ရှမ်းပြည်နယ် တာချီလိတ်မြို့၌ လောင်းကစားမှုဖြင့် ထိုင်းနိုင်ငံသား ၆ ဦးကို ယမန်နေ့က မြန်မာ အာဏာပိုင်များက ဖမ်းဆီး ထားကြောင်း ထိုင်း သတင်း များတွင် ဖော်ပြထားသည်။
ထိုင်း-မြန်မာ နယ်စပ် မယ်ဆိုင်မြို့ တဖက်ကမ်း တာချီလိတ်မြို့ အတွင်းရှိ လတ်စ်ဗီးဂတ်စ် ဟိုတယ် တွင် တရားမ၀င် ဖွင့်လှစ် ထားသည့် ကာစီနို လောင်းကစားဝိုင်းကို မြန်မာနိုင်ငံ မူးယစ်ဆေးဝါး တိုက်ဖျက်ရေး အဖွဲ့က ရှောင်တခင် စစ်ဆေးခဲ့ရာ ထိုင်း နိုင်ငံသား ၆ ဦး အဖမ်းခံရခြင်း ဖြစ်ကြောင်း ထိုင်းရတ် အင်တာနက် စာမျက်နှာတွင် ဖေဖော်ဝါရီ ၁၆ရက်က ဖော်ပြ ထား သည်။
အမျိုးသား ၁၀ ဦးနှင့် အမျိုးသမီး ၉ ဦး အဖမ်းခံထားရပြီး ယင်း ဖမ်းဆီး ခံရသူများထဲတွင် ထိုင်းနိုင်ငံသား ၆ ဦး ပါဝင်ကြောင်း သတင်းတွင် ပါရှိသည်။
လတ်တလော ဖမ်းဆီးခံထားရသူများ အားလုံးကို မြန်မာ အာဏာပိုင်များက အာမခံ ပေးထားကြောင်း၊ သို့သော် ထိုင်းနိုင်ငံသားများကို ထိုင်း နိုင်ငံထဲကို ပေးမပြန်သေးဘဲ ဖေဖော်ဝါရီ ၁၇ ရက် နံနက် ၉ နာရီတွင် တရားရုံး၌ အားလုံးကို စစ်ဆေးရန် ချိန်းဆိုထားကြောင်းလည်း အဆိုပါ သတင်းတွင် ရေးသားထားသည်။
ထိုင်း သတင်းဖော်ပြချက် အရ ထိုင်း နိုင်ငံသားများသည် ပြစ်မှုထင်ရှားပါက မြန်မာနိုင်ငံတွင် ထောင်ဒဏ် ၁ နှစ် နှင့် ၆ လခန့် ကျခံရနိုင်ဖွယ် ရှိကြောင်း သိရသည်။
မြန်မာ အစိုးရနှင့် နီးစပ်သူ တဦးက အဖမ်းခံထားရသူ အားလုံးကို ဟိုတယ် ပိုင်ရှင်က အာမခံ ပေးထား သည်ဟု ကြားသိရကြောင်း ဧရာဝတီသို့ ပြောသည်။
ဝင်ရောက် ဖမ်းဆီးမှုနှင့် ပတ်သက်ပြီး အသေးစိတ် မသိရှိရသော်လည်း ဟိုတယ် ပိုင်ရှင်မှာ ဦးစိုင်းကျော် ဖြစ်ပြီး ယခင် ထောက်လှမ်းရေး ခေတ်တွင် ဦးခင်ညွန့်၏ သတင်းပေး ဖြစ်သည်ဟုလည်း ၎င်းက ဆိုသည်။
“နိုင်ငံခြားသား ရင်းနှီးမြှုပ်နှံမှု အနေနဲ့ ဟိုတယ်တွေကို ဘန်းပြပြီး ကာစီနို လောင်းကစားရုံတွေ နားလည်မှုနဲ့ ဖွင့်နေတာကို အစိုးရက ခွင့်မပြုသင့်ဘူးလို့ ထင်တယ်”ဟု ၎င်းက ဆက်ပြောသည်။
တာချီလိတ်မြို့သည် ကာစီနို လောင်းကစားရုံ အပေါများဆုံးမြို့ ဖြစ်ပြီး အာဏာပိုင်များက ၀င်ရောက် ဖမ်းဆီးခြင်း မရှိကြောင်း၊ လောင်းကစားရုံ တခုကို လစဉ်ကြေး တလလျှင် ဘတ်ငွေ သိန်းချီပေးဆောင်၍ ဖွင့်လှစ် နေကြကြောင်း သိရသည်။
“ရပ်ကွက်တိုင်း လိုလိုမှာ လောင်းကစား ဂိမ်းခုံတွေလဲ အင်မတန် များပြားပြီး လူငယ်တချို့ အကျင့်စာရိတ္တ ပျက်ပြားလာ ကြ တယ်”ဟု မြန်မာ အစိုးရနှင့် နီးစပ်သူက ဆိုသည်။
တာချီလိတ်မြို့သည် မယ်ဆိုင်မြို့ တဖက်ကမ်းတွင် တည်ရှိပြီး စစ်တပ်၊ ရဲ၊ လူဝင်မှု ကြီးကြပ်ရေး (လ၀က) အကောက်ခွန်၊ ငြိမ်းချမ်းရေး ယူထားသည့် အဖွဲ့ဝင်များ၊ မူးယစ်ဆေးဝါး ရောင်းဝယ် လုပ်ကိုင်နေသူများ ကျင်လည် ကျက်စားနေသော မြို့တမြို့လည်း ဖြစ်သည်။
No comments:
Post a Comment
မိမိတို့၏အမြင်များကို လွတ်လပ်ပွင့်လင်းစွာရေးသားနိုင်ပါသည်။
ဘမ်းမည်မဟုတ်ပါ။