ကူညီရာမဲ့ နိုင်ငံသားများနှင့် တာဝန်သိ တာဝန်ရှိ အစိုးရ

အခုတလော သတင်းစာမျက်နှာများတွင် မလေးရှားနိုင်ငံရောက် မြန်မာနိုင်ငံသားများ သတ်ဖြတ်ခံရသည့် သတင်းများ ဖတ်ရသည်။ အထူးသဖြင့် အင်တာနက် သတင်းစာမျက်နှာများပေါ်တွင် ပိုပြီး ဖတ်ရတွေ့ရ သည်။ တစ်ခါတွင်မူ မလေးရှားရောက် မြန်မာတစ်ဦးကို မလေးလူမျိုးဟု ယူဆရသူများက မသေမချင်း ဝိုင်းဝန်း ရိုက်နှက်နေသည့် ဗီဒီယိုဖိုင်ကိုပင် ကြည့်လိုက်ကြရသည်။ အမှန်တကယ်ပင် ကြေကွဲဖွယ်ကောင်း သည့် သတင်းများ ဖြစ်သည်။

သည်အဖြစ်အပျက်များအပေါ်မူတည်ကာ သက်ဆိုင်ရာ မိမိတို့မြန်မာအစိုးရ တာဝန်ရှိသူ တစ်ဦးက မြန်မာ့ ရုပ်သံမှ တစ်ဆင့် အစိုးရ၏အရေးယူဆောင်ရွက်လုပ်ကိုင်ပုံများကို သတင်းထောက်များကို ရှင်းလင်းသည်။

မြန်မာအစိုးရက မိမိနိုင်ငံသားများ အန္တရာယ် ကျရောက်နေချိန်၊ ဒုက္ခရောက်နေချိန်မှာ ယခုလို ကိုင်တွယ် ဖြေရှင်းပေးလာခြင်းသည် ယခင်ခေတ်ကာလများနှင့် မတူဘဲ တိုးတက်မှုရှိလာသည့် အချက်ကိုမူ အသိအမှတ်ပြု ကြိုဆိုပါသည်။

သို့သော်လည်း စိတ်ပူပန်မှုမြင့်တက်နေသည့် မြန်မာလူထုအဖို့ မလေးရှားရောက် မြန်မာများအရေး အစိုးရ၏ ဆောင်ရွက်လုပ်ကိုင်ပုံကို အပြည့်အဝအားရခြင်း မဖြစ်ကြပါ။ နဂိုကတည်းက ခေတ်အဆက်ဆက် ပြည်ပရောက် ကိုယ့်နိုင်ငံသားများအပေါ် အစိုးရတစ်ရပ်အနေဖြင့် တာဝန်ယူမှု၊ တာဝန်သိမှု နည်းပါး လွန်းခဲ့သည့် အတွေ့အကြုံများအရ ယခုလို အစိုးရ တာဝန်ရှိသူက မည်ကဲ့သို့ပင် ပြောဆိုရှင်းလင်းသည် ဖြစ်ပစေ၊ လူထုကတော့ ကျေနပ်အားရနိုင်ခြင်း ရာနှုန်းပြည့် မရှိနိုင်သည်မှာ သဘာဝကျပါသည်။

သူများအိမ် သူများနိုင်ငံအတွင်း လာရောက်နေထိုင် အလုပ်လုပ်ကိုင်သည်ဆိုသည်မှာလည်း ထိုအိမ်ရှင် နိုင်ငံသားများ မလုပ်ချင်သည့် အောက်ခြေသိမ်း အလုပ်များတွင်သာ ဝင်ရောက်လုပ်ကြရသဖြင့် ဘဝအခြေ အနေက မျက်နှာငယ်စရာဖြစ်သည်။ သည်ကြားထဲ အိမ်ရှင် နိုင်ငံသားများ၏ လူမျိုးခွဲခြားဆက်ဆံမှု ခံကြရဦးမည်ဆိုလျှင် ပိုပြီး ခံစားရမည် ဖြစ်သည်။

အိမ်ရှင်နိုင်ငံ၏ အောက်ခြေအာဏာပိုင် အဆင့်ဆင့်ကလည်း ဧည့်နိုင်ငံသား မြန်မာများအခုလို မတရား ပြုလုပ်ခံနေရသည့် ကိစ္စများအပေါ် ထိရောက်စွာ အရေးယူဆောင်ရွက်ခြင်း ကာကွယ်မှုပေးခြင်းများ အားနည်းနေခဲ့သည်ရှိသော် ကျွန်တော်တို့ မြန်မာနိုင်ငံသားများအဖို့ ပို၍ပို၍ စိတ်မချမ်းမြေ့ဖွယ် ဖြစ်ရ ပေတော့မည်။

မလေးရှားရောက်မြန်မာနိုင်ငံသားများ၊ အတိဒုက္ခနှင့် ရင်ဆိုင်ရပါက မိခင်တိုင်းပြည် ပြန်လိုသူများရှိပါက သက်ဆိုင်ရာသံရုံးများကို ဆက်သွယ် အကူအညီတောင်းခြင်း၊ လေယာဉ်ခ သက်သာအောင် စီစဉ်ပေးခြင်း ဆောင်ရွက်ပေးမည်ဟုလည်း အစိုးရပိုင်းမှ ကြားလာရသည်။ စဉ်းစားဖွယ်ဖြစ်သည်မှာ ယခုလို ပြည်ပ ရောက် မြန်မာနိုင်ငံသားများ ပြန်ခေါ်နိုင်ရေး နည်းလမ်း တစ်ခုတည်းဖြင့်တော့ ပြဿနာများမှာ ပြီးစီး ပပျောက် သွား နိုင်လိမ့်မည် မဟုတ်ပါ။

လုံခြုံရေးကိစ္စက ပထမဦးစားပေး အရေးကြီးသည်မှာ အမှန်ဖြစ်ပါသည်။ လုံခြုံရေးပြီးလျှင် အလုပ်အကိုင်က လည်း သူတို့၏ ဘဝအတွက်၊ သူတို့မိသားစုဘဝအတွက် အရေးကြီးနေခြင်းလည်း ဖြစ်သည်။ မိခင်နိုင်ငံတွင် အလုပ်အကိုင်အခွင့်အလမ်း ရှားပါးခြင်းကြောင့် တိုင်းတပါးမှာ အလုပ်သွားရောက်လုပ်ကိုင်နရသူ မြန်မာ နိုင်ငံသားတို့၏ လုံခြုံရေးသာမက အသက်မွေးဝမ်းကျောင်း ပြေလည်ရေးကိုလည်း ထည့်သွင်းစဉ်းစား သင့်ပါသည်။

ထိုသူများ ပြည်တော်ပြန်လာလျှင် မည်သည့်အလုပ်အကိုင်တွေ လုပ်ကိုင်ကြမည်နည်း။ ယင်းအလုပ်အကို တွေကို ဘယ်သူတွေက ဖန်တီးပေးကြမည်နည်း။ အမှန်စင်စစ် ပြည်ပရောက် မြန်မာများမှာ ကိုယ့်နိုင်ငံတွင် လုပ်ကိုင်စားသောက်ရန် အခြေအနေ မပေးတော့သဖြင့် ရေကြည်ရာမြက်နုရာ ရှာကြသူများသာဖြစ်ရာ နိုင်ငံသားတို့၏ အခွင့်အရေးများ ဆုံးရှုံးသွားစရာ အကြောင်းမရှိပါ။ မိမိနိုင်ငံသားဖြစ်သူ ပြည်ပရောက် လုပ်သားများ၏ လုံခြုံရေး၊ တရားမျှတရေးနှင့် လူ့အခွင့်အရေးများအတွက် မည်သည့်အစိုးရမဆို တာဝန်ရှိ မည်သာဖြစ်သည်။ တာဝန်ယူရမည်သာ ဖြစ်သည်။

လုံခြုံဘေးကင်းစွာ ပြန်တော်ပြန်ခေါ်ရေးသည် အရေးကြီးသကဲ့သို့ သူတို့၏ဘဝ၊ မိသားစုဘဝများ ရပ်တည် ရေး ကိုပါ ထည့်သွင်းစဉ်းစားဖို့လိုအပ်နေသည်ကိုလည်း စဉ်းစားထားဖို့လိုပါသည်။

ထို့ကြောင့် ပြည်ပရောက် မြန်မာနိုင်ငံသားများ လတ်တလော ရင်ဆိုင်ကြုံတွေ့နေရသည့် လုံခြုံမှုကင်းမဲ့မှု၊ မတရားအလုပ်ခံရမှု၊ အစရှိသည့် ပြဿနာများအတွက် အစိုးရတစ်ရပ်အနေဖြင့် အမြန်ဆုံးနှင့် အမှန်ကန် ဆုံး အရေးယူ ဆောင်ရွက်သင့်သည်။

Credit : http://www.mizzimaburmese.com/edop/editorial/12005-2013-06-12-23-56-34.html