ဧရာဝတီတိုင်း ညောင်တုန်းမြို့နယ် ဆားမလောက်ကျေးရွာ အထက်ပိုင်း ရပ်ကွက်အနီးမှာရှိတဲ့ အရက်ချက်စက်ရုံမှ ထွက်ရှိတဲ့ ရေဆိုးရေညစ်တွေကို ပန်းလှိုင်မြစ်အတွင်း စွန့်ပစ်တဲ့အတွက် အနီးတဝိုက်မှာရှိတဲ့ ဒေသခံပြည်သူတွေ ကျန်းမာရေး ထိခိုက်နေရပါတယ်။
အဆိုပါ ပုဂ္ဂလိကပိုင် အရက်အဆီထုတ် စက်ရုံက ဆားမလောက်ကျေးရွာ အထက်ပိုင်းမှာ တည်ဆောက်ပြီး လည်ပတ်နေတာ နှစ်နှစ် ကျော်ပြီ ဖြစ်ပါတယ်။ အရက်ချက်စက်ရုံကနေ တနေ့ကို ပေပါ အလုံး ၁၀၀ ကျော် ထွက်ရှိပြီး အလုပ်သမား ၅၀၀ ကျော်နဲ့ လည်ပတ်နေတာ ဖြစ်ပါတယ်။ ဘွိုင်လာနှစ်လုံးတပ်စက်ကြီးနဲ့ လည်ပတ်နေတဲ့အတွက်ကြောင့် ကျေးရွာမှာရှိတဲ့ ကလေးတွေက အသက်ရှူရှိုက်လို့ မရဘူး။ အသက်ရှုကြပ်တဲ့ ရောဂါတွေ ဖြစ်တယ်။ ဒီအနံ့ဆိုးတွေကြောင့် လူနေရပ်ကွက်တွေ၊ စာသင်ကျောင်းတွေ စတဲ့ ဘေးပတ်ဝန်းကျင်အားလုံးမှာ အနှောင့်အယှက် ဖြစ်နေရပါတယ်။ အရက်ချက်စက်ရုံမှ ထွက်ရှိတဲ့ ရေဆိုးရေညစ်တွေကို ပိုက်တွေနဲ့ သွယ်တန်းပြီး ပန်းလှိုင်မြစ်ထဲကို စွန့်ပစ်နေတာဖြစ်ပါတယ်။
ဒါ့ကြောင့် မြစ်ရေကို သောက်ရေသုံးရေ ပြုလုပ်နေကြတဲ့ ဒေသခံပြည်သူတွေ သုံးလို့မရတော့တဲ့ အနေအထားမျိုးဖြစ်နေပြီး ပန်းလှိုင်မြစ်တလျှောက်က တံငါသည်တွေလည်း အရင်လို ငါးမရတော့ပါဘူး ။ ဒါအပြင် စွန့်ပစ်ပစ္စည်းကနေ နံတဲ့အနံ့က ဒီအထက်ပိုင်းရပ်ကွက် တကွက်ထဲတင် မဟုတ်ဘူး။ အရပ်ရှစ်မျက်နှာမှာရှိတဲ့ လူပုဂ္ဂိုလ်တွေအားလုံး အနံ့ဆိုးတွေကို လေသင့်ရာ အမြဲတမ်းခံစားရနေပါတယ်လို့ ဒေသခံတွေ ဘားမားဗီဂျေ မီဒီယာကို ပြောပါတယ်။
အရက်ချက်စက်ရုံ စတင်လည်ပတ်ပြီးစအချိန်မှာပဲ ဆားမလောက်ကျေးရွာ အထက်ပိုင်းရပ်ကွက်မှာရှိတဲ့ ဒေသခံပြည်သူ ၂၀၀ ကျော်က စုပေါင်းလက်မှတ်ရေးထိုးပြီး စက်ရုံကို ပြောင်းရွှေ့ပေးရန် ဧရာဝတီတိုင်း ဝန်ကြီးဌာနထံသို့ တိုင်ကြားခဲ့ကြသော်လည်း တစုံတရာ လာရောက်ဖြေရှင်းပေးတာမျိုး မရှိဘူးလို့ သိရပါတယ်။
“ဒီအရက်ချက်စက်ရုံက အရက်ချက်တဲ့အတွက်ကြောင့် ရေသယံဇာတတွေ ဆုံးရှုံးတယ်။ အနီးအနား ပတ်ဝန်းကျင်က ပြည်သူတွေ ဒီလိုအနံ့ဆိုးတွေ ခံရတယ်။ မီးခိုးတွေက ထွက်တဲ့ ပြာမှုန်တွေကို ရှုရရှိုက်ရတဲ့အတွက် ကျန်းမာရေး မကောင်းကြဘူး။ အဲလိုအဖြစ်မျိုးတွေ ဖြစ်တဲ့အပြင်ကို ဒီအရက်ကြောင့် ဒီကျေးရွာမှာရှိတဲ့ လူငယ်တွေ၊ ကျေးရွာအနီးတဝိုက်မှာရှိတဲ့ လူငယ်တွေ ၊မြို့နယ် တမြို့နယ်လုံးကလဲ ဒီအရက်ချက်စက်ရုံက ထွက်တဲ့ အရက်ဆီတွေကို ထော်လာဂျီတွေနဲ့ လာယူကြတယ်။ မအူပင်၊ ပန်းတနော်၊ ဓနုဖြူ အဲဒီဘက်တွေကပါ လာယူကြတယ်။ အရက်တွေကြောင့် လူငယ်တွေအများဆုံး မကြာခဏဆိုသလို သေဆုံးနေကြတယ်။ အဲအတွက်ကို မဖြစ်စေချင်တဲ့အတွက်ကြောင့် ဒီအရက်ချက်စက်ရုံကြီးကို ကျနော်တို့ ရွာပေါ်မှာ မရှိစေချင်တော့ပါဘူး။” လို့ ဆားမလောက်ကျေးရွာ အထက်ပိုင်းရပ်ကွက်မှာ နေထိုင်သူ တဦးဖြစ်တဲ့ ကိုမောင်မောင်လတ်က ဘားမားဗီဂျေ မီဒီယာကို ပြောပါတယ်။
ဖေဖော်ဝါရီလ ၁၀ ရက်နေ့မှာ ဆားမလောက်ကျေးရွာ အထက်ပိုင်းရပ်ကွက်မှာရှိတဲ့ ဒေသခံပြည်သူတွေ စုပေါင်းပြီး အရက်ချက်စက်ရုံမှ မန်နေဂျာနဲ့ သွားရောက်တွေ့ဆုံပြီး ရေဆိုးတွေ စွန့်ထုတ်တာ၊ စွန့်ပစ်ပစ္စည်းတွေကို ပန်းလှိုင်မြစ်ထဲ စွန့်ပစ်တဲ့အတွက် ပန်းလှိုင်မြစ်တလျှောက်မှာ နေထိုင်တဲ့ ပြည်သူတွေအားလုံး သောက်သုံးလို့မရတော့တဲ့ အနေအထားမျိုး ဖြစ်နေတယ်လို့ ပြောဆိုတဲ့အခါမှာ စက်ရုံမှ ရေဆိုးတွေကို သန့်စင်ပြီးမှ စွန့်ပစ်ပါမယ်လို့ ကတိပေးခဲ့ပေမယ့် အခုချိန်ထိ ရေဆိုးတွေကို ဒီအတိုင်းပဲ မပြောင်းလဲပဲ ပန်းလှိုင်မြစ်ထဲသို့ စွန့်ပစ်နေဆဲပဲ ဖြစ်တယ်လို့ သိရှိရပါတယ်။
ဆားမလောက်ကျေးရွာ အထက်ပိုင်း ရပ်ကွက်အနီးမှာရှိတဲ့ အရက်ချက်စက်ရုံ ဘားမားဗီဂျေ
Photo Credit and Thanks to Eleven Media Group
http://feeds.feedburner.com/
No comments:
Post a Comment
မိမိတို့၏အမြင်များကို လွတ်လပ်ပွင့်လင်းစွာရေးသားနိုင်ပါသည်။
ဘမ်းမည်မဟုတ်ပါ။