နိုင်ငံတွင်ဤမျှများပြားလှသော ပြဿနာများကို မည်သို့မျှဖြေရှင်းနိုင်စွမ်းမရှိခဲ့ပဲ နှစ်တစ်နှစ်ကုန်ဆုံး သွားခဲ့ရသည် ။ အချို့နေရာဒေသအလိုက် လယ်ယာမြေသိမ်းပြဿနာများကို လွှတ်တော်က အထိုက် အလျောက်ဖြေရှင်းပေးခဲ့သော်လည်း ထိရောက်သောဖြေရှင်းမှုများဖြစ်မလာခဲ့ ။ ဤသို့ဖြင့်ပင် လုံးလည် ချာလည် လိုက်နေခဲ့သည် ။ ပြည်တွင်ငြိမ်းချမ်းရေးကလည်း ဆွေးနွေးပွဲများသာ ထပ်ထပ်ကြမ်းခဲ့သည် ၊ ရောင်နီ ပျို့မလာ ၊ အပစ်အခတ်ရပ်စဲရေးဆွေးနွေးပွဲကလူများ နေရပ်ပြန်မရောက်သေး ၊ ပြန်လည်ပစ်ခတ် တိုက်ခိုက် နေကြသော ဖြစ်ရပ်များကား စိတ်မောဖွယ်ကောင်းလွန်းလှသည် ။ အရင်းစစ်တော့ အမြစ်မြေကပင် ။
၂၀၁၃ ခုနှစ်နှောင်းပိုင်းကာလတွင် ဖွဲ့စည်းပုံအခြေခံဥပဒေ ပြင်ဆင်ရေးကိစ္စကလည်း အတော်ပင် လှုပ်လှုပ် ရှားရှားဖြစ်ခဲ့သည် ။ လွှတ်တော်ဖွဲ့စည်းပုံအခြေခံဥပဒေ သုံးသပ်လေ့လာရေးပူးပေါင်း ကော်မရှင်ဖွဲ့ စည်း ခဲ့ပြီး နောက်တွင် ၊ ဖွဲ့စည်းပုံအခြေခံဥပဒေဆိုင်ရာဟောပြောပွဲများ ဆက်တိုက်ပေါ်ပေါက်လာခဲ့သည် ။ အဓိက အတိုက်အခံ ပါတီကြီးဖြစ်သော အမျိုးသား ဒီမိုကရေစီအဖွဲ့ချုပ်က ဦးဆောင်ကျင်းပသည့် လူထုဟော ပြောပွဲများနှင့် လူထုဆန္ဒခံယူပွဲများက အမြို့မြို့အနယ်နယ်တွင် နေ့စဉ်ရက်ဆက် ပေါ်ထွက်လာခဲ့သည် ။ လွတ်လပ် သောအဖွဲ့အစည်းများ ၊ နိုင်ငံရေးပါတီမဟုတ်သော အဖွဲ့အစည်းများပူးပေါင်း၍ ဖွဲ့စည်းပုံ အခြေခံ ဥပဒေ ဆိုင်ရာ ပြည်သူကွန်ရက် ပေါ်ပေါက်လာသည် ။ ဟောပြောပွဲများလိုက်လံကျင်းပခဲ့ကြသည် ။ အပတ် စဉ် ထုတ်ဂျာနယ်များတွင် အခြေခံဥပဒေပြင်ဆင်ရေး ဆောင်းပါးများက အပတ်စဉ်အပတ်တိုင်း ပါဝင်လာခဲ့သည် ။ ဖွဲ့စည်းပုံအခြေခံဥပဒေကို ကာကွယ်လိုသူများ ဖက်ကလည်း ဖွဲ့စည်းပုံအခြေခံဥပဒေဆိုင်ရာ ဆွေးနွေးပွဲတစ်ရပ် ကို နိုင်ငံပိုင်ရုပ်မြင်သံကြားမှ ထုတ်လွှင့် ခဲ့ခြင်း မျိုးဖြင့် ဇာတ်ကွက်စုံခဲ့သည် ။
နောက်ပိုင်းတွင် ဒေါ်အောင်ဆန်းစုကြည်ကိုယ်တိုင် အခြေခံဥပဒေဆိုင်ရာပြည်သူ့ဆန္ဒခံယူပွဲစင်မြင့် ထက် သို့ တက်ရောက်လာခဲ့သည် ။ နေပြည်တော် ၊ ကော့မှူး ၊ သာယာဝတီတို့တွင် ဖွဲ့စည်းပုံ အခြေခံ ဥပဒေကို မည်သည့်အတွက် ပြင်ဆင်လိုရခြင်းဖြစ်ကြောင်း၊ ဖွဲ့စည်းပုံအခြေခံဥပဒေသည် တပ်မတော်နှင့် ပြည်သူကြားသွေးခွဲနေသောအရာ ဖြစ်နေကြောင်းတို့ကို ပြည်သူသို့ တင်ပြခဲ့သည် ။ ပြည်သူများသောင်း နှင့်ချီ၍ တက်ရောက် ဆန္ဒပေးခဲ့ကြသည် ။ ဖွဲ့စည်းပုံအခြေခံဥပဒေသည် လူ့အခွင့်အရေး ၊ ဒီမိုကရေစီ စံ စသည်တို့ကို အာမမခံနိုင်ဟူသောအချက်အလက်တို့ကို ပြည်သူအများက သဘောပေါက်နားလည်ခဲ့ကြပြီ ။ တိုင်းရင်းသားတို့ တန်းတူညီမျှ ရပိုင်ခွင့်များကို ပိတ်ပင်တားမြစ်ထားသည်ဟူသော အချက်တို့သည် ဘွင်းဘွင်းပေါ်ခဲ့ပြီ ။ ဤဖွဲ့စည်းပုံအခြေခံဥပဒေသည် နိုင်ငံတော်ပြန်လည်တည်ဆောက်ရေးနှင့် ၊ တိုင်းရင်းသား စည်းလုံးညီညွတ်မှုကို ပြန်လည်တည်ဆောက်ရေး ၊ အမျိုးသား ပြန်လည်ရင်ကြားစေ့ရေး ၊ နိုင်ငံသားတိုင်း၏ တန်းတူညီမျှရပိုင်ခွင့်များ အားလုံးကို ကန့်သတ်ချုပ်ခြယ်ထားသော အရာတစ်ခု ဖြစ်သည်ဆိုသည်ကို ပြည်သူ တို့ ဘက်မှ တစ်ခဲနက် ထုတ်ဖော်ခဲ့ကြပေပြီ ။
ထိုလူထုဟောပြောပွဲ ၊ လူထုဆန္ဒခံယူပွဲများတွင် ပေါ်ထွက်လာသော ပြည်သူတို့၏ ရင်တွင်း ဆန္ဒတစ်ခု မှာကား ဖွဲ့စည်းပုံအခြေခံဥပဒေကို ပြင်ဆင်မပေးဖူးဆိုရင် ပြည်သူတွေက ဘာဆက်လုပ်ကြ ရမလဲ ဟူသော စကားဖြစ်သည် ။ ထိုအချိန်မှာပင် တိုင်းရင်းသားပါတီကြီးတစ်ခု၏ အကြီးအကဲက ဖွဲ့စည်းပုံ အခြေခံဥပဒေကို မပြင်ဆင်နိုင်ခဲ့လျှင် ၂၀၁၅ ခုနှစ် ရွေးကောက်ပွဲဝင်မည်မဟုတ် ဟု ပြောဆိုခဲ့သည့် သတင်း ထွက်ပေါ်လာခဲ့သည် ။ အာဏာရပါတီမှ ပြောရေးဆိုခွင့်ရှိသူအချို့ထံမှလည်း မပြင်လိုမပြင်နိုင် ၊ ပြင်သင့်သည်ကို ပြင်မည် ၊ မပြင်သင့်သည်ကို မပြင်နိုင်စသည်ဖြင့် အသံများထွက်လာခဲ့၏ ။ နိုင်ငံ၏ အနာဂတ်နှစ်များသည် ယခုအတိုင်း ဆက်လက် မုန်တိုင်းမိုး သက်ဆင်မည်လော ၊ လေပြေနုအေးတို့ ညှင်းနော့ကြ မည်လော ။
အပိုင်း(၂)
၂၀၀၈ ဖွဲ့စည်းပုံအခြေခံဥပဒေသည် မြန်မာနိုင်ငံသားတိုင်းရင်းသားပြည်သူအများ လက်မခံနိုင်သော ဖွဲ့စည်းပုံ အခြေခံဥပဒေဖြစ်သည် ဆိုသည်ကို ထိုလူထုဆန္ဒခံယူပွဲများက အတိအလင်း ထုတ်ဖော်လျက် ရှိရုံမျှမက ၊ အာဏာရပါတီ အသိုင်းအ၀ိုင်းအတွင်းမှပင် ပြင်ဆင်ရန် သဘောထားထုတ် ဖော်ပြောဆို ကြသူများ ရှိသည့် အတွက် အချို့အချုိ့သော မျက်စေ့မှိတ် ကာကွယ်လိုသူများ ဆင်ခြေပေးနေသကဲ့သို့ အမျှော်အမြင်ကြီး စွာဖြင့် အချိန်ယူရေးဆွဲခဲ့ရသည်ဆိုသည့် တိုင်းပြုပြည်ပြုမည့် ဖွဲ့စည်းပုံမဟုတ် ဆိုသည် ကတော့ လယ်ပြင်တွင် ဆင်သွားသည် ထက်ပင် ထင်ရှားနေခဲ့သည် ။ ဇန်န၀ါရီလ ၁၃ ရက်နေ့ကပင် ပြည်ခိုင်ဖြိုးပါတီ ဗဟို အလုပ်အမှုဆောင် တစ်ဦးဖြစ်သူ ပြည်သူ့လွှတ်တော်ကိုယ်စားလှယ် သူရ ဦးအောင်ကို ၏ စကားလုံးများက ထင်ရှားပြီးသား အချက်ကို ထပ်မံ၍ မီးမောင်းထိုးပြခဲ့သည် ။ သို့ဖြစ်၍ ထိုဖွဲ့စည်းပုံ အခြေခံဥပဒေကို မဖြစ်မနေ ပြင်ဆင်မှု လုပ်ရမည် ဆိုသည်ကလည်း လုံးဝ အသေအချာပင် ဖြစ်သည် ။
သို့ဆိုပါလျှင် မည်သို့ ပြင်ဆင်ကြပါမည်နည်း ၊ မည်မျှပြင်ဆင်ကြပါမည်နည်း ။
တပ်မတော်သည် ၁၉၈၈ ခုနှစ်အရေးအခင်းတွင် နိုင်ငံတော်၏ ယိုယွင်းလာသောအခြေအနေအရပ်ရပ် ကို ၀င်ရောက်ထိမ်းသိမ်းရန် အတွက် အာဏာကို ရယူခဲ့သည်ဟု တပ်မတော်ခေါင်းဆောင်များက မကြာခဏ ထုတ်ဖော်ပြောကြားလေ့ ရှိပါသည် ။ ထိုနောက်တွင် ၁၉၉၀ ခုနှစ်တွင် ရွေးကောက်ပွဲပြုလုပ်ပေးခဲ့သည် ။ ထို အချိန် ထိ တပ်မတော် ၏ လုပ်ဆောင်ချက်သည် တိုင်းပြည်အတွက် လိုအပ်ချက်ကြောင့် လုပ်ဆောင်ရသည်ဟု ဆိုသည်ကို လက်ခံနိုင်ဖွယ်ရှိနိုင်ခဲ့ပါသော်လည်း ၊ ထို့နောက်ပိုင်းတွင် လုပ်ဆောင်ခဲ့သည်များအတွက်မူ လက်ခံ နိုင်ဖွယ် လုံးဝမရှိ။ ၁၉၉၀ ရွေးကောက်ပွဲတွင် အနိုင်ရခဲ့သည့် ပြည်သူ့ကိုယ်စားလှယ်များကို ရွေးကောက် ပွဲ ရလာဒ်အား အသိအမှတ်ပြု၍ လွှတ်တော်ခေါ်ယူမပေးခဲ့ခြင်းသည် တပ်မတော်အစိုးရ၏ ကြီးမားလှသော အမှား ဖြစ်ပါသည် ။
ထိုနောက်ပိုင်းတွင် ထိုပြည်သူ့ကိုယ်စားလှယ်များကို ဖမ်းဆီးချုပ်နှောင်ထားလျက် ဖွဲ့စည်းပုံ အခြေခံဥပဒေ ရေးဆွဲရေးကို တပ်မတော်ကသာ အစစအရာရာ ကြိုးကိုင်ချယ်လှယ်ခဲ့ခြင်းသည် ဒုတိယ အမှားဖြစ်ပါသည် ။ ထိုဖွဲ့စည်းပုံအခြေခံဥပဒေကို ရေးဆွဲရန် အကြောင်းပြချက်ဖြင့် စစ်အုပ်ချုပ်ရေးကို ကာလရှည်လျားစွာ အချိန်ဆွဲထားခဲ့သည်မှာ တတိယအမှားဖြစ်ပါသည် ။ (ထိုအချိန်တွင် တပ်မတော်က မည်သည်ကို တည်ဆောက် နေခဲ့သည်ကိုလည်း ပြည်သူများသာမက ကမ္ဘာက အထင်အရှားမြင်ခဲ့ကြရပါ၏ ။) ထိုသို့ ထွက် ပေါ်လာသော ဖွဲ့စည်းပုံ အခြေခံဥပဒေမူကြမ်းကို ပြည်သူအား ရှင်းလင်းတင်ပြခြင်း ၊ ဆွေးနွေး ဝေဖန် ခွင့်ပြုခြင်းတို့မပြုခဲ့ပဲ (နာဂစ်မုန်တိုင်းကာလတွင်ပင် ) ပြည်သူကို အဓမ္မခေါ်ယူမဲဆန္ဒပေးစေလျက် အတည်ပြုခဲ့ခြင်းသည် စတုထ္ထ အမှား ဖြစ်ပါသည် ။
ဤသို့သောအကြောင်းတစ်ရားများအားဖြင့် စိစစ်သော် ၂၀၀၈ ဖွဲ့စည်းပုံ အခြေခံဥပဒေသည် အမှန်တရား တစ်ခုတစ်စုံအပေါ်တွင် အခြေခံ၍ ဖြစ်ထွန်း ပေါ်ပေါက်လာရသော လောကကြောင်း ၊ ဓမ္မကြောင်းတို့ဖြင့် ညီညွတ်၍ လောကပါလတရားများ အပေါ်တွင် အခြေခံတည်ဆောက်ခဲ့သော ဥပဒေတစ်ရပ်မဟုတ် ၊ လူတစ်စုတစ်ဖွဲ့၏ အတ္တကို အခြေခံ၍ ပေါ်ပေါက် စေခဲ့သော အဓမ္မတရားတစ်ခုသာဖြစ်သည် ဆိုသည်မှာ ငြင်းကွယ်ထိုက်သောအရာမဟုတ်ချေ ။
အပိုင်း (၃)
၂၀၀၈ ဖွဲ့စည်းပုံအခြေခံဥပဒေတွင်ထည့်သွင်းထားသည့် တပ်မတော်သည် အမျိုးသားနိုင်ငံရေးကို အစဉ်ဦးဆောင်နေမည် ဆိုသည့် အချက်သည် နိုင်ငံ၏ ငယ်ထိပ်ထက်တွင် စိုက်ဝင်နေသည့် စူးနက်နက် တစ်ချောင်းပင်ဖြစ်သည် ။ ထိုအချက်အားဖြင့် ပြည်ထောင်စုလွှတ်တော် ၊ ပြည်သူ့လွှတ်တော် ၊ အမျိုးသား လွှတ်တော် တို့တွင် ပြည်သူ တို့ က ရွေးကောက်တင်မြှောက်ထားခြင်းမဟုတ်သည့် အမိန့်ခံ တပ်မတော်သား များက ၀င်ချည် ထွက်ချည် လုပ်နေကြသည်မှာ ရွေးကောက်တင်မြှောက်ခံ ပြည်သူ့ကိုယ်စားလှယ်တို့ကို ပြက်ရယ်ပြုနေသကဲ့သို့ရှိသည် ။ ဤသည်မှာ တပ်မတော်သည် အမျိုးသားနိုင်ငံရေးကို ဦးဆောင်နေသည်လား တပ်မတော် ကာကွယ်ရေး ဦးစီးချုပ်သည် ပြည်သူတို့၏ အချုပ်အခြာ အာဏာကို ကိုင်ဆုပ်ထားသည်လား ဆိုသည်မှာ များစွာစောဒကတက်ဖွယ်ဖြစ်သည်။ တပ်မတော်က ကြွေးကြော်နေသည့် အမျိုးသား နိုင်ငံရေး ဆိုသည်ကို ပြည်သူများမျက်မြင်တွင် မြင်တွေ့နေရသည်မှာကား ပြည်သူတို့တစ်ဦးချင်းစီ၏ ဆန္ဒမဲများကို ကိုယ်စားပြု၍ လွှတ်တော်ထဲ ရောက်လာသော ပြည်သူကိုယ်စားလှယ် အပေါင်း အစုသည် တပ်မတော် ကာကွယ်ရေး ဦးစီးချုပ်၏ အမိန့်ခံ တပ်မတော်သား ကိုယ်စားလှယ်ဆိုသူများ၏ ထိမ်းချုပ်ခြင်း ကို ဥပဒေ တစ်ခုဖြင့် ခံနေကြရသည် ဆိုသည်ကိုသာဖြစ်ပေသည် ။
အပိုင်း(၄)
၂၀၀၈ဖွဲ့စည်းပုံ အခြေခံဥပဒေသည် မြန်မာနိုင်ငံရေးကို ရှေ့မတိုးသား နောက် မဆုတ်သာ ဖြစ်နေ စေသည့် အဟန့်အတားတစ်ရပ်သာဖြစ်ကြောင်း ၊ နိုင်ငံသားတို့၏ ရပိုင်ခွင့်များကို တပ်မတော်၏ လက်တွင်း တွင်သာ ဆုတ်ကိုင်ထားသေးသည့် ဥပဒေဖြစ်ကြောင်း မြန်မာ့နိုင်ငံရေး အင်အားစုများက အဆက် မပြတ် တွန်းတိုက်လျက်ရှိသည် ။ ထိုတွန်းတိုက်မှုကို ဆရာဖေမြင့်၏စကားကရည်ညွှန်းခဲ့သည် ။ ထိုတွန်းတိုက်မှုသည် အင်အားစုကြိးတစ်ခုအဖြစ်သို့ စုစည်းမိပြီး တိုင်းပြည်နှင့် အ၀န်းလူထုဆန္ဒ ဖော်ထုတ်ပွဲများဖြစ်လာနိုင်သည်ဟု ဆရာဖေမြင့်က နိမိတ်ပြစကားဆိုခဲ့သည် ။ ထိုသို့ပြည်သူ လူထုက လူထုအင်အားဖြင့်တောင်းဆိုလာလျှင် လက်နက်နှင့် အာဏာရှိသူက ယခင်စနစ် ဟောင်းဆီသို့ နောက်ကြောင်းပြန်သွားနိုင်သည်ဟု ဆရာကျော်ဝင်းက သတိပေးစကားဆိုခဲ့သည် ။ ထိုစကားနှစ်ခွန်းသည် ၂၀၁၄တွင် မြန်မာနိုင်ငံတွင်ပေါ်ပေါက်လာမည့် နိုင်ငံရေး စိန်ခေါ်မှု ဖွဲ့စည်းပုံ အခြေခံဥပဒေ အကြပ်အတည်းအတွက် စည်းနမိတ် အတိတ်တဘောင်ပင်လော ဟူသည် ကို ကောင်းစွာဆင်ခြင် သုံးသပ်ကြရပေ တော့မည် ။
ဤသို့ဖြစ်နိုင်ချေများကို ထုတ်ယူနိုင်ကြပြီဆိုလျှင် ဤသို့ ဖြစ်မလာစေရန် မည်သို့လုပ်ဆောင်ကြ မည်ဆိုသည်ကို နိုင်ငံ၏ အဓိကပုဂ္ဂိုလ်များအနေဖြင့် သတိကြီး စွာဖြင့် ကြိုတင်ပြင်ဆင် ဆောင်ရွက်သင့်ကြ သည်ဟု ဆိုချင်သည် ။ ပြည်သူတို့၏ လိုအင် ၊ ဒိမိုကရက်တစ်အင်အားစု များ၏ လိုအင်နှင့် သက်ဆိုင်ရာ အာဏာပိုင်တို့၏ လိုက်လျောနိုင်မှု၊ ဖြည့်ဆည်းနိုင်မှုတို့ကို အကြေအလည် တွေ့ဆုံညှိနိုင်းကြခြင်းသည် ထိုဖြစ် ပေါ်လာနိုင်သည့် ပြဿနာများကို ထိန်းချုပ်နိုင်သည့် အဖြေတစ်ခုဖြစ် မလာနိုင်ပါသလော ။ ထိုသို့ညှိနှိုင်း ဆွေးနွေးခြင်းအားဖြင့် ပြေလည်မှုကိုရခဲ့သည်ရှိသော တိုင်းပြည်တွင် မုန်တိုင်း မိုးသက်တို့ ကင်းစင်၍ လေပြည် နုအေးတို့ တိုက်ခတ်နိုင်လိမ့်မည်မဟုတ်ပါလော ၊ သို့မဟုတ်ပါပဲလျက် အာဏာကို လက်ဆုတ်မဖြေပဲ ငါတစ်ကော ကောကြလျင် မိမိတို့နိုင်ငံအား ကံဆိုးမသွားရာ အဆက်မပြတ် လိုက်ပါနေကြ သော မုန်တိုင်း မိုးသက် တို့သည် ဘယ်သော ဘယ်ခါ စဲနိုင်ပါမည်နည်း ။
ဤသို့လာခြင်းမကောင်းသော ဖွဲ့စည်းပုံအခြေခံဥပဒေကို လက်ရှိအကျိုးဖြစ်နိုင်မှုဖြင့် တွက်ဆကြည့်ပါ ကလည်း မည်သို့မျှ နိုင်ငံအကျိုးကို ရွက်ဆောင်နိုင်မည့် အခြေအနေတွင်မရှိကြောင်း ထင်ရှားပေါ်လွင် လှသည် ။ ဤဖွဲ့စည်းပုံအခြေခံဥပဒေ အားဖြင့် တိုင်းပြည်တွင် မည်သည့် ဦးတည်ချက်ကို ဖော်ဆောင် နိုင်ခဲ့ပြီနည်း ။ အမျိုး သား ပြန်လည်ရင်ကြားစေ့ရေးကို ဖော်ဆောင်နိုင်ခဲ့သလော ၊ တိုင်းရင်းသား စည်းလုံး ညီညွတ်မှုကို ပြန်လည်တည်ဆောက်နိုင်ခဲ့ပြီလော ၊ ပြည်တွင်းငြိမ်းချမ်းရေးကို ပြန်လည်ရှေ့ရှုနိုင်ပြီလော ။ ဤဥပဒေအားဖြင့် နိုင်ငံသားတို့၏ တန်းတူညီမျှရပိုင်ခွင့်များကို အာမခံနိုင်သလော ။ ဤအချက် များကိုမည်သို့မျှ မစွမ်းမဆောင် နိုင်သော ဖွဲ့စည်းပုံအခြေခံဥပဒေသည် လာခြင်းမရောင်း ၊ တည်ရှိခြင်း လည်းမကောင်းလျှင် ၊ အနာဂတ်လားရာ မည်သို့ဖြောင့်နိုင် ကောင်းမွန်နိုင်ပါအံ့နည်း ။ နိုင်ငံတော်၏ အခြေခံအုတ်မြစ်မည်သို့ဖြစ်နိုင်ပါအံ့နည်း ။ ဤသို့ သော အခြေခံအုတ်မြစ် အရွဲ့အစောင်းပေါ်တွင် တည်ဆောက် မည့်နိုင်ငံတော်သည် မည်သို့ တင့်တယ် လှပ ခိုင်ခန့်နိုင်ပါအံ့နည်း ။
အချို့အချို့သောသူများသည် ဤမျှ ယိုင်ရွဲ့တိမ်းစောင်းနေသည့် ဖွဲ့စည်းပုံအခြေခံဥပဒေကို မည်သူက မည်သည့်အမြှော်အမြင်ကြီးစွာဖြင့် မည်သို့မည်ပုံ ရေးဆွဲအတည်ပြုစေခဲ့သည် စသည်ဖြင့် မျက်စေ့ပိတ် နားပိတ် ပြောနေကြဆိုနေကြသည် ။ ဤစကားများသည် တိုင်းပြည်ကို ကောင်းစေလိုသည့်စိတ်ဆန္ဒမပါ ၊ မိမိတို့ အလိုဆန္ဒကိုသာ ရှေ့တန်းတင်၍ ငါ့စကားနွားရပြောနေကြသည်ဟူဆိုရပေလိမ့်မည် ။ ပြည်သူကို မခြိမ်း မချောက် ၊ မဟန့်မလှန့်ပဲ ဆန္ဒအမှန်ကိုတောင်းခံကြည့်ကြလျှင် မိမိတို့ပြောဆိုလုပ်ကိုင် နေမှုများ သည် ပြည်သူ့ လိုအင်ဆန္ဒနှင့် မည်မျှကင်းကွာခြားနားနေသည်ဆိုသည်ကို ကောင်းစွာ သိမြင်လာ နိုင်ပေလိမ့်မည် ။
ယခုကဲ့သို့ နိုင်ငံကို ပြန်လည်တည်ဆောက်နေချိန်တွင် ဤဖွဲ့စည်းပုံအခြေခံဥပဒေသည် နှစ်ပေါင်း များစွာ တည်တံ့ခိုင်မြဲစေရေးအတွက် အချိန်ယူ ရေးဆွဲခဲ့ခြင်း ဖြစ်သည် ဆိုသော အယူအဆများ အားဖြင့် နိုင်ငံကို နွံမနစ်စေသင့်တော့ပြီ ။ နှစ်ပေါင်းနှစ်ဆယ်ကျော် မှားယွင်း သော ဦးဆောင်မှု ၊ မှားယွင်းသော စီမံခန့်ခွဲ လုပ်ဆောင်မှုတို့သည် တိုင်းပြည်ကို အဘက်ဘက်မှ ယိုယွင်း နေစေခဲ့ပြီ ။ နိုင်ငံတွင် လက်တစ်ဆုပ်စာ မျှသောသူတို့မှ အပ နိုင်ငံသားတို့၏ အနာဂတ်သည် ပျက်ပြားနေခဲ့ပြီ ။ ကိုယ်က ကိတ်မုန့်ကို ရွှေမှုန့်ဖြူး၍ စားသောက် နေနိုင်သောအချိန်ကာလတွင် ပြည်သူတို့အတွက် ထမင်းအိုးများသည် မည်မျှခက်ခဲ နေပြီ ဆိုသည်ကို ကောင်းစွာသိသင့်ကြပေပြီ ။ သို့မဟုတ်ပါက ပြည်သူများ ၏ အုံကြွမှုကို မိမိတို့က တမင်ဖန်တီး ယူရာရောက်ပေလိမ့်မည် ။
ဇန်န၀ါရီလ ၁၈ ရက်နေ့က ရန်ကုန်မြို့တော်ဝင်နှင်းဆီခန်းမတွင် ၂၀၁၄ တွင်ဖြစ်ပေါ်လာနိုင်သော နိုင်ငံရေးအခင်းအကျင်းနှင့် စိန်ခေါ်မှုများ ခေါင်းစဉ်ဖြင့် စကားခြေတင်ပြောပွဲ (Debate)တစ်ခုကို ကျင်းပခဲ့ သည် ။ အမှန်တွင်ကား ခေါင်းစဉ်နှင့်လိုက်လျောညီထွေသည့် ပွဲတစ်ခုမဖြစ်ခဲ့ ။ သို့သော် ထိုပွဲမှ ထွက်ပေါ်လာသော အမြင်နှစ်ရပ်ကမူ ၂၀၁၄ ကို လှန့်နှိုးလိုက်သည့် အတွေးအမြင်အယူအဆ များဖြစ်ခဲ့သည် ။ ဆရာဖေမြင့်၏ ပြောစကားများထဲတွင် လူထုက ကိုယ့်ဆီကယူထားတဲ့ အာဏာကို ဟိုလူတွေ ဒီလူတွေသုံးနေတာကိုပဲ ထိုင်ငေးမနေပဲနဲ့ ငါတို့အာဏာက ဘယ်ဟာလဲ ဆိုတာကို ပြတ်ပြတ်သားသား ကြေညာဖို့လိုတယ် ၊ တောင်းဆိုဖို့လိုပါတယ် ဟု ထုတ်ဖော်ပြောဆိုသွားခဲ့သည် ။ ဤစကားအရ ဆိုပါလျှင် ပြည်သူလူထုသည် မိမိတို့ထံမှ အာဏာကို မိမိတို့ထံပြန်လည်ပေးအပ်ရန် တောင်းဆိုမှုများ ဆောင်ရွက်လာတော့မည်ဟူသည့် အဓိပ္ပါယ်ကိုဆောင်သည် ။ ဆရာကျော်ဝင်း၏ စကားတွင်မူ အစိုးရနှင့် အာဏာရပါတီတို့ချမှတ်ထားသော အခင်းအကျင်းကို ကျော်လွန်လုပ်ဆောင်ပါက အန္တရာယ်များကြောင်း ၊လွှတ်တော်တွင် အသာစီးရထားသည့် အာဏာရပါတီအနေဖြင့် ၂၀၀၈ ဖွဲ့စည်းပုံအခြေခံဥပဒေကို ပြင်ဆင်ပေးလာမည်ဖြစ် သော်လည်း ၊ ပြည်သူလူထုလက်ခံနိုင်လောက်သည့် ပြင်ဆင်မှုမျိုးဖြစ်မလာနိုင်သေးကြောင်း ၊ ထိုအခြေအနေ မျိုး တွင် လူထုအင်အား ၊ လူထုတိုက်ပွဲများဖြင့် ပြင်ဆင်ရန်ကြိုးစားပါက မြန်မာ့နိုင်ငံရေး နောက်ကြောင်း ပြန်လှည့်သွားနိုင်ကြောင်း ၊ မဟာဗျူဟာ နည်းဗျူဟာတွေနဲ့ပတ်သက်လာရင် အာဏာရှိသူတွေရဲ့ ဆုံးဖြတ်ချက် ကို အာဏာမဲသူက မီးစင်ကြည့် ကရမည်သာဖြစ်ကြောင်း တို့ဖြင့်ထုတ်ဖော်ပြောသွားခဲ့သည် ။ အရှေ့ကိုအတင်းတွန်းလျောက်ကြလျင် အနောက်ကိုပြန်လည်သွားရန် အခြေအနေရှိသည်ဟူသည့်သဘော ။
ဤဆရာနှစ်ဦး၏ စကားနှစ်ရပ်တွင် ဆရာဖေမြင့် ၏ သဘောထားသည် မြန်မာ့ ဒီမိုကရေစီ နိုင်ငံရေး အင်အားစု တို့ထံမှ ထွက်လာသော ပြည်သူ့အသံပေါ်လွင်၍ ၊ ဆရာကျော်ဝင်း၏ သဘောထားတွင် တပ်မတော် နှင့် အာဏာရအဖွဲ့အစည်း၏ အသံပေါ်လွင်သည် ဟူ၍ လည်းထင်မြင်မိသည် ။ ရှေးခေတ် ဟောင်းက နှစ်နိုင်ငံဘုရင်များ ဘုန်းလက်ရုံးတန်ခိုးအာဏာအတွက် ၊စစ်မတိုက်မီ နှလုံးရည် အားစမ်း ကြလျက် စစ်ဘုရင်ထိုး ကစားသည့် အသွင်ကိုလည်း ပေါ်လွင် စေခဲ့သယောင်ပင်။
No comments:
Post a Comment
မိမိတို့၏အမြင်များကို လွတ်လပ်ပွင့်လင်းစွာရေးသားနိုင်ပါသည်။
ဘမ်းမည်မဟုတ်ပါ။