/*FB*/
/*FB*/
ကြွရောက်လာသူအပေါင်း ကိုယ်စိတ်နှစ်ဖြာ ကျမ်းမာချမ်းသာကြပါစေ

Thursday, May 22, 2014

.

မြန်မာနိုင်ငံရေး အနာဂတ်ကို ဘယ်သူပုံခုံးထမ်းမှာလဲ

မြန်မာနိုင်ငံရေးတွင် ပြည်သူချစ်သော၊ ဉဏ်ပညာဖြင့် ပြည့်စုံသော ခေါင်းဆောင် ဘယ်နှစ်ဦး ရှိပါသလဲ။ ရေတွက်ကြည့်ပါ။ တစ်ဦးပြီးတစ်ဦး လက်ချိုးရေတွက်ကြည့်ပါက လက်ငါးချောင်း မပြည့်သည်ကို တွေ့ရပေလိမ့်မည်။


သို့ဆိုလျှင် စစ်ဘောင်းဘီချွတ်ပုဂ္ဂိုလ်များ အာဏာဆက်လက်ဆုပ်ကိုင်ထားသော အနေအထားရ အတိုက် အခံကို အားကိုးကြသော်လည်း အရံသင့်ခေါင်းဆောင် လုံလောက်မှု မရှိသဖြင့် ပြည်သူတွေရဲ့ အနာဂတ် မှာ စိုးရိမ်ဖွယ် ဖြစ်နေပါပြီ။ ပြည်သူချစ်သော အတိုက်အခံခေါင်းဆောင်များရဲ့ အသက်များကိုချတွက်ကြည့် သောအခါ တိုင်းပြည်အတွက် အမှန်တကယ် အလုပ်လုပ်နိုင်သောအချိန်မှာ လေးငါးနှစ်ထက် မပိုတော့ ပေ။

“အန်အယ်ဒီအတွက် အကြီးအမားဆုံး အားနည်းချက်က ဒီနှစ်နှစ်ဆယ်ကျော်အတွင်း လူငယ်ခေါင်းဆောင် တွေ မမွေးထုတ်နိုင်ခဲ့တာပဲ” ဟု မြန်မာနိုင်ငံတွင် ပြည်သူ လူထုထောက်ခံမှု အများဆုံးရထားသည့် ပါတီ ဖြစ်သော အမျိုးသားဒီမိုကရေစီ အဖွဲ့ချုပ်ရဲ့ နာယကတစ်ဦးဖြစ်တဲ့ ကွယ်လွန်သူ သတင်းစာဆရာ ဟံသာ ၀တီ ဦးဝင်းတင်မှ ၀န်ခံခဲ့ဖူးသည်။

နှစ်နှစ်ဆယ်ကျော် မျိုးဆက်ပြတ်တောက်ခဲ့ရသဖြင့် လူငယ်ကို ခေါင်းဆောင်အဖြစ် မွေးထုတ်မည်ဟု လှည့် ပတ် ရှာဖွေကြည့်ပါ လွန်စွာရှားပါးနေလေပြီ။ ၁၉၈၈ ခုနှစ် တစ်နိုင်လုံးဒီမိုကရေစီ တောင်းဆို၊ လမ်းပေါ် ထွက် ဆန္ဒထုတ်ဖော်ခဲ့သည့် အရေးတော်ပုံကြီးနောက်ပိုင်း ပါဝင်ခဲ့သည့် ကျောင်းသားများ သောင်းနဲ့ချီ ထောင်သွင်း အကျဉ်းကျခံရ၊ နယ်ခြားကို ထွက်ပြေးရ၊ တောတွင်း လက်နက်ကိုင်များအဖြစ် ခိုလူံသွားကြ နှင့် မြန်မာ့နိုင်ငံရေး အနာဂတ်အတွက် ကျောင်းပုရ၀ုဏ်မှ ထွက်ပေါ်လာမည့် ပညာတတ် အနာဂတ်ခေါင်း ဆောင်များ ပျောက်ဆုံးသွားခဲ့ရသည်။

ထိုကာလများအလွန်တွင် ကျောင်းသား လူငယ်များ၏နှုတ်မှ “ကျောင်းတွင်း၌ နိုင်ငံရေး” ဆိုသည့် စကား လုံးတစ်လုံး ပြောဆိုခဲ့လျှင်ပင် တာဝန်ရှိဆရာဆရာမများ၊ ပါမောက္ခများက ကျောင်းထုတ်ပစ်သည် အထိ ပြစ်ဒဏ်ပေးခဲ့တာကြောင့် နိုင်ငံရေး လုပ်ဆောင်ရန်၊ နိုင်ငံ့ခေါင်းဆောင် လုပ်ဆောင်ရန်မှာ ကျောင်းသား များအတွက် အိပ်မက်သဖွယ် ဖြစ်သွားခဲ့ရသည်။

လတ်တလော လှုပ်ရှားဆဲဖြစ်သည့် ပြည်တွင်းနိုင်ငံရေး ပါတီခေါင်းဆောင် အများစုကို မေးမြန်းသည့်အခါ အနာဂတ်တွင် သူတို့၏ပါတီများကို ပခုံးလွှဲပြောင်းယူမည့် ခေါင်းဆောင်များ အရံသင့်မရှိပါဟု ၀မ်းနည်းစွာ ၀န်ခံကြသည်။

ရခိုင်အမျိုးသားပါတီမှ ယာယီပထမ ဥက္ကဋ္ဌ ဦးအေးသာအောင်က “အနာဂတ် ခေါင်းဆောင်နေရာအတွက် စိုးရိမ်ပူပန်နေရပြီ။ ဒီအတွက် ကြိုးစားနေတယ်။ မွေးထုတ်မယ်ဆိုတော့လည်း ထက်မြက်တဲ့သူ ရှားတယ်။ စိတ်ဓာတ်တွေက မ၀ံ့ကြဘူး။ ၀ံ့ပြန်တော့လည်း ပညာရေးက နိမ့်ကျလွန်းတယ်” ဟု တိုးတိုးညင်သာ ပြောသည်။

အတိုက်အခံ ခေါင်းဆောင်သစ်များ ထွက်ပေါ်လာရန် လက်ရှိ အတိုက်အခံ ခေါင်းဆောင်များ ကြိုးပမ်းကြ ပါသလား “အရံခေါင်းဆောင်များ မွေးထုတ်ထားပြီးလား” ဆိုသည့်မေးခွန်းကို လက်ရှိအတိုက်အခံ ခေါင်း ဆောင်များကို မေးခွန်းထုတ်ဖို့ လိုပါလိမ့်မည်။

အသက် ၂၀ ခန့်၊ မြန်မာနိုင်ငံလူငယ်များ အစည်းအရုံးမှ ဥက္ကဋ္ဌ ကိုဇွဲရန်နိုင်က “ကျွန်တော်တို့မှာ လက်ရှိ ပြည်သူ ထောက်ခံတဲ့ ခေါင်းဆောင်တွေရှိတယ်။ ဒါပေမဲ့ တတိယအရွယ်ကို ရောက်နေကြပြီ။ လူငယ် တွေ ရှေ့ဆက် တာဝန်ယူရတော့မယ်။ အဲဒီတော့ လူငယ်တွေ ဖြတ်သန်းလာရတဲ့ ခေတ်တွေ၊ စနစ်တွေ ကို အပြစ်မတင်ချင်ဘူး။ ကိုယ်တိုင် စွမ်းရည်မြင့်ဖို့ကို ကြိုးစားရမယ်လို့ မြင်တယ်၊ နိုင်ငံရေးသမားကောင်း တစ်ယောက်ဖြစ်ဖို့ ကျင့်ဝတ်တွေ၊ သမိုင်းကြောင်းတွေ နားလည်အောင် လုပ်မယ်ဆိုရင် ကျွန်တော့်တစ်ဦး တည်းအမြင်နဲ့ နောက်လာမယ့်ငါးနှစ်မှာ အရံခေါင်းဆောင်လုပ်ဖို့ ကျွန်တော်တို့က အသင့်ရှိနေပါပြီ” ဟု တွက်ချက်ပြောဆိုသည်။

မြန်မာနိုင်ငံရေးမှာ လက်ရှိကျောင်းပုရ၀ုဏ်အတွင်း လှုပ်ရှားနေကြသည့် တက္ကသိုလ်ကျောင်းသားများ သမဂ္ဂ၊ ဗမာနိုင်ငံလုံးဆိုင်ရာ ကျောင်းသားများသမဂ္ဂမှ နိုင်ငံရေး အကျဉ်းသားဟောင်းများဖြစ်သည့် ကျောင်း သားခေါင်းဆောင်များမှာ ကျောင်းတွင်း စည်းရုံးရေးပြုလုပ်ရာမှာ အဟန့်အတား များစွာရှိနေဆဲ၊ နိုင်ငံရေး စကားလုံးပင်မဆိုနှင့် ကျောင်းသားအရေး တောင်းဆိုမည်ဆိုလျှင်ပင် ပိတ်ပင်မှုများစွာရှိနေဆဲဟု ပြောဆို ကြသည်။

သို့တိုင်အောင် ဒေါ်အောင်ဆန်းစုကြည် ကတော့ “လူငယ်တွေ နိုင်ငံရေးလုပ်ကြပါ။ကျောင်းသားတွေ အား လုံးက နိုင်ငံရေးလုပ်ဖို့ သက်ဆိုင်တယ်” ဟု ပါတီစည်းရုံးရေးဆင်းသည့် မိန့်ခွန်းများ၊ လူငယ်များအား ပြော ဆိုသည့် မိန့်ခွန်းများတွင် တိုက်တွန်း ပြောဆိုနေသည်။

အတိုက်အခံတို့တွင် မျိုးဆက်မွေးထုတ်ရမည့် တာဝန်တစ်ရပ်မှာ ပြဿနာတစ်ရပ်သဖွယ် ရင်ဆိုင်နေရသော် လည်း တစ်ဖက်ယှဉ်ပြိုင်ဘက်မှာမူ အနာဂတ်ကာလများကို ရင်ဆိုင်ရန်အရံသင့်ရှိနေပြီ ဖြစ်သည်။အတိုက် အခံအားလုံးတို့၏ ပြိုင်ဘက်စစ်တပ်အရာရှိကြီးများ ဦးဆောင်မှုအောက် ငွေကြေးအဆက်အသွယ် တောင့် တင်းမှုရှိသည့် အသင်းအဖွဲ့ (သို့) ပါတီဖြစ်သည့် “ကြံ့ခိုင်ရေး” မှာ စစ်သဘောသဘာဝ၏ အခြေခံအရ အစီအစဉ်များ စနစ်တကျ ရေးဆွဲလုပ်ဆောင်တတ်သောကြောင့် အနာဂတ်အတွက် အရံလူငယ် ပညာ တတ် ခေါင်းဆောင်များအသင့် မွေးထုတ်ပြီး ရှိမရှိ ဟူသည်မှာ သံသယရှိစရာ မလိုတော့ပေ။

လူထုထောက်ခံမှု အများဆုံးရရှိထားသည့် အမျိုးသားဒီမိုကရေစီအဖွဲ့ချုပ်မှာ လူငယ်ညီလာခံလုပ်ဆောင် နေဆဲပင်။ နောင်အနာဂတ်တွင် လူငယ်များကို နေရာပေးသွားမည်ကိုလည်း ဥက္ကဋ္ဌ ဒေါ်အောင်ဆန်းစု ကြည်က လူထုနှင့်တွေ့ဆုံသည့် မိန့်ခွန်းများတွင် အလေးအနက် ပြောဆိုခဲ့သည်။

မြန်မာ့နိုင်ငံရေး မှတ်တိုင်တစ်ခု ဖြစ်သည့် ၂၀၀၇ ခုနှစ် ရွှေဝါရောင်သံယာ အရေးအခင်းလူပ်ရှားမှုတွင် လူ ငယ်ခေါင်းဆောင်အချို့ ပေါ်ပေါက်ခဲ့ပါသည်။ သို့သော် နှစ်ပေါင်းများစွာ “နိုင်ငံရေး” ဟူသည့် အသုံးအနှုန်း ကို ပြောဆိုရန် အခွင့်မပေးခဲ့သည့် ပညာရေးစနစ်အောက်တွင် ကြီးပြင်းခဲ့သည့် မျိုးဆက်ဖြစ်နေသဖြင့် ရင့် ကျက်သော နိုင်ငံရေးသမားအဖြစ် ၀မ်းစာပြည့်ဝမှု မရှိကြပေ။

ပြည်သူလူထုတို့၏ ဆင်းရဲဒုက္ခများ ပေါ်အခြေခံကာ ဖြစ်ပေါ်ခဲ့သည့် သံဃာ့ အရေးခင်းဖြစ်ပွားခဲ့သည့် ၂၀၀၇ ခုနှစ်နှင့် ပြုပြင်ပြောင်းလဲရေး သမ္မတသစ် တက်လာသည့်ကာလ ၂၀၁၂ ခုနှစ်ကြားမှ နိုင်ငံရေး လောကတွင်းသို့ရောက်လာသည့် လူငယ်များမှာ ခေါင်းဆောင်အဖြစ်ရပ်တည်ရန် အသင့်မရှိသေးကြောင်း နိုင်ငံရေး သုတေသီများက သုံးသပ်ကြသကဲ့သို့ နိုင်ငံရေးဟူသည် ရင့်ကျက်မှုရရန် ဆယ်စုနှစ်တစ်ခု အချိန် ယူရပေလိမ့်မည်ဟုလည်း ပြည်တွင်းပါတီ ခေါင်းဆောင်များက ပြောကြသည်။

သို့ဆိုလျှင် မြန်မာ့နိုင်ငံရေးတွင် အရံသင့်ရှိရမည့် အတိုက်အခံအရံ ခေါင်းဆောင်မှာ ပြည်သူများရှေ့သို့ ထွက်ပေါ်လာနိုင်ရန် အချိန်မည်မျှ ကြာပေဦးမည်လဲ။ ရှမ်းတိုင်းရင်းသား ဒီမိုကရေစီအဖွဲ့ချုပ် မှ ဥက္ကဋ္ဌ ဦးခွန် ထွန်းဦးက “ပုံမှန်အတိုင်း ပြောရရင် အရံခေါင်းဆောင်ဆိုတာ မရှိသေးဘူး။ အနာဂတ်အတွက် အတော် လေး ရင်လေးစရာပဲ။ မျိုးဆက်တွေက ပညာရေးစနစ် ဆိုးအောက်မှာ ရေးစာဖတ်စာပဲ တတ်ကြတယ်။ လူကြီးတွေက အသက်အရွယ်ကြောင့် လွှဲပေးမယ်ဆိုရင်တောင် လူမရှိဘူး ခက်နေတယ်။ ဒီကြားထဲ အပြောင်းအလဲကောင်းတွေ ရှိလာမယ်ဆိုရင်တော့ နောက်လေးနှစ်လောက်မှာ ထွက်ပေါ်လာနိုင်တာပေါ့” ဟု သုံးသပ် ပြောဆိုသည်။

ထို့ပြင် မျိုးဆက်ပြဿနာဟု ထောက်ပြရမည့် အချက်တစ်ချက် ရှိနေသည်။ နိုင်ငံတကာတွင် အသက် ၁၈ နှစ်မှ ၂၈ နှစ် အတွင်းသည် လူငယ်နိုင်ငံရေး မျိုးဆက်များဟု သတ်မှတ်ထားသော်လည်း မြန်မာနိုင်ငံတွင်း အင် အားကြီးပါတီများဖြစ်သည့် တိုင်းရင်းသားစည်းလုံးညီညွှတ်ရေးပါတီ တွင် လူငယ်အား အသက် ၃၀ အထိ သတ်မှတ်ထားသည်။ အမျိုးသား ဒီမိုကရေစီ အဖွဲ့မှာ ၃၅ နှစ်ထိ လူငယ်စာရင်း သတ်မှတ်ထားပြန်သည်။ ထိုသတ်မှတ်ချက်များမှာ လူငယ်မျိုးဆက် ပြတ်လပ်မှုကို ဖော်ပြနေခြင်း ဖြစ်သည်။

လက်ရှိတွင် လူထုအားကိုးသော ခေါင်းဆောင်အချို့ ရှိနေပါလျက် အနာဂတ် ခေါင်းဆောင်ကို ဘာကြောင့် မျှော်ရမည်လဲဟူသည့် အဖြေမှာတော့ ရှင်းပါသည်။

မြန်မာ့နိုင်ငံအရေး လေ့လာကာ မြန်မာပြည်တွင်း လာရောက်နေထိုင်နေသူ နိုင်ငံရေး သိပ္ပံပညာရှင် ချက်စ် နိုင်ငံသား Igor Blazvic ဆိုသကဲ့သို့ မြန်မာနိုင်ငံသည် စစ်အာဏာရှင်မှ စတင်အသွင်ပြောင်းသည့် အနေ အထားဖြင့် ပြောင်းလဲလာပြီး ယခုအချိန်မှာ စစ်အာဏာရှင်တစ်ပိုင်း၊ ပြုပြင် ပြောင်းလဲရေးတစ်ပိုင်း ကပြား အစိုးရအသွင်သာ ရှိသေးသည်။ ထိုအခြေအနေကို ပြုပြင်ပြောင်းလဲမှုများစွာ လုပ်ဆောင်ရန် ပြည်သူဘက် မှ အမာခံရပ်တည်မည့် အတိုက်အခံခေါင်းဆောင် များစွာလိုပါသည်။

လွန်ခဲ့သည့် နှစ်နှစ်ဆယ်ကျော် ကာလများဆီက အတိုက်အခံလုပ်၊ ပြည်ပြေးခဲ့ကြကာ ပြည်ပရောက် နိုင်ငံ တကာတက္ကသိုလ် ကျောင်းဆင်းလာသည့် ဥာဏ်ကြီးရှင်တို့မှာ ဘလည်းကပြားအစိုးရကို ယုံကြည်ကာ လက်တွဲနေပြီ ဖြစ်သည်။ ထိုသည်မှာလည်း အတိုက်အခံများအတွက် စိုးရိမ်စရာပင် ဖြစ်သည်။

ပြည်သူအများက ချစ်ခင်လေးစားကာ မျှော်လင့်စောင့်စားနေသည့် လူထုခေါင်းဆောင် ဒေါ်အောင်ဆန်းစု ကြည်မှာ ကံကောင်း ထောက်မစွာဖြင့် ၂၀၁၅ ရွေးကောက်ပွဲ၊ အသက် ၇၀ တွင် သမ္မတဖြစ်ခဲ့သည်ရှိသော် နောက်ထပ်ငါးနှစ် အုပ်ချုပ်ပြီးနောက် သူမလို ပညာအရ၊ စဉ်းစားတွေးခေါ်ပုံအရ၊ နိုင်ငံရေးရေချိန်မြင့်သော အတိုက်အခံခေါင်းဆောင် အရံသင့်ရှိမရှိဆိုသည်မှာ တန်ခိုးရှင်သာလျှင် သိတော့မည်။ တာဝန်အလုံးစုံကို မည်သူက ပုခုံးပြောင်းယူတော့မည်ကို မသိနိုင်ပေ။ မြန်မာနိုင်ငံရဲ့ အနာဂတ်က မှန်းဆရခက်နေပြီ ဖြစ် သည်။

Mizzima

No comments:

Post a Comment

မိမိတို့၏အမြင်များကို လွတ်လပ်ပွင့်လင်းစွာရေးသားနိုင်ပါသည်။
ဘမ်းမည်မဟုတ်ပါ။