ညအချိန် ဆောက်လုပ်ရေးလုပ်ငန်း ပြုလုပ်နေမှု များနှင့် ပတ်သက်၍တိုင်ကြားမှုအချို့တက်လာ ခြင်းကြောင့် ရန်ကုန်မြို့ရှိ ဆောက်လုပ်ရေး လုပ်ငန်းများ၏ လုပ်ငန်းလုပ်ချိန်ကို သတ်မှတ်ကာ ညအချိန် လုပ်ငန်းလုပ်ကိုင်ခြင်းကို ကန့်သတ်လိုက် ကြောင်း ရန်ကုန်မြို့တော် စည်ပင်သာယာရေး ကော်မတီ၊ အဆောက်အအုံဌာနမှ သိရသည်။
ညအချိန် ပြုလုပ်နေသည့် ဆောက်လုပ်ရေး လုပ်ငန်းများမှ အသံဆူညံခြင်းကြောင့် ညအိပ်၍ မရကြောင်းနှင့် အနှောင့်အယှက်ဖြစ်ကြောင်း အများ ပြည်သူများထံမှ တိုင်ကြားမှုအချို့ စည်ပင်သို့ ရောက်ရှိလာကြောင်း၊ ထို့အတွက်ဆောက်လုပ်ရေး လုပ်ငန်း များ၏ လုပ်ငန်းခွင်အား နံနက် ၇ နာရီမှ ညနေ ၆ နာရီအထိသာ လုပ်ကိုင်ရန် ဇွန်လကုန်ပိုင်းတွင် သတ်မှတ် ခဲ့ခြင်းဖြစ်ကြောင်း သိရသည်။
"ညအချိန်လုပ်နေတဲ့ ဆောက်လုပ်ရေး လုပ်ငန်းတွေရဲ့ အသံဆူညံမှုတွေကြောင့် အိပ်လို့မရဘူးလို့ Complain အချို့ တက်လာတယ်။ Complain တက်လာတဲ့အထဲမှာ အထူးသဖြင့်လူနေရပ် ကွက်တွေထဲမှာ ဆောက်နေတဲ့ ကန်ထရိုက်တိုက်တွေနဲ့ မြို့တွင်းက ဆောက်လုပ်ရေး လုပ်ငန်းတွေပါ ပါတယ်။ ဒါကြောင့် ဆောက်လုပ်ရေး လုပ်ငန်းတွေကို နေ့စဉ်နံနက် ၇ နာရီကနေ ညနေ ၆ နာရီအထိပဲ လုပ်ငန်းလုပ်ဖို့ သတ်မှတ်လိုက်ပါတယ်။ ညအချိန် လုံးဝအလုပ်လုပ်လို့ မရတော့ပါဘူး။ တကယ်လို့ ညအချိန်လုပ်မယ် ဆိုရင်လည်း အသံဆူညံမှုမရှိတဲ့ အပိုင်းတွေပဲ လုပ်လို့ရပါတယ်"ဟု ရန်ကုန်မြို့တော် စည်ပင်သာယာရေး ကော်မတီ၊ အဆောက်အအုံဌာနမှ တာဝန်ရှိသူ တစ်ဦးက ပြောခဲ့သည်။
ထိုကဲ့သို့ ဆောက်လုပ်ရေး လုပ်ငန်းများ၏ အလုပ်လုပ်ချိန် သတ်မှတ်ချက်ကို ရန်ကုန်မြို့တော် စည်ပင်သာ ယာရေး ကော်မတီသို့ ဆောက်လုပ်ခွင့် တင်ပြလာသည့် အဆောက်အအုံများ၏ ဆောက်လုပ်ခွင့် ပါမစ်တွင် တစ်ပါတည်း တံဆိပ်တုံးဖြင့် ရိုက်နှိပ်ပေးသည်ဟု သိရသည်။
"ဒီလို အလုပ်ချိန် ကန့်သတ်လိုက်တာ လုပ်ငန်းတွေကိုတော့ မထိခိုက်ပါဘူး။ ဘာဖြစ်လို့လဲဆိုတော့ အစ်ကိုတို့ ဆောက်လုပ်ရေး လုပ်ငန်းခွင်မှာ အလုပ်သမားတွေ နံနက် ၈ နာရီခွဲလောက်က နေညနေ ၄ နာရီခွဲ ၅ နာရီလောက်အထိပဲ လုပ်ကြတာပါ။ အခု စည်ပင်က သတ်မှတ်လိုက်တဲ့ လုပ်ငန်းခွင်
အချိန်က များတောင်များနေသေးတယ်။ ဒါပေမဲ့ အရမ်းအရေးကြီးလာတဲ့ဆောက်လုပ်ရေး လုပ်ငန်း ခွင်တွေ ရှိလာရင်၊ အလုပ်သမားတွေမှာလည်း ညဘက်လုပ်ချင်တဲ့သူတွေ ရှိလာမယ်ဆိုရင်တော့ ညဘက်လုပ်ခွင့်ကို ပြန်တင်ပြလို့ရရင် ကောင်းတာပေါ့" ဟု ရန်ကုန်မြို့ရှိ ဆောက်လုပ်ရေးလုပ်ငန်း လုပ်ကိုင်သူ တစ်ဦးက ပြောကြားခဲ့သည်။
အလုပ်လုပ်ချိန် ကန့်သတ်လိုက်သည့် ဆောက်လုပ်ရေး လုပ်ငန်းများတွင် နိုင်ငံတော် အစီအစဉ်ဖြင့် ပြုလုပ်နေသော တံတားစီမံကိန်းများ မပါဝင်ကြောင်း ရန်ကုန်မြို့တော် စည်ပင်သာယာရေး ကော်မတီ၊ အဆောက် အအုံဌာနမှ သိရသည်။
eleven media group
No comments:
Post a Comment
မိမိတို့၏အမြင်များကို လွတ်လပ်ပွင့်လင်းစွာရေးသားနိုင်ပါသည်။
ဘမ်းမည်မဟုတ်ပါ။