ဒေါ်အောင်ဆန်းစုကြည်၏ ရှမ်းပြည်နယ်ခရီးစဉ်အတွက် အသုံးပြုရန် ငွေကြေးများ ကောက်ခံရာ၌ မီဒီယာ အမည်ခံ၍ လိမ်လည်မှုများ ပါဝင်လာကြောင်း သိရှိရသည်။
NLD ပါတီသည် ဒေါ်အောင်ဆန်းစုကြည်၏ ရှမ်းပြည်နယ်ခရီးစဉ်အတွက် ကြိုဆိုဧည့်ခံမှုများ၊ ဆိုင်းဘုတ်များ စသည်တို့ ပြုလုပ်ရန်နှင့် လူအင်အားများများ တက်ရောက်ကြစေရန်အတွက် ငွေကြေးများ ကောက်ခံလျက် ရှိရာ မီဒီယာအမည်များ သုံး၍ လိမ်လည်ကောက်ခံမှုများ လုပ်ဆောင်လာခဲ့ကြောင်း သတင်းရရှိသည်။
ယင်းသို့ ငွေကြေးကောက်ခံရာတွင် DVB၊ RFA၊ 7Day စသည့် မီဒီယာအမည်များကိုပါ အသုံးပြုပြီး လိမ်လည်ကောက်ခံခြင်းများလည်း ဖြစ်ပွားခဲ့သည်။
ယမန်နေ့က တောင်ကြီးမြို့၊ မီးပုံပျံကွင်းအနီးတွင် မဟာနွယ်စားသောက်ဆိုင်သို့ DVB သတင်းဌာနမှ သတင်းထောက်ကိုဖိုးသား အမည် ပြော၍ ကောက်ခံသွားခဲ့ကြောင်း ရန်ကုန်ရှိ သတင်းထောက်တစ်ဦးက ပြောဆိုသည်။
"မနေ့က ကောက်သွားတာပါ။ DVB က ကိုဖိုးသား ဆိုပြီး သူ့ကိုယ်သူပြောတယ် လို့ သိရပါတယ်။ မဟာနွယ်ဆိုတဲ့ စားသောက်ဆိုင်မှာ တစ်သောင်း၊ ပြီးတော့ အဲဒီဘေးမှာ ရှိရှိသမျှ ဆိုင်တွေအကုန်လုံးကို ပတ်ကောက်သွားပါတယ်။ အဲဒါကို ကျွန်တော်တို့ သိရတော့ သတင်းထောက် ဆိုတဲ့ လူ ပေးထားတဲ့ ဖုန်းနံပတ်ကို ဆက်ကြည့်ပါတယ်။ ကိုဖိုးသား မဟုတ်ဘူး။ RFA က ကျော်မျိုးထွန်းပါ ဆိုပြီး ပြောင်းပြီး ပြောတယ်။ ကိုတွတ် ဆိုတာက ကျွန်တော်တို့နဲ့ အတော်ကလေး ရင်းနှီးပါတယ်။ ဒီတော့ ကိုတွတ်လား ဆိုပြီး မေးလိုက်တော့ 7 Day က မောင်တာ ဆိုပြီး လုပ်လာပြန်တယ်။ မောင်တာလည်း ကျွန်တော်တို့နဲ့ သိတာပဲ။ ဘယ်သူလဲ ဆိုပြီး ထပ်မေးတော့ ပြန်မဖြေတော့ဘူး။ ဖုန်းချသွားတယ်" ဟု ကိုယ်တိုင် ဆက်သွယ်စုံစမ်းခဲ့သော နေ့စဉ်ထုတ်သတင်းစာတစ်စောင်မှ သတင်းထောက် တစ်ဦးက ပြောသည်။
"ဒါနဲ့ ကျွန်တော်လဲ ကိုတွတ်ကို လှမ်းပြောလိုက်တယ်။ ကိုတွတ်ရေ ဒီလိုတော့ ဖြစ်နေပြီ။ သတင်းထောက်တွေ၊ မီဒီယာတွေ နာမည်သုံးပြီး လုပ်စားနေတာ။ လူထုဆီက ပိုက်ဆံကောက်တာလဲ ကောက်။ အလှူငွေ မကလို့ ဆက်ကြေးပဲ ကောက်ကောက်။ ဘာမှ မပြောလိုပါဘူး။ ဒါပေမယ့် ဘယ်မီဒီယာ၊ ဘယ်သတင်းထောက် ဆိုတာမျိုးတွေ လုပ်လာတဲ့အခါကျတော့ ကျွန်တော်တို့ကို သက်သက်မဲ့ နာမည်ဖျက်တာပါပဲ။ ကိုတွတ်ကိုယ်တိုင် ဒီဖုန်းနံပတ်နဲ့ တောင်ကြီးကို စုံစမ်းလိုက်တော့မှ ဒီငွေကြေး လိုက်ကောက်နေတာဟာ တောင်ကြီး NLD ပါတီ ပြန်ကြားရေးက တာဝန်ရှိသူ ဖြစ်နေတာ သိရတယ်။ ဒီကိစ္စကိုလဲ တောင်ကြီး NLD ဥက္ကဌ၊ အတွင်းရေးမှူးတွေကိုလဲ ပြောထားပါတယ်။ သူတို့ကတော့ ဖြေရှင်းပေးမယ် လို့တော့ ပြောတယ်။ အဲဒီပိုက်ဆံလိုက်တောင်းတဲ့သူက ဒီမနက်ပဲ နမ်ဆန်တက်သွားပြီး ဒေါ်စု ခရီးစဉ်အတွက် ကြိုတင် စီစဉ်နေတယ် လို့ သိရတယ်" ဟု ၄င်းက ပြောဆိုသည်။
"NLD ကို ကျွန်တော်တို့ နားလည်ပါတယ်။ ဒေါ်စု ခရီးစဉ်အတွက် ငွေကြေး လိုအပ်ချက်အတွက် ပြည်သူတွေဆီက ကောက်ခံရတာ သိပါတယ်။ ငွေမှ မတတ်နိုင်ဘဲ။ တချို့လဲ မပေးချင်လဲ ပေးရတာပေါ့။ တချို့လဲ စိတ်လိုလက်ရ ပေးတာပါ။ ခရီးစဉ်မှာ ဆိုင်းဘုတ်ကြီးတွေ၊ ပန်းကုံးတွေ၊ ဆိုင်းဘုတ်တွေ၊ ၀တ်စုံတွေ သုံးရတာ များတော့ ငွေကြေးလိုအပ်ချက်ကလဲ ကြီးမှာ သေချာပါတယ်။ ဒါပေမယ့် သူများကို လွှဲချ နာမည်ဖျက် တရားခံရှာတာမျိုးကတော့ မဖြစ်သင့်ဘူး ထင်ပါတယ်" ဟု အပတ်စဉ်ထုတ် သတင်း ဂျာနယ်တစ်စောင်မှ သတင်းထောက်တစ်ဦးက ပြောကြားသည်။
သတင်းမီဒီယာများမှ သတင်းထောက်အချို့ကမူ ပြင်းပြင်းထန်ထန် တုံ့ပြန် ပြောကြားခဲ့ကြသည်။
"ဒါမျိုးတော့ လက်ခံပေးလို့ နားလည်ပေးလို့ မရဘူးဗျ။ NLD ပါတီက သူ့ဘာသာသူ ပြည်သူတွေဆီက ဆက်ကြေးကောက်ကောက်၊ ဓါးပြတိုက်တိုက် ကျွန်တော်တို့နဲ့ မဆိုင်ဘူး။ လူထု အိတ်ထဲက ပိုက်ဆံကို သူ့ဘာသာသူ ဘယ်လိုနည်းလမ်းနဲ့ ယူယူ မိရင်တော့ခံ၊ မမိရင် စံပေါ့ဗျာ။ ဒါပေမယ့် အခုလို ကျွန်တော်တို့နာမည်တွေ သုံးပြီး ကောက်တာကတော့ နားလည်ပေးစရာ ကိစ္စ မဟုတ်ဘူး။ NLD ပါတီ ဒေါ်စုခရီးစဉ်အသုံးစရိတ်အတွက် ပြည်သူလူထုဆီက ကောက်တာပါ ဆိုပြီး ပွင့်ပွင့်လင်းလင်း ပြောပြီး တောင်းပေါ့ဗျာ။ ဒီလိုပဲ တောင်းပြီး လုပ်လာတာပဲ မဟုတ်ဘူးလား။ အခု တောင်ကြီးကျမှ မီဒီယာလိုလို ဘာလိုလို လုပ်လာတာ လက်မခံနိုင်ဘူး။ အလကားနေရင်း ကျွန်တော်တို့က သိက္ခာကျတယ်။ ကျွန်တော်တို့ မီဒီယာဆိုတာ ကြားနေသမားပဲ။ ကျွန်တော်တို့က ဘယ်ပါတီကိုမှ ဘက်လိုက်ဖို့ မလိုဘူး။ ဘယ်ပါတီရဲ့ လက်ကိုင်ဒုတ် ဖြစ်စရာ မလိုဘူး။ တချို့လဲ ပါတီကြီးက မွေးထားတဲ့ သတင်းထောက်တွေ မရှိဘူး မဟုတ်ပါဘူး။ ရှိကြပါတယ်။ ဒီတော့ ဘက်လိုက်တာတွေ၊ လိုချင်သလို တင်ပြတာတွေ ဖြစ်လာပါတယ်။ ကျွန်တော်တို့ကတော့ ရှင်းရှင်းပဲ ပါတီမွေးထားတဲ့ သတင်းသမားဘ၀ အရောက် မခံဘူး။ ကျင့်ဝတ်နဲ့အညီပဲ ရေးမယ်။ တင်ပြမယ်။ အလားတူပဲ ကျွန်တော်တို့ကို လာပြီး အသုံးမချနဲ့။ အသုံးချတာ လက်မခံဘူး။ အခုလို မီဒီယာနာမည်သုံးပြီး လိမ်လည်တာကတော့ NLD ပါတီမှာပဲ တာဝန်ရှိတယ်။ အခုဟာက လက်ပူးလက်ကျပ် မိလို့သာပေါ့။ ဒီလိုမျိုး မဟုတ်မမှန်လုပ်စားနေတာ ဘယ်လောက်ရှိပြီလဲ မသိနိုင်ဘူး။ တောင်ကြီး NLD တာဝန်ရှိသူတွေ ဒီကိစ္စကို ကျွန်တော်တို့ဘက်က ကျေနပ်တဲ့အထိ ရှင်းပေးဖို့ တောင်းဆိုချင်ပါတယ်" ဟု မြန်မာဂျာနယ်လစ်ကွန်ရက်က တာဝန်ရှိသူတစ်ဦးက ပြောသည်။
"ကျွန်တော်တို့ သိထားတာတွေ အများကြီး ရှိတယ်။ ဒီ့ထက်ပိုပြီး ဆိုးဆိုးရွားရွား ပြည်သူလူထုကို လုပ်နေတာတွေ သိထားတာတွေ ရှိပါတယ်။ ဒါပေမယ့် ဒေါ်စုမျက်နှာထောက်ထားပြီး မပြောပါဘူး။ ရေးလဲ မရေးပါဘူး။ ဒီလိုမျိုး ဒေါ်စုခရီးစဉ်အတွက် လူထုလည်ပင်းညှစ် ဆက်ကြေးတောင်းသလိုမျိုး ငွေတောင်းတဲ့လုပ်ရပ်တွေကို မကြိုက်ဘူး။ ပိုပြီး ဆိုးတာက ဒီလို လူထုလည်ပင်းညှစ်တဲ့ကိစ္စမှာ ကျွန်တော်တို့ မီဒီယာ၊ သတင်းထောက်တွေ ဆိုပြီး လုပ်သွားတာမျိုးကတော့ အရှက်ရော သိက္ခရော တစ်စက်မှ မရှိဘူးလို့ပဲ ပြောရမှာပဲ။ NLD တာဝန်ရှိသူတွေ အမြန်ဆုံး အကောင်းဆုံး ဖြေရှင်းပေးဖို့ လိုတယ်။ ခုနက ငွေကောက်ခံတာ ခ့ခဲ့ရတဲ့ ပြည်သူလူထုကိုလဲ မီဒီယာက မဟုတ်ဘူး။ သတင်းထောက်တွေ မဟုတ်ဘူး။ NLD ပါတီက ငွေကောက်တာပါ ဆိုတာကို ပြန်ရှင်းပြဖို့ လိုတယ်။ တောင်ကြီး NLD ဒီကိစ္စကို အမြန်ဆုံး ဖြေရှင်းပေးတာ လိုချင်တယ်" ဟု နာမည်အသုံးပြုခြင်း ခံခဲ့ရသော သတင်းထောက်တစ်ဦးက ပြင်းပြင်းထန်ထန် ပြောကြားခဲ့သည်။
အမျိုးသားဒီမိုကရေစီအဖွဲ့ချုပ် ဥက္ကဌ ဒေါ်အောင်ဆန်းစုကြည်သည် ကရင်ပြည်နယ်သို့ သွားရောက်ပြီး မကြာမီတွင် ရှမ်းပြည်နယ်သို့ သွားရောက်ကာ ဖွဲ့စည်းပုံအခြေခံဥပဒေဆိုင်ရာ လူထုရှင်းလင်းပွဲများ ပြုလုပ်သွားမည် ဖြစ်သည်။
ပြည်သူ့အာဏာ
No comments:
Post a Comment
မိမိတို့၏အမြင်များကို လွတ်လပ်ပွင့်လင်းစွာရေးသားနိုင်ပါသည်။
ဘမ်းမည်မဟုတ်ပါ။