စင်္ကာပူ “အာရှလုံခြုံရေးဆိုင်ရာ ရှန်ဂရီလာဆွေးနွေးပွဲ” မှာ ကာကွယ်ရေးဝန်ကြီး ဒုတိယဗိုလ်ချုပ်ကြီးလှမင်း ပြောကြားတဲ့ ထဲက အချက် ၂ ချက် နဲ့ပတ်သက်ပြီး အခုလိုမြင်ပါတယ်။
“ နိုင်ငံတော်သမ္မတ ဦးသိန်းစိန်အစိုးရ၏ ဒီမိုကရက်တစ် ပြုပြင်ပြောင်းလဲရေး လုပ်ဆောင်နေမှုများအပေါ် တပ်မတော်က ရာနှုန်းပြည့်ထောက်ခံပြီး အရပ်သားအစိုးရ၏ ညွှန်ကြားမှုများကိုလိုက်နာလုပ်ဆောင်မှု ဆက်လက်လုပ်ဆောင်သွားမည်”
ဆိုတဲ့ အချက်က ဘန်ကောက်မှာ ကျင်းပတဲ့ (WEF) ဖိုရမ်မှာ ဒေါ်အောင်ဆန်းစုကြည်ထည့်သွင်းပြောဆိုခဲ့တဲ့ “လက်ရှိမြန်မာနိုင်ငံရဲ့ အခြေအနေဟာ နောက်ကြောင်းပြန်မလှည့်တော့ဘူးလို့ အတိအကျမပြောနိုင်သေးတဲ့အတွက် သတိထားစောင့်ကြည့်ကြဖို့ ” ဆိုတဲ့ စကားကိုတုန့်ပြန်တာ လို့မြင်ပါတယ်။
သမ္မတနဲ့ အစိုးရညွန်ကြားမှုများကို လိုက်နာဆောင်ရွက်သွားမယ်လို့ဆိုပေမယ့် ကချင်ပြည်နယ်မှာ အတိုက်အခိုက်တွေရပ်ဆိုင်း ထားဖို့ သမ္မတကနေ ကာကွယ်ရေးဦးစီချုပ်ထံညွန်ကြားခဲ့ပေမယ့် ကချင်ပြည်နယ်မှာ ယနေ့အထိ တိုက်ပွဲတွေဖြစ်နေဆဲ၊ သေနတ်သံတွေ ပေါ်ထွက်နေဆဲဖြစ်ပါတယ်။
စစ်ကြောင့် ကချင်ပြည်နယ်ကပြည်သူတွေ စိုးရိမ်သောကတွေရှိနေရဆဲဖြစ်ပါတယ်။ လုပ်ငန်းကိုင်ငန်းတွေကို စိတ်လက်ချမ်း သာစွာလုပ်ကိုင်နိုင်ခြင်းမရှိသလို၊ ကလေးငယ်များလည်း စာသင်ခန်းကို မသွားနိုင်သေးပါဘူး။ တိုက်ခိုက်ကြတဲ့ နယ်မြေထဲက ပြည်သူများ ကတော့ စစ်ဘေးလွတ်ရာသို့ ထွက်ပြေးခိုလှုံနေရဆဲဖြစ်ပါတယ်။
သမ္မတညွန်ကြားချက်ကို တပ်မတော်ကာကွယ်ရေးဦးစီးချုပ်ကမနာခံတာလား၊ စစ်တပ်ကမနာခံတာလား။ နှစ်ခုစလုံးများလား။ ဒါမှမဟုတ် သမ္မတကိုယ်တိုင်က အစကတည်းက ဘာညွန်ကြားချက်မျှမပေးခဲ့တာလား။
ကာကွယ်ရေးဝန်ကြီးပြောတဲ့အထဲမှာ နောက်ထပ်တစ်ချက်က-“မြန်မာနိုင်ငံ အသွင်ကူးပြောင်းရေးနှင့် ဖွံ့ဖြိုးတိုးတက်ရေးအတွက် အချိန်ယူရမည်ဖြစ်ပြီး သင့်တော်သော အချိန်တစ်ခုသို့ရောက်ပါက ၂၀၀၈ ခုနှစ်၊ အခြေခံဥပဒေအရ လွှတ်တော်ထဲသို့ ရောက်နေ သော တပ်မတော်သားကိုယ်စားလှယ် ၂၅ ရာခိုင်နှုန်း အရေအတွက်ကို လျော့ချနိုင်ခြေရှိသည်” တဲ့။
“စစ်သားအမတ်၂၅ ရာခိုင်နှုန်းကို လျော့ပေးဖို့မရှိဘူး” ဆိုတဲ့အချက်နဲ့ လောလောဆယ်မှာ “စစ်သားတစ်ယောက်ရဲ့ ထောက်ခံ မှု” ကို မမျှော်လင့်နဲ့လို့ ပြောလိုက်တာဖြစ်ပါတယ်။
လက်ရှိအစိုးရလုပ်နေတာတွေကို အချိန်ပေးရမယ်။ အဲဒီနောက် သင့်တော်တဲ့အချိန်တစ်ခုရောက်မှသာ စစ်သားအမတ် လျှော့ ချနိုင်ခြေရှိတယ်လို့ပြောတာပါ။
“သင့်တော်တဲ့အချိန်” တို့၊
“အကြောင်းမညီညွတ်ပါသဖြင့်” တို့ ၊
“ထာဝရငြိမ်းချမ်းရေး”တို့၊
“ပြည်ထောင်စုပြိုကွဲ စေမည့် — တိုင်းရင်းသား စည်းလုံးညီညွတ်ရေး ပြိုကွဲစေမည့်— အချုပ်အခြာအာဏာ လက်လွတ်ဆုံးရှုံးစေမည့် အရေးပေါ်အခြေအနေ” တို့ ဆိုတာ တွေဟာ သူတို့ပါးစပ်ထဲမှာရှိပြီးသူတို့ စိတ်ကြိုက် လိုအပ်ရင် လိုအပ်သလို စပရိန်ကဲ့သို့ ချဲ့နိုင်/ကားနိုင်တဲ့ စကားလုံးတွေ၊ စကားရပ်တွေ၊ အသုံးအနှုန်းတွေသာဖြစ်ပါတယ်။
ပြီးတော့ဒီ စကားလုံးတွေ၊ စကားရပ်တွေ၊ အသုံးအနှုန်းတွေရဲ့အဓိပ္ပါယ်ဖွင့်ဆိုခွင့်ဆိုတာလည်း သူတို့လက်ထဲကမှာရှိတဲ့ အခွင့် အရေးသာဖြစ်ပါတယ်။
ဒါကြောင့်လက်ရှိအစိုးရလုပ်နေတာတွေကိုအချိန်ပေးရမယ်။
အဲဒီနောက် “သင့်တော်တဲ့အချိန်တစ်ခု” ရောက်မှသာ စစ်သားအမတ် လျှော့ချနိုင်ခြေရှိတယ်လို့ ပြောတာပါ။ လျှော့ချပေးမယ် လို့ မပြောဘူး။ ဖြစ်နိုင်ခြေအလားအလာရှိတယ်လို့သာပြောတာပါ။
“နောက်ကြောင်းပြန်လှည့်သွားမယ်” ဆိုတဲ့ စကားဟာ စစ်တပ်က အာဏာပြန်သိမ်းတာ၊ စစ်အုပ်ချုပ်ရေး အောက်ပြန်ရောက် သွားတာကို ရည်ညွန်းနေကြတာဆိုရင် ကာကွယ်ရေးဦးစီးချုပ်က စစ်တပ်နဲ့အာဏာသိမ်းတာနဲ့ စစ်အုပ်ချုပ်ရေးလုပ်တယ်ဆိုတာတွေဟာ ဖွဲ့စည်းပုံအခြေခံဥပဒေ (၂၀၀၈) နဲ့အညီ ဆောင်ရွက်တာပဲဖြစ်လိမ့်မယ်။
ဖွဲ့စည်းပုံအခြေခံဥပဒေ (၂၀၀၈) ထဲမှာ ကာကွယ်ရေးဦးစီးချုပ်ကို အာဏာသိမ်းခွင့်ပေးထားတယ်။
- ပုဒ်မ ၄၀ (ခ) (ဂ) မှာပြဋ္ဌာန်းပေးထားပါတယ်။
ထို့အပြင် အခန်း (၁၁) အရေးပေါ်ကာလဆိုင်ရာ ပြဋ္ဌာန်းချက်များ အခန်းတွင် ကာကွယ်ရေးဦးစီးချုပ်နှင့် အမျိုးကာကွယ်ရေး နှင့်လုံခြုံရေးကောင်စီ အတွက် အသေးစိတ်လုပ်ပိုင်ခွင့်များပေးအပ်ထားပါတယ်။
နောက်ကြောင်းပြန်လှည့်သွားမှာကို စိုးရိမ်ပြီး သူတို့ပြောတဲ့ “သင့်တော်တဲ့အချိန်”ကို ကျနော်တို့စောင့်ကြမလား။
(photo – Hla Min in Singapore, Reuters)
မူရင်းသတင်းက ဒီမှာပါ။
No comments:
Post a Comment
မိမိတို့၏အမြင်များကို လွတ်လပ်ပွင့်လင်းစွာရေးသားနိုင်ပါသည်။
ဘမ်းမည်မဟုတ်ပါ။