တိုင်းရင်းသား လက်နက်ကိုင်အဖွဲ့များ၏ ဒုတိယညီလာခံဖြစ်သော လော်ခီးလာ ညီလာခံတွင် လုံခြုံရေး တာဝန် ထမ်းဆောင်နေသော KNU တပ်ဖွဲ့ဝင်များ၂ဝ၁၃ ခုနှစ် နိုဝင်ဘာ ပထမပတ်က ကချင်ပြည်နယ်၊ မြစ်ကြီးနားမြို့၌ ပြုလုပ်ခဲ့သော အစိုးရ၏ ပြည်ထောင်စုအဆင့် ငြိမ်းချမ်းရေး ဖော်ဆောင်ရေး လုပ်ငန်းကော်မတီနှင့် တိုင်းရင်းသား လက်နက်ကိုင်များ၏ တစ်နိုင်ငံလုံးဆိုင်ရာ အပစ်အခတ် ရပ်စဲရေးညှိနှိုင်းရေးအဖွဲ့ (NCCT) တို့၏ ငြိမ်းချမ်းရေး ဆွေးနွေးပွဲအပြီး ငြိမ်းချမ်းရေး ဆွေးနွေးမှု ဖြစ်စဉ် များတွင် တပ်မတော်၏ ပူးပေါင်းပါဝင်မှု ပိုမိုအားကောင်းလာကြောင်း NCCT အဖွဲ့ဝင် ဒေါက်တာ ဆလိုင်းလျန်မှုန်းဆာခေါင်းက ဇန်နဝါရီ ၂ဝ ရက်က ပြောကြားသည်။
တိုင်းရင်းသား လက်နက်ကိုင် အဖွဲ့များ၏ ဒုတိယအကြိမ် ညီလာခံကို ကရင်အမျိုးသား အစည်းအရုံး(KNU) ထိန်းချုပ်နယ်မြေ လော်ခီးလာစခန်းတွင် ပြုလုပ်နေပြီး ညီလာခံ ပထမနေ့မစတင်မီ ဒေါက်တာ ဆလိုင်းလျန်မှုန်းဆာခေါင်းနှင့် The Daily Eleven တို့ တွေ့ဆုံချိန်၌ ၎င်းက ယင်းကဲ့သို့ ပြောကြားခဲ့ခြင်း ဖြစ်သည်။ မြစ်ကြီးနား ဆွေးနွေးပွဲတွင် တိုင်းရင်းသား လက်နက်ကိုင်အဖွဲ့များ တင်ပြခဲ့သော အပစ်ရပ် စာချုပ် မူကြမ်းနှင့် အစိုးရအဖွဲ့မှ တင်ပြလာသည့် အပစ်ရပ် စာချုပ်မူကြမ်း တို့အကြား ကွဲလွဲမှုများရှိခဲ့ပြီး ထိုဆွေးနွေးပွဲမှာ အဖြေထွက်ခဲ့ခြင်း မရှိသော်လည်း မြစ်ကြီးနား ဆွေးနွေးပွဲနောက်ပိုင်း တပ်မတော်၏ ပူးပေါင်း ပါဝင်မှုမှာ ပိုမိုအားကောင်း လာသည်ဟု ဒေါက်တာဆလိုင်းလျန်မှုန်း ဆာခေါင်းက ဆိုသည်။
“ကျွန်တော်တို့ မြစ်ကြီးနားဆွေးနွေးပွဲ ပြီးတဲ့နောက်ပိုင်း ဆွေးနွေးပွဲဖြစ်စဉ်တိုင်းမှာ တပ်မတော်ဘက်က ပါလာတယ်။ MPC မှာ သွားဆွေးနွေးတုန်းကလည်း တပ်မတော်ဘက်က ခေါင်းဆောင်တွေပါတယ်။ ချင်းမိုင် လာတုန်းကလည်း ပါတယ်။ အဲဒါကို ကျွန်တော်တို့က ကြိုဆိုတယ်”ဟု ဒေါက်တာဆလိုင်းလျန်မှုန်း ဆာခေါင်း က ဆိုသည်။
“တပ်မတော်ဘက်က ငြိမ်းချမ်းရေး ဖြစ်စဉ်တွေမှာ မပါရင် ဒါကမဖြစ်သင့်တဲ့ အရာပဲ။ အဲဒီတော့ သူတို့ ပါလာဖို့ လိုတယ်။ ကျွန်တော်တို့ဘက်က အလေးအနက်ထားတယ်။ သူတို့ပါလာတယ်။ တော်တော်လည်း ဆွေးနွေးဖြစ်တယ်။ အထူးသဖြင့် ပြည်ထောင်စု အခန်းကဏ္ဍပေါ့။ တပ်မတော်ရဲ့ အခန်းကဏ္ဍကိုလည်း တော်တော်ဆွေးနွေးကြတယ်။ ဘယ်အချက်ကို ဘယ်လိုပြောခဲ့ကြတယ် ဆိုတာကတော့ ဒီအချိန်မှာပြောဖို့ စောသေးတယ်။ ဘာလို့လဲဆိုတော့ ညှိနှိုင်းတဲ့ အပိုင်းဆိုတော့ ဒီကာလမှာ အဖြေရှာဖို့ လိုတယ်လေ။ တပ်မတော်ဘက်က ဘယ်လိုတင်ပြလဲ။ ဘယ်လိုပြောလဲ ဆိုတာတွေက မပြောသင့်သေးဘူး။ တပ်မတော် မပါဘဲ ငြိမ်းချမ်းရေး ဆောင်ရွက်လို့မရဘူး”ဟု ၎င်းက ဆက်လက် ပြောကြားသည်။
တိုင်းရင်းသား လက်နက်ကိုင် အဖွဲ့များ၏ လော်ခီးလာ ညီလာခံသို့ တိုင်းရင်းသား လက်နက်ကိုင်အဖွဲ့ ၁၇ ဖွဲ့တက်ရောက် လျက်ရှိနေပြီး တစ်နိုင်ငံလုံး အပစ်အခတ်ရပ်စဲရေး သဘောတူညီချက်များတွင် အရေးပါ သော နှစ်ဖက်တပ်များ ပဋိပက္ခ မဖြစ်စေရေး ထိန်းသိမ်းရမည့် အချက်ကိုလည်း ဆွေးနွေးပွဲ သုံးရက်တာ ကာလ၌ အဓိကထည့်သွင်း ဆွေးနွေးကြမည် ဖြစ်ကြောင်း သိရသည်။
Eleven Media Group
No comments:
Post a Comment
မိမိတို့၏အမြင်များကို လွတ်လပ်ပွင့်လင်းစွာရေးသားနိုင်ပါသည်။
ဘမ်းမည်မဟုတ်ပါ။