို စစ်အစိုးရ သက်တမ်းတလျှောက်လုံးမှာ မတရား ရယူပြီး ကြီးပွားချမ်းသာလာသူတွေကတော့ စစ်အစိုးရဆွေမျိုး တသိုက်နဲ့ စစ်အစိုးရနဲ့ နီးစပ်သူ ခရိုနီတွေပါ။ ဒါတွေကို သူတို့ ရနေ၊ ယူနေတာဟာ မတရားယူနေတာပဲဆိုတာကို လည်း လူတိုင်းသိတယ်။ လူတိုင်းလည်း ခံပြင်းကြ ၊ ခံစားကြရတယ်။ အဲဒီလို မတရားလုပ်လို့ လူတွေက ခရိုနီဆိုရင်၊ စစ်အစိုးရဆိုရင် ရိုးတွင်းချဉ်ဆီ ထဲကနေ ခါးခါးသီးသီး မုန်းတီးတယ်။ မကဒတ ကျောင်းသားဟောင်းရဲဘော်တွေ လည်း ဒါတွေကို မုန်းလို့ ဆန့်ကျင်တိုက်ပွဲဝင်နေတာပဲ မဟုတ်လား။ ခုတော့ မကဒတက အဲဒီအခွင့်အရေးကို ယူလိုက်ပြီဆိုတော့ ဒါကို ဘယ်လိုနားလည်ရမလဲ။ အော်…. ဒီစနစ်ကို မုန်းလို့ တိုက်နေတာမှ မဟုတ်ပဲ ၊ သူတို့မရဘဲ သူများရနေလို့ တိုက်နေတာကိုးလို့ နားလည်ရမလို ဖြစ်နေပါတယ်။ သူတို့လည်း ရရင်ယူတာပါပဲလားလို့ နားလည်ရမလို ဖြစ်နေပါတယ်။

မကဒတခေါင်းဆောင်တွေ ဘယ်လိုတွေးခေါ်ပြီး ဒီအခွင့်အရေးမျိုးကို ယူခဲ့သလဲ ဆိုတာ ကျနော်တွေးကြည့် မိတယ်။ “ရန်သူ့ဆီကငွေကိုရရင် တပြားရရ၊ နှစ်ပြားရရ ရသမျှ အမြတ်ပဲ” လို့ သဘောထားတာ ဖြစ်ချင် ဖြစ်ပါ လိမ့်မယ်။ “ငါတို့မယူလည်း ဒီငွေတွေ ဒီဘောင်းဘီချွတ်လူကြီးတွေ လက်ထဲရောက်မှာပဲ ၊ ငါတို့ယူပြီး ပြည်သူတွေ အတွက် အသုံးပြုလိုက်တာကမှ ကောင်းဦးမယ်” လို့တွေးပြီး ယူလိုက်တာလည်း ဖြစ်ချင် ဖြစ်မယ်။ ဒီလိုတွေးခေါ်ရင်တော့ ဒီအတွေးအခေါ်ဟာ ပိုက်ဆံလိုချင်လို့ ပေးတဲ့ ဆင်ခြေလို့ပဲ ပြောရလိမ့်မယ်။ ဒီလိုပြောကြေးဆိုရင် ခရိုနီတွေကလည်း ဒီလိုပြောလို့ ရတာပဲ။ “ငါတို့ ခရိုနီတွေ မယူရင် စစ် အာဏာရှင်တွေက ယူမှာပဲ။ စစ်အာဏာရှင်တွေလက်ထဲရောက်ရင် လက်နက်ဝယ်ပြီး ပြည်သူတွေကို နှိပ်စက် လိမ့်မယ်။ ဒီတော့ ငါတို့ ခရိုနီတွေယူပြီး ဇိမ်ခံလိုက်တာကမှ ပြည်သူတွေ သက်သာဦးမယ်” လို့ ခရိုနီတွေက ဆင်ခြေပေးမယ်ဆိုရင် ဘယ်လို သဘောထားမလဲ။ ခရိုနီနဲ့ ဒီတော်လှန်ရေးသ မားတွေရဲ့ လုပ်ရပ်ဟာ ဘာများကွာခြားဦးမှာလဲ။ သေချာတာတခုကတော့ ခရိုနီတွေရော၊ မကဒတရော၊ အခုတိုင်းရင်း သားခေါင်းဆောင်တွေရောဟာ ပြည်သူ့ငွေကို ပြည်သူ့ သဘောတူညီချက် မပါဘဲ အလွဲသုံးစားလုပ်လိုက်ကြပြီဆိုတဲ့ အချက်ပဲ။ ဆင်းရဲသားကလေးငယ်တွေရဲ့ ထမင်းလုပ်ကို ခင်ဗျားတို့ လုယက်စားလိုက်တာနဲ့ ဘာမှ မထူးဘူး။

ဒါက ယူသူတွေဘက်က အပိုင်း။ ပေးတဲ့လူတွေအပိုင်းကိုလည်း ကြည့်ဦး။

ကားပေးသူတို့ ရဲ့ အလွဲသုံးစားလုပ်ရပ်

အစိုးရအဖွဲ့အနေနဲ့ အဲဒီငွေကို အဲသလိုပေးခွင့်ရှိရဲ့လား။ ဝန်ကြီးဌာနအနေနဲ့ရော အဲသလို ပေးခွင့်ရှိရဲ့လား။ ဘယ်အခွင့်ဘယ်အာဏာနဲ့ ပေးလိုက်တာလဲ။ ဘယ်သူပိုင်တဲ့ဟာမို့ အဲသလို ပေးလိုက်တာပါလဲ။

တကယ်တော့ ဒီလို အခွင့်အရေး ဒီလို ကားပါမစ်ဆိုတာဟာ အများပြည်သူပိုင်တဲ့ အရာ ဖြစ်တယ်။ ပြည်သူတိုင်းကို လွတ်လွတ်လပ်လပ် ယှဉ်ပြိုင်လျှောက်ထားခွင့်ပေးပြီးမှ တရားမျှတမှုရှိရှိနဲ့ ပေးသင့်သူကို ထိုက်သင့်တဲ့ အခွန်ထမ်းဆောင်ခိုင်းပြီး ပေးရမှာ ဖြစ်တယ်။ ခုတော့ မဟုတ်ပါဘူး။ ဦးသိန်းစိန်တို့ ဦးအောင်မင်းတို့က သူတို့ပိုင်ပစ္စည်းကျနေတာပဲ။ “မန်းငြိမ်းမောင်တို့ ယူလိုက်ကြကွာ၊ မောင်သံခဲတို့ ယူလိုက်ကြကွာ” ဆိုပြီး သူပိုင်ငွေကို အလှူကြီးပေးသလိုမျိုး ပေးချလိုက်တယ်။ ဒါကို ယူတဲ့လူတွေက လည်း ပြည်သူ့ငွေတွေဆိုတာကို မသိချင်ယောင်ဆောင်ပြီး ယူကြတယ်။ အလှူ့ရှင်ကြီးတွေကိုပဲ ကျေးဇူးရှင်ကြီးတွေဆိုပြီး ကျေးဇူးတွေ တင်လိုက်ကြတယ်။

သမ္မတ ဦးသိန်းစိန်နဲ့ ဝန်ကြီးဦးအောင်မင်းတို့အစိုးရဟာ ပေးခွင့်မရှိတာကို အဲသလို အလွဲသုံးစားလုပ်ပြီး ပေးခဲ့ရုံသာမက လွှတ်တော်က ခွင့်ပြုထားတဲ့ ဘတ်ဂျက်ထက် ပိုမိုပြီး ဥပဒေမဲ့ သုံးစွဲလိုက်တာလည်း ဖြစ်ပါတယ်။ လွှတ်တော်ကနေ အစိုးရအနေနဲ့ ပြည်သူ့ငွေကို ဒီလောက်ပဲ သုံးရမယ် ဒီလောက်ပဲ သုံးသင့်တယ်ဆိုပြီး ခွင့်ပြုသတ်မှတ်ထားတဲ့ ဘတ်ဂျက်ခွင့်ပြုချက်ကို ကျော်လွန်ပြီး သုံးစွဲလိုက်တာ ဖြစ်ပါတယ်။ အခုဟာက ငွေမဟုတ်ပါဘူး ပါမစ်ပါလို့ ဆင်ခြေပေးရင်တော့ ကလေးကတောင် ရယ်ပါလိမ့်မယ်။

ဒီအချက်ကို မကဒတနဲ့ တိုင်းရင်းသားခေါင်းဆောင်တွေကပါ မသိချင်ယောင်ဆောင်နေကြပေမဲ့ ဦးရွှေမန်းတို့ လွှတ်တော်က လူတွေက ကောင်းကောင်းကြီး သိကြ၊ သတိထားမိကြပါတယ်။ ဒါ့ကြောင့်လည်း ဦးရွှေမန်းက ဦးသိန်းစိန်ကို သတိပေးခဲ့တယ်။ အတွင်းကြိတ် အားပြိုင်မှုတွေ ငြင်းခုန်မှုတွေ ဖြစ်ခဲ့တယ်။ ဒါ့ကြောင့်လည်း ဦးအောင်မင်းကိုယ်တိုင် ထွက်ရှင်းလာရတာဖြစ်ပါတယ်။ “သူတို့ပေးတာဟာ ကားပါမစ် ပေးတာ မဟုတ်ပါဘူး။ တရားမဝင်တဲ့ကားတွေကို တရားဝင်အောင် လိုင်စင်လုပ်ပေးလိုက်တာပါ” တဲ့။

ဦးအောင်မင်းဟာ ခုခေတ်ဘောင်းဘီချွတ်ဝန်ကြီးတွေထဲမှာ စကားကို မှောက်ချည်လှန်ချည် အပြောတတ်ဆုံးသူလို့ ဆိုရတော့မယ်။ အနီးဆုံး အထောက်အထားက အခုပြောတဲ့စကားပါပဲ။ အခုပြော တဲ့စကားကို နားထောင်ကြည့်ရင် သူပြောတဲ့စကားဟာ ဘယ်လောက် မရိုးသားသလဲ ဆိုတာ ထင်ရှားလှပါတယ်။ ကားပါမစ်ကို စာရွက်ကြီးနဲ့ ထုတ်ပေးပါရက်နဲ့ “ကားပါမစ်လို့ သဘောမထား ပါနဲ့ တရားမဝင်တဲ့ကားတွေကို တရားဝင်အောင် လုပ်ပေးတာပါ” ဆိုပြီး ပြောရဲတာဟာ သူ့သတ္တိပါပဲ။ မျက်နှာပြောင်ရဲတဲ့ သတ္တိပါ။ မကဒတမှာ လိုင်စင်တပ်မထားတဲ့ တရားမဝင်ကားအစီး ၆၀ ရှိတယ်လို့  ဘယ်သူကြားဖူးကြသလဲ။ ဦးအောင်မင်းရော ဘယ်က ကြားဖူးထားသလဲ။ အားလုံးဟာ သူတို့ပါမစ် ထုတ်ပေးတော့မှ ပါမစ်ကို ရောင်းစားကြတာသာဖြစ်တယ်။ ဘယ်အဖွဲ့မှာမှ တရားမဝင်ကား ၆၀ တွေ ၁၂၀ တွေမရှိဘူး၊ အခုလည်း ပါမစ်ထဲကပေးလိုက်တဲ့ ကားတွေကို ဘယ်သူမှ ဝယ်မစီးဘူးဆိုတာ ဦးအောင်မင်းလည်း အသိ၊ လက်နက်ကိုင်အဖွဲ့အစည်းတွေလည်း အသိ၊ ပြည်သူတွေလည်း အသိ၊ ကလေးကအစ အားလုံးသိကြပါရက်နဲ့ ဦးအောင်မင်းဘာလို့ ဒီလိုထွက်လိမ်တာ ပါလဲ။

ဦးသိန်းစိန်လုပ်တဲ့လုပ်ရပ်ဟာ ဥပဒေဘောင်ကိုကျော်လွန်ပြီးလုပ်ထားတာဆိုတာ ဦးအောင်မင်းသိနေ လို့ပါ။ ဦးသိန်းစိန် အဲသလိုလုပ်တာ ဥပဒေဖောက်ဖျက်တဲ့ လုပ်ရပ်ဖြစ်ကြောင်း ဦးရွှေမန်းနဲ့ အငြင်းပွား ထားတာကို ဦးအောင်မင်း သိထားလို့ပါ။ ဒါပေမဲ့ အတိုင်အဖောက်က မညီချင်တော့ ကားပါမစ်ကို ဦး သိန်းစိန်ကိုယ်တိုင် ယာတောစံအိမ်ထဲမှာ စာအိတ်နဲ့ခေါ်ပေးခဲ့ကြောင်းကို မန်းငြိမ်းမောင်က ဖွင့်ချပြောဆိုပြီး ဖြစ်နေပါတယ်။

လာဘ်ပေး လာဘ်ယူ လုပ်ရပ်

ဒီလို ဥပဒေမဲ့ ပေးတဲ့ငွေကို မကဒတနဲ့ တိုင်းရင်းသားခေါင်းဆောင်တွေ လက်ခံသင့်ရဲ့လား။ ပြည်သူ့ငွေကို ပြည်သူမသိဘဲပေးတာကို လက်ခံသင့်ရဲ့လား။ ပြည်သူ့ငွေကို ဥပဒေမဲ့ ထုတ်ပေးတာကို လက်ခံသင့်ရဲ့လား။ ပြည်သူ့ငွေကို ဒီလို အလွဲသုံးစားရယူတာဟာ ကျင့်ဝတ်သိက္ခာနဲ့ ညီတယ်လို့ ဆိုနိုင်ပါရဲ့လား။

ဒါ့အပြင် မကဒတရော၊ တိုင်းရင်းသားအဖွဲ့အစည်းတွေရောဟာ အစိုးရနဲ့ ယာယီ အပစ်အခတ် ရပ်စဲထား တဲ့ အဆင့်သာရှိပါသေးတယ်။ နိုင်ငံရေးဆွေးနွေးမှုကို တခွန်းမှ မဟရသေးပါဘူး။ ဒီတော့ ဒီကာလတွေကို ဆွေးနွေးဆဲကာလလို့ ဆိုရပါမယ်။ ဒီလိုဆွေးနွေးဆဲကာလမှာ ဆွေးနွေးဘက်အစိုးရက ငွေပေးတာဟာ လာဘ်ပေးတဲ့သဘော သက်ဝင်ပါတယ်။ အဲဒီငွေကိုယူတာဟာလည်း လာဘ်ယူတဲ့ သဘောသာ ဖြစ်ပါတယ်။

မကဒတဟာ မြန်မာပြည်သူတွေကို ကိုယ်စားပြုတယ်လို့ ကိုယ့်ကိုယ်ကိုယ် ခံယူထားမယ် ထင်ပါတယ်။ တခြား တိုင်းရင်းသားတွေကလည်း ကိုယ့်တိုင်းရင်းသားပြည်သူတွေကို ကိုယ်စားပြုတယ်လို့ ခံယူမယ် ထင်ပါတယ်။ ဒီတော့ အခုအစိုးရနဲ့ ဆွေးနွေးပွဲတွေဟာ ပြည်သူကို ကိုယ်စားပြုပြီး ပြည်သူ့ ခေါင်းဆောင် တွေအနေနဲ့ ဆွေးနွေးကြတဲ့ ဆွေးနွေးပွဲဖြစ်ပါတယ်။ ပြည်သူ့အကျိုးအတွက် စစ်တပိုင်းအစိုးရနဲ့ ဆွေး နွေး ကြတဲ့သူတွေဟာ အစိုးရက လာဘ်ထိုးတဲ့ ကားတွေကို ယူထားလိုက်ပြီဆိုရင် ဒီခေါင်းဆောင်တွေကို ပြည်သူတွေက ဘယ်လိုယုံကြည်ကြရတော့မလဲ။ သူပေးတဲ့ ငွေကိုယူ၊ သူကျွေးတဲ့အစာကို စားပြီးတဲ့ နောက်မှာ သူတို့ရဲ့ ဆွေးနွေးပွဲဟာ ဘယ်လောက် လွတ်လပ် (independent ဖြစ်) နိုင်မလဲ။ မကဒတခေါင်းဆောင်တွေနဲ့ တိုင်းရင်းသားခေါင်းဆောင်တွေ ကားလက်ဆောင်ကိုယူလိုက်တာဟာ ပြည်သူကို သစ္စာဖောက်တာဖြစ်တယ်။ သူတို့ကို အစိုးရက ကားပါမစ်ပေးတာဟာ တော်လှန်ရေး အဖွဲ့စည်း တွေရဲ့ ခေါင်းကို ငွေပေးဝယ်လိုက်တာဖြစ်တယ်။

ပြည်သူ့ငွေကို အသုံးပြုပြီး လာဘ်ပေးတဲ့အစိုးရရော၊ ပြည်သူ့ငွေကို အသုံးပြုပြီးပေးတဲ့လာဘ်ကို ယူတဲ့ တော်လှန်ရေးအဖွဲ့အစည်းတွေရောဟာ ပြည်သူအပေါ် သစ္စာမဲ့သူတွေဖြစ်ပါတယ်။

ဒါပေမဲ့ မန်းငြိမ်းမောင်ကတော့ ပြည်သူ့ငွေကို ကားအစီး ၁၂၀ ဖိုးရလိုက်တာကိုတောင် မတင်းတိမ်နိုင်သေး ဘူး။ “ကေအန်ယူရဲ့ အဖွဲ့အစည်းလိုအပ်ချက်ဟာ ကားအစီး ၁၂၀ နဲ့ မလုံလောက်သေးပါဘူး” လို့တောင် သတင်းစာရှင်း လင်းပွဲ လုပ်ပြီး ပြောလိုက်ပါသေးတယ်။ မန်းငြိမ်းမောင်နှယ် လောဘကြီးလိုက်တာ။ ပြောရဲပါပေ့၊ ပြောရက်ပါပေ့၊ ပြောထွက်ပါပေ့ မန်းငြိမ်းမောင်။ ခင်ဗျားတို့ရတဲ့ငွေက အစိုးရငွေ မဟုတ်ဘူးဗျ။ ဆင်းရဲသား တိုင်းရင်းသားပြည်သူတွေရဲ့ငွေပါ။ သာမန်ကရင်လူမျိုး ဆင်းရဲသား တွေရဲ့ မျက်နှာကို မငဲ့မကွက် ပြောထွက်လှပါပေတယ်။

ဦးအောင်မင်း၊ ဦးစိုးသိန်းတို့အဖွဲ့ဟာ နော်ဝေးက ထောက်ပံ့တဲ့ ဒေါ်လာ ၆ သန်းငြိမ်းချမ်းရေး ရန်ပုံငွေကို လည်း သူတို့ပိုင်ငွေတွေလို သုံးခဲ့ဖြုံးခဲ့ကြပြီ။ NLD ရွေးကောက်ပွဲ မဝင်ခင်ကာလတုန်းက NCGUB အဝေးရောက် ညွန့်ပေါင်းအစိုးရကို ရွေးကောက်ပွဲဝင်မယ်ဆိုရင် ကားပေးမယ်၊ ငွေပေး မယ်၊ အိမ်တွေ မြေတွေပေးမယ်ဆိုပြီး လာဘ်ထိုးခဲ့ဖူးကြောင်းလည်း ဦးပီတာလင်းပင်က ဖွင့်ချခဲ့ဖူးပြီ။ ဦးအောင်မင်းဟာ ထောက်လှမ်းရေးဟောင်းပီ သသူ ဖြစ်ပါတယ်။

မကဒတရဲ့ ပျော့ညံ့မှု

ဒါ့အပြင် ဦးအောင်မင်းနဲ့ ကိုသံခဲ လက်မောင်းချင်းချိတ် ဝိုင်အရက်ခွက်ကိုကိုင်ပြီး အရေးကြီးပြီ ညီနောင်အပေါင်းတို့ သီချင်းကို ဆိုသွားတာဟာလည်း မကဒတရဲဘော်ဟောင်းတွေ၊ မကဒတကို သံယောဇဉ်ရှိသူတွေကြားမှာ စိတ်ထိခိုက်စရာ ဖြစ်ခဲ့ရပါတယ်။ ဦးအောင်မင်းလိုလူနဲ့ ဒီလိုပျော်ပါးပြရင် ကိုယ့်သိက္ခာ ၊ ကိုယ့်ရဲဘော်တွေရဲ့ သိက္ခာကို ထိခိုက်နိုင်မယ် ဆိုတာလောက်ကိုတော့ အနည်းဆုံး တွက်မိဖို့ သင့်တယ်။

မကဒတကို ခုလို ငွေပေးဖျက်ဆီးခံလိုက်ရတာ နှမျောစရာလည်းကောင်းတယ်။ ဒီလောက် ရိုးစင်းတဲ့ ဖျက်ဆီးပုံဖျက်ဆီးနည်းလေးလောက်တောင်မှ တောင့်မခံနိုင်တာ အထင်သေးစရာလည်း ဖြစ်တယ်။ ဦးအောင်မင်းတို့ လုပ်ပုံက သိပ်ရိုးလွန်းပါတယ်။ ရုပ်ချောပြီး ဆင်းရဲတဲ့ မိန်းကလေးကို ထဘီလေး ဝယ်ပေး၊ အင်္ကျီလေးဝယ်ပေးပြီး ကျုံးသွင်းဖျက်ဆီးသွားတဲ့ လူပွေလူရှုပ်လုပ်နည်းမျိုးပဲ။ ဒါပေမဲ့ ဆင်းရဲတဲ့ မိန်းကလေးတိုင်း မပျက်စီးဘူး။ ဆင်းရဲပြီး ပျော့ညံ့မှ ပျက်စီးတယ်။ မကဒတ အဖျက်ဆီး ခံရတာကလည်း ဆင်းရဲလို့ ပင်ပန်းလို့ မဟုတ်ဘူး။ ခေါင်းဆောင်တွေ ပျော့ညံ့လို့ပဲ။

ဘယ်သူပေးပေး ရရင်ယူ

မကဒတ အဖွဲ့ဟာ တောထဲမှာ မျှစ်စားပြီး တော်လှန်ရေးလုပ်ခဲ့မိတာ မှားသကွာ၊ ခုလို မြို့ပေါ်တက်ပြီး ဘီယာဆိုင်မှာ တော်လှန်ရေးမုန်တိုင်းထန်ရတာ ပိုတွက်ခြေကိုက်တယ်လို့များ ဥာဏ်အလင်းရသွား လေသလား မဆိုတတ်ဘူး။ အစိုးရပေးတဲ့ငွေကိုသာမက ခရိုနီ ဦးဇော်ဇော်ပေးတဲ့ ငွေကိုပါ အခုလက်ခံ ရယူ လိုက်ပြီ ဆိုတာသိရတယ်။ လက်ခံရယူသူကတော့ မကဒတ ဗဟိုကော်မတီဝင်တယောက်ပါ။ဒါပေမဲ့ သူ့အတွက် မဟုတ်ဘဲ အဖွဲ့အစည်းအတွက် ဗဟိုကော်မတီ ဆုံးဖြတ်ချက်နဲ့ လက်ခံရယူတယ်လို့ ဆိုပါတယ်။ မကဒတအနေနဲ့ အထူးသတိထားပြီး ပြန်လည်သုံးသပ်သင့်ပါတယ်။ ပေးသမျှငွေယူနေရင် အဖွဲ့အစည်း ရဲ့ နိုင်ငံရေးသိက္ခာဟာ ကုန်းကောက်စရာ မရှိအောင်ဖြစ်သွားလိမ့်မယ်။ နိုင်ငံရေးသိက္ခာမရှိတော့ရင် အဖွဲ့အစည်းပါ ပျက်စီးသွားနိုင်ပါတယ်။ လက်တွေ့မှာ ငွေမရှိရင် ဘာမှ လုပ်မရဘူးဆိုတဲ့ စကားမျိုးကိုလည်း သူတို့ ထိပ်ပိုင်း ကတော်တယောက်က ပြောပါသေးတယ်။ ဒီစကားကတော့ အပေါစားဆန်လွန်းလှပါတယ်။ ဆွေးတောင် မဆွေးနွေးချင်လောက်အောင်ပါပဲ။

ဒီလောက်နာမည်ဆိုးနဲ့ ကျော်ကြားပြီး တိုင်းပြည်နဲ့ လူမျိုးအပေါ် နည်းမျိုးစုံနဲ့ ဆိုးခဲ့ညစ်ခဲ့တဲ့ ခရိုနီတွေရဲ့ငွေကို အခုလို ယူရဲတယ်ဆိုတာကလည်း ရှေ့သွားရှိလို့ လိုက်ရဲတာ ထင်ပါတယ်။ တကယ်တော့ ခရိုနီတွေရဲ့ ငွေကို အများဆုံးယူတဲ့ အဖွဲ့အစည်းဟာ ဒေါ်အောင်ဆန်းစုကြည် ဦးဆောင်တဲ့ အမျိုးသားဒီမိုကရေစီ အဖွဲ့ချုပ် ဖြစ်ပါတယ်။ ဆယ်သိန်း၊ သိန်း ၂၀ တန်တဲ့ ဝတ်စုံတွေကို ခရိုနီတွေက ဝယ်ပေးတယ်ဆိုတာက အစ လေယာဉ်စီးလုံးငှားတယ်ဆိုတာ အဆုံး ခရိုနီနဲ့ ဒီချုပ်သတင်းတွေဟာ လူပြောများ ကျော်ကြားလှပါတယ်။

တကယ်တော့ ခရိုနီတွေဟာ ပြည်သူ့သယံဇာတ၊ ပြည်သူ့ဘဏ္ဍာ၊ ပြည်သူ့အခွင့်အရေးတွေကို နှစ်ပေါင်း များ စွာ အလွဲသုံးစားလုပ်လာသူတွေ ဖြစ်ပါတယ်။ မြေကြီးပေါ်မှာပေါက်နေတဲ့ သစ်ပင်တွေကို သူတို့အပင်လို့ သဘောထားပြီး ရောင်းစားပါတယ်။ မြေကြီးအောက်က ရတနာကို သူတို့ ရတနာလို့ သဘောထားပြီး ရောင်းစားပါတယ်။ ရေထဲမှာရှိနေတဲ့ငါးကိုလည်း သူတို့ငါးလို့ သဘောထားပြီး ရောင်းစားပါတယ်။ ပြည်ပက နေတင်သွင်းခွင့် ပြည်တွင်းကနေ တင်ပို့ခွင့်မှန်သမျှကိုလည်း သူတို့ အခွင့်အရေးလို့ သဘောထားပြီး သူတို့ချည်း မတရားယူပါတယ်။ ဒီလောက်နဲ့ အားမရ မတင်းတိမ် နိုင်သေးဘဲ ပြည်သူ့လယ်ယာမြေတွေ သိမ်းထားတာတွေက လည်း ဒုနဲ့ဒေးပါ။ ဒီလို နှစ်ပေါင်းများစွာ မတရားလုပ်လာတဲ့ ခရိုနီတွေဟာ သားစဉ် မြေးဆက်စားမကုန်အောင် ပွနေကြပါပြီ။ မြန်မာတွင်မက ကမ္ဘာမှာပါယှဉ်နိုင်လောက်တဲ့ ဒေါ်လာဘီလျံချီ ချမ်းသာသူတွေ ဖြစ်နေပါပြီ။ သူတို့စိုးရိမ်စရာဆိုလို့ ဒီမိုကရေစီအစိုးရတက်လာရင် သူတို့ မတရားရယူ ထားတာတွေ ပြန်ပေးရမှာကိုပဲ စိုးရိမ်စရာရှိပါတယ်။ ဒီတော့ သူတို့ငွေမည်းကို ငွေဖြူဖြစ်အောင် လျှော်ချင်ပါတယ်။ သူတို့ နာမည်မည်းကို နာမည်ဖြူဖြစ်အောင် လျှော်ဖွတ်ချင်ပါတယ်။ သူတို့သမိုင်းမည်း ကို သမိုင်းဖြူဖြစ်အောင် လျှော်ချင်ဖွတ်ချင်ပါတယ်။ ဒီလို အချိန်မျိုးမှာ သူတို့ဟာ ငွေရှိမှ နိုင်ငံရေးလုပ်လို့ ရမယ်လို့ ထင်နေတဲ့သူတွေဆီကို ငွေပေးဖို့ ချဉ်းကပ် လာတာ မဆန်းပါဘူး။

ဒေါ်အောင်ဆန်းစုကြည်ကလည်း ခရိုနီတွေရဲ့ငွေကို ကြည်ကြည်ဖြူဖြူလက်ခံပါတယ်။ ခရိုနီတွေ ခိုးထားတဲ့ ငွေတွေကို အသိမှတ်ပြုလက်ခံပါတယ်။ ခရိုနီတွေနဲ့ ပတ်သက်ရင် “ဓါးပြတိုက်ထားတဲ့ ငွေနဲ့ပင်ဖြစ်ပစေ၊ ဘုန်းကြီးကိုဆွမ်းလောင်းရင်တော့ သာဓုခေါ်ရမှာပဲ”ဆိုတဲ့ မူကို ဒေါ်အောင်ဆန်းစုကြည်က ကျင့်သုံးပါတယ်။ သူခိုးဓါးပြတွေ ဘုရားဒါယိကာဖြစ်ဖို့ အခွင့်အရေးရပါပြီ။

(နောက်အပိုင်းတွေမှာ OSI နဲ့ NED ရဲ့ အကြောင်းကို ရေးပါမယ်။)

ဇော်ဝင်း

၈၈ ကျောင်းသားဟောင်း