နှလုံးသားမဲ့မြေပေါ်က ရိုးရိုးသားသားရွှေ

နာမည်ကြီး ဂျာနယ်တစ်စောင်က ရေးတဲ့သတင်း တစ်ခုကိုဖတ်ပြီး စိတ်မကောင်းဖြစ်မိတယ်။

မြန်မာပြည်မှာမွေး မြန်မာပြည်ကကျွေး ၊ မြန်မာရေ သောက်ပြီး မြန်မာပြည်ကို စော်ကားတာတော့ အရမ်းလွန်တယ်။

မင်းတို့ မြန်မာရော ဟုတ်လား .... ပြန်စဉ်းစား။

“ ၁၉၆၉ ခုနှစ်နောက်ပိုင်း ပထမဆုံးအကြိမ် အိမ်ရှင်အဖြစ် ပြန်လည်ကျင်းပခွင့် ရခဲ့သည့် မြန်မာနိုင်ငံ အနေဖြင့် သမိုင်းတစ်လျှောက်တွင် တစ်ကြိမ် တစ်ခါမျှ ပါဝင်ခြင်း မရှိခဲ့ဖူးသော ရိုးရာခြင်းလုံး အားကစားနည်းမှ ရွှေတံဆိပ် ခြောက်ဆု ရရှိရန်လည်း မျှော်မှန်းထားသည်။ ”

“ မြန်မာနိုင်ငံက အိမ်ရှင်အဖြစ် လက်ခံကျင်းပမည့် (၂၇) ကြိမ်မြောက် ဆီးဂိမ်းစ်ပြိုင်ပွဲကို မြန်မာ့ရိုးရာ ခြင်းလုံးအားကစားနည်းဖြင့် စတင်မည် ဖြစ်သည့်အပြင် ဆုတံဆိပ်များရရန် အလားအလာရှိသော ပိုက်ကျော်ခြင်း အားကစားနည်းမှာ ပြိုင်ပွဲပိတ်ပွဲတွင် ပြုလုပ်ရန် စီစဉ်ထားသည်ကို ပွဲစဉ်ဇယားများအရ သိရသည်။ ”

သတင်းပါပဲ။ ဒါပေမယ့် ဘာကြောင့် ဒီလိုရေးတာလဲ။ ရွှေရနိုင်တဲ့ အားသာမှုအရ ရိုးရာအားကစားနည်းကို ထည့်သွင်းတာဟာ အဆိုးလား အပြစ်လား။ အိမ်ရှင်နိုင်ငံတိုင်း ကိုယ့်နိုင်ငံရွှေရအောင် ကြိုးစားတာ အပြစ်လား။ ဒါ ညစ်တာလား။ အပိုင်လုပ်တာလား။

တရားမမျှတလို့လား။ မြန်မာ့ရိုးရာခြင်းဟာ အဆင့်နိမ့်အားကစားလား။ ခက်ခဲနက်နဲတဲ့ ပညာရပ် မဟုတ်ဘူးလား။ ဒီလိုထည့်သွင်းလို့ တခြားနိုင်ငံက ယှဉ်ပြိုင်ချင်လို့ လေ့လာလိုက်စားရင် ဒီအားကစားနိုင်ငံတကာမပြန့်နိုင်ဘူးလား။ ဒါ အဆိုးလား။ နိုင်ငံတိုင်း နိုင်ငံတိုင်းဟာ သူတို့အားသာတဲ့ ရိုးရာအားကစားကိုထည့်သွင်းကျင်းပစမြဲပါ။

ဘောလုံးဟာ ဘယ်သူတွေရဲ့ရိုးရာအားကစားလဲ။ ပိုက်ကျော်ခြင်း ဘယ်သူ့ဟာလဲ။ ပြေးခုန်ပစ် ဘယ်သူ့ မူပိုင်လဲ။ ဘိလိယက်၊ စစ်တုရင် အားလုံဟာ ရိုးရာအားကစားအဆင့်ကနေ ကမ္ဘာကိုပြန့်ပြီး အိုလံပစ်အားကစားအနေနဲ့ နိုင်ငံတကာက လက်ခံလာတာပဲ မဟုတ်လား။

သရော်သလို ရွှေရဖို့ ပြင်ဆင်ထားမှုကို ခနိုးခနဲ့ အစွန်းမလွတ်တလွတ် ရေးရအောင် မြန်မာတွေ ရွှေရနိုင်တဲ့အားကစားမှာ ရွှေရအောင် ကြိုးစားတာ အပြစ်လား။ မရနိုင်တဲ့ဟာကို ကျွန်တော်တို့ မမျှော်မှန်း ပါဘူး။ မရရအောင်ညစ်ပြီး လုပ်ရင်လည်း ကန့်ကွက်ရှုံ့ချမှာပါပဲ။ ဒါပေမယ့် တရားသဖြင့် ကြိုးစားတာမျိုး ဘာဖြစ်လို့အားမပေးရမှာလဲ။

မနေ့က ရွှေနှစ်ခုရတယ်။ ရိုးရာခြင်းနဲ့။ ညစ်ပြီးပြိုင်ခဲ့လား။ ဒိုင်ဘက်လိုက်လား။ ရှင်းရှင်းလေးဗျာ။ ညစ်တယ်ထင်ရင် တခြားနိုင်ငံတွေဝင်မပြိုင်နဲ့ပေါ့။ တခြားရိုးရာအားကစားတွေရောမပါလို့လား။ ထည့်သွင်းမကျင်းပလို့လား။ ထိုင်း၊ အင်ဒို၊ မလေး၊ ဗီယက်နမ် စတဲ့နိုင်ငံအားလုံးအခုပြိုင်နေတဲ့အထဲ သူတို့ ရိုးရာအားကစားတွေမပါဘူးလား။

မြန်မာ့ခြင်းဟာ ဂုဏ်ငယ်တယ်ထင်ကြလားဗျ။ ဒါ ဘယ်နိုင်ငံမှ မခတ်တတ်တဲ့အဆင့်မြင့်ပညာ။ ဒီပညာ ကမ္ဘာကတောင်ငေးရတာ။ အားကစားတစ်ခုအနေနဲ့မပြန့်နှံ့သင့်ဘူးလား။ ကိုယ့်အားသာချက်ကို တရားနည်းလမ်းတကျအသုံးချတာ လက်ခုပ်မတီးသင့််ဘူးလား။ နောက်ဆုံးဗျာ။ ဘယ်သူ့မှ မလုပ်နိုင်တဲ့အားကစား ကျွန်တော်တို့မြန်မာလုပ်နိုင်တယ် ရွှေရတယ်။ဘာဖြစ်လဲ။ ကျွန်တော်တို့ အားပေးတယ်။ လက်ခုပ်တီးတယ်။

အိမ်ရှင်ဖြစ်လို့ ရွှေရမယ့်ဟာကို နှစ်ပေါင်းများစွာအတွင်းမထည့်သွင်းခဲ့ဘဲ အခုမှ ထည့်ပြီး ခြောက်ခုရအောင် ယူတယ်ဆိုပါတော့ ဘာဖြစ်လဲဗျာ။ တကယ်လို့ ဘောလုံးမှာ ရှုံးမယ်ဆိုပါတော့ ။ မညစ်နဲ့ ရှုံးပစေ။ မနိုင်ရင် သရေနဲ့အရှုံးပေါ့။ လက်ခံတယ်။ မညစ်နဲ့ ။ လူမချနဲ့ ။ ပွဲမဆူစေနဲ့ ။ ဂုဏ်သိက္ခာရှိပါစေ။ လှလှပပရှုံးပြလိုက်။ ဘာဖြစ်လဲ။ အားလုံးနိုင်ချင်လို့ရမလားဗျ။

မနိုင်နိုင်တာကို တမင်ညစ်ပြီးနိုင်အောင် တခြားနိုင်ငံတွေ မလုပ်ခဲ့ကြဘူးလား။ ကျင်းပပြိးခဲ့တဲ့ဆီးဂိမ်းတွေမှာ မညစ်ခဲ့ကြဘူးလား။ ဘောလုံး သူတို့နိုင်နိုင်တဲ့ဘောလုံး မညစ်ခဲ့ကြဘူးလား။

မနေ့ကရွှေရတော့ ပျော်နေတဲ့ မြန်မာအမျိုးသားအဖွဲ့၊ အမျိုးသမီးအဖွဲ့ ခင်ဗျားတို့ သူတို့မျက်နှာကိုသေချာ ကြည့်ဖူးလား။ ကြည့်လိုက်လား။ ဘယ်လောက်ပျော်နေကြလဲ။ ဘာလို့ အရောင်ဆိုးချင်ကြလဲဗျာ။ ပျော်ပါစေ။ ခင်ဗျားမပျော်ဘူးလား။ မပျော်နဲ့ရတယ်။ ဒါခင်ဗျားလွတ်လပ်ခွင့်ပါ။ ဒါပေမယ့် မြန်မာ ဘယ်အားကစားကရွှေရရ ကျွန်တော်မြန်မာဗျ။ ကျေနပ်တယ်။ဂုဏ်ယူတယ်။ တစ်ခုပဲရရ နှစ်ခုပဲရရ။ တကယ် ရသင့်တဲ့ အားကစားကနေ ရရင် မညစ်ဘဲရရင် ရိုးရိုးသားသားယှဉ်ပြိုင်ပြီးရရင် ကျေနပ်တယ်။

ဒီအတောအတွင်း မြန်မာခြင်းလုံးရလို့ ရွှေရလို့ရေးကြတာကို သရောသလို လှောင်သလိုပြောကြတာတွေ မြင်ရတာထက် ဒီလို မီဒီယာတစ်ခုက ဒီလို မထိတထိအစွန်းမလွတ်တလွတ် သရော်သလို ရေးတာကို ပိုရင်နာတယ်။

တကယ်ဆို အားပေးရမှာပါဗျာ။ မြန်မာဟာ အစိုးရကြောင့်ဖြစ်ဖြစ်၊ စနစ်ကြောင့်ဖြစ်ဖြစ် မျက်နှာငယ်ခဲ့ရတယ်။ ပျော်ပါစေ။ ပျော်ကြပါစေ။ ကိုယ်ပိုင်ရိုးရာအားကစားတစ်ခု အောင်မြင်ပြန့်နှံ့ပြီး နိုင်ငံတကာအဆင့်အားကစားတစ်ခုဖြစ်လာခဲ့ရင် ဒါပိုဂုဏ်ရှိတာမဟုတ်လားဗျာ။

အခုအားလုံး နှစ်သက်တဲ့ အားပေးနေကြတဲ့ အောင်မြင်နေတဲ့ အားကစားတွေအားလုံး ရိုးရာပဲဗျ။ နိုင်ငံတစ်ခုချင်းဆီက မွေးထုတ်လိုက်တဲ့အားကစား။

ရိုးရာခြင်းလုံးသမားတွေ အခုမှ နိုင်ငံတကာအဆင့်ပြိုင်ပွဲမှာ လူလုံးပြခွင့်ရတာ ။ ဖြစ်နိုင်ရင် ကျွန်တော်သူတို့ကို ကွင်းထဲသွားပြီး အားရပါးရလက်ဆွဲနှုတ်ဆတ်ချင်တယ်။ ဘာဖြစ်လို့လဲဆို အောင်စိုးမိုးတို့ဆို ကြာပြီ မြန်မာနိုင်ငံအနှံ့ လိုက်ခတ်နေတဲ့ ခြင်းသမားတွေ။ အခုမှ သူတို့တွေ နိုင်ငံတကာအလယ်မှာ ခင်ဗျားတို့ဗျာ ---- ဘာနဲ့ရွှေရရ နိုင်ငံတော်သီချင်းကို ဖွင့်ပြီး ကိုယ့်နိုင်ငံအလံ တခြားနိုင်ငံအလံတွေအထက်မှာ တလူလူလွင့်တာကို ခင်ဗျားတို့မို့ နှလုံးသားမပါဘဲ နေတတ်တယ်။

တီးစမ်းပါဗျာ။ လက်ခုပ်ကို နာနာလေး။ ပျော်ကြစမ်း အစ်ကိုတို့အစ်မတို့။ ငိုပစ်လိုက် ။ အားရပါးရငိုပစ်လိုက်။ ကွင်းတင်ပတ်မပြေးနဲ့ အပြင်ထွက် မြန်မာနိုင်ငံကိုပတ်ပြေး။ ကမ္ဘာကိုပတ်ပြေး။

ပျော်ပစ်လိုက် ---- မြန်မာ ရိုးရာခြင်းနဲ့ သန့်သန့်စင်စင်ရတဲ့ ရွှေ ---- နှလုံးသားမပါတဲ့ လူတွေ အတွက်တော့ မြွေ -------- ။

( နက္ခတ်နီ )

Credit : Zinmin Htut