အလုပ်ရှင်နဲ့ အလုပ်သမားတွေအကြား ဖြစ်ပွားနေတဲ့ ပဋိပက္ခတွေရဲ့ အဓိကအကြောင်းရင်းတွေကို သိရှိဖို့ အတွက် လွှတ်တော်ကိုယ်စားလှယ်တွေ၊ အလုပ်သမားဝန်ကြီးဌာနနဲ့ ဥပဒေပညာရှင်တွေပါဝင်တဲ့ အလုပ်ရှင်၊ အလုပ်သမား အခွင့်အရေး လေ့လာရေးကော်မရှင်က စက်မှုဇုန် ၃ ခုကို မကြာခင် သတင်းပတ် အတွင်း လိုက်လံစစ်ဆေးဖို့ စီစဉ်နေတယ်လို့ သိရပါတယ်။
အလုပ်သမားဥပဒေမှာ ထည့်သွင်းရေးဆွဲနိုင်ဖို့အတွက် အလုပ်ရှင်နဲ့ အလုပ်သမားတွေရဲ့ကြားမှာ ပဋိပက္ခတွေဖြစ်နေရတဲ့ အခြေအနေတွေကို သွားရောက်လေ့လာပြီး ရရှိလာတဲ့အချက်တွေကို လာမယ့် ပြည်ထောင်စု လွှတ်တော်မှာ တင်ပြသွားမယ်လို့ အမျိုးသားလွှတ်တော်ကိုယ်စားလှယ် ဦးဖုန်းမြင့်အောင်က RFA ကို အခုလို ပြောပါတယ်။
"ကျနော်တို့နိုင်ငံမှာ အလုပ်ရှင်၊ အလုပ်သမား ပဋိပက္ခတွေများလာတယ်၊ အဲလို ပဋိပက္ခတွေများမယ်ဆိုရင် ကျနော်တို့နိုင်ငံရဲ့ စက်ရုံအလုပ်ရုံလုပ်ငန်းတွေ၊ ပြဌာန်းထားတဲ့ နိုင်ငံခြားရင်းနှီးမြှုပ်နှံမှု ဥပဒေတွေ၊ ၂ဝ၁၅ နောက်ပိုင်းမှာဖြစ်ပေါ်လာမယ့် ကျနော်တို့နိုင်ငံရဲ့ဈေးကွက်ဟာ ပဋိပက္ခတွေရှိရင် သူများဈေးကွက် ဖြစ်သွားမှာတွေအတွက် ကြိုပြီးကာကွယ်တဲ့အနေနဲ့ အလုပ်ရှင် အလုပ်သမားတွေ အခွင့်အရေးရရှိရေး၊ ပဋိပက္ခတွေမဖြစ်ရေးအတွက် ရည်ရွယ်ပါတယ်၊ ဖြစ်ပေါ်တဲ့အကြောင်းပေါ် မူတည်ပြီးတော့ ဒီဟာကို ဘယ်လိုဖြေရှင်းသင့်တယ်ဆိုတာကိုပေါ့"
ဒီကော်မရှင်ကို ပြီးခဲ့တဲ့ မေလ၂၀ ရက်နေ့က အထူးအစည်းအဝေးတစ်ရပ်အနေနဲ့ ကျင်းပခဲ့တဲ့ ပြည်ထောင်စုလွှတ်တော် အစည်းအဝေးမှာ အတည်ပြုဖွဲ့စည်းခဲ့တာဖြစ်ပြီး ကော်မရှင် ဥက္ကဌအဖြစ် အမျိုးသားလွှတ်တော် ဒုဥက္ကဌ ဦးမြတ်ငြိမ်းက ဆောင်ရွက်မှာဖြစ်တယ်လို့ သိရပါတယ်။
လက်ရှိမှာတော့ စက်မှုဇုန်တွေကို စစ်ဆေးနိုင်ဖို့ အဲဒီအဖွဲ့ဝင်တွေကြား အသေးစိတ် ဆွေးနွေး နေကြဆဲ ဖြစ်ပြီး ရွှေပြည်သာစက်မှုဇုန် က စက်ရုံ ၁၅ ရုံ၊ လှိုင်သာယာစက်မှုဇုန်က စက်ရုံ ၂၅ ရုံနဲ့ တောင်ဒဂုံ စက်မှုဇုန်က စက်ရုံ ၁၀ ရုံတို့ကို စက်မှုလုပ်ငန်းအမျိုးအစား မခွဲခြားပဲ စစ်ဆေးမှာဖြစ်တယ်လို့ သိရပါတယ်။
Credit : http://www.rfa.org/burmese/news/commission-investigate-industries-zone-05282013132836.html
No comments:
Post a Comment
မိမိတို့၏အမြင်များကို လွတ်လပ်ပွင့်လင်းစွာရေးသားနိုင်ပါသည်။
ဘမ်းမည်မဟုတ်ပါ။