/*FB*/
/*FB*/
ကြွရောက်လာသူအပေါင်း ကိုယ်စိတ်နှစ်ဖြာ ကျမ်းမာချမ်းသာကြပါစေ

Wednesday, January 22, 2014

.

ဒုက္ခသည်များအား အကြောင်းပြကာ KIA မှ ဆက်ကြေးကောက်



ကချင်ပြည်နယ် မန်စီမြို့နယ် မန်ဝိန်းကြီး ကျေးရွာ အပါအ၀င် ရှမ်းရွာ(၁၅)ရွာအား ဒုက္ခသည်များအား ကူညီ ထောက်ပံ့ရန်ဟု အကြောင်းပြကာ ကချင် လွတ်လပ်ရေးတပ်မတော် (KIA) အဖွဲ့မှ ဇန်န၀ါရီ ၁၅ ရက်နေ့မှ စပြီး ဆက်ကြေးငွေများ ကောက်ခံ ထားကြောင်း ယင်းဒေသခံအချို့ထံမှ သိရသည်။


``တစ်အိမ်ထောင်ကို သုံးသောင်းပေးရမယ်လို့ ပြော တယ်။ ဒုက္ခသည်တွေကို ကူညီထောက်ပံ့ဖို့ KIA က တောင်းတာလို့ ရွာလူကြီးက ပြောပါတယ်။ ဒီလ ၁၅ ရက်နေ့ကစပြီး တောင်းနေတာပါ´´ ဟု မန်ဝိန်းကြီးရွာသား ကို အိုက်ယုံက ပြောသည်။

KIA အဖွဲ့မှ အဆိုပါ ကျေးရွာ(၁၅)ရွာမှ အုပ်ချုပ်ရေးမှူးများအား ဇန်န၀ါရီ ၉ ရက်နေ့တွင် ခေါ်ယူတွေ့ဆုံပြီး မန်စီမြို့နယ် နန့်လင်းပါကျေးရွာဘက်မှ ထွက်ပြေးလာသည့် ဒုက္ခသည်များအား ကူညီထောက်ပံ့ရန်အတွက် အိမ်ထောင်စုတစ်စုလျှင် ငွေ သုံးသောင်ကျပ် ထောက်ခံပေးရန်နှင့် အုပ်ချုပ်ရေးမှူးများ ကိုယ်တိုင် လာရောက် ပေးသွင်းရန် ပြောကြားခဲ့ကြောင်း သိရသည်။

``အချို့ရွာတွေကတော့ သွားပြီးသွင်းနေတယ်လို့ကြားတယ်။ တစ်အိမ် သုံးသောင်းဆိုတော့ အချို့မိသားစု တွေက မတတ်နိုင်ဘူး၊ ကိုယ့်မိသားစုစားဖို့တောင် မနည်းရုန်းကန်နေရတာ၊ ဒုက္ခသည်တွေကို ထောက်ပံ့ ချင်ပါတယ်။ ဒါပေမယ့် KIA က ကျွန်တော်တို့ကို အမိန့်နဲ့ တောင်းတာဆိုတော့ ကြောက်ပြီး ပေးရတဲ့ သဘော ဖြစ်နေတယ်။ ဒုက္ခသည်တွေအတွက်ဆိုပြီး ခေါင်းစဉ်ပြတာပါ။ သူတို့ KIA အဖွဲ့အတွက်ပဲ ဖြစ်မှာ ပါ´´ ဟု ပန်ခမ်းရွာသားတစ်ဦးက ပြောကြားသွားသည်။

KIA အနေဖြင့် ဒေသခံရှမ်းလူမျိုးများထံမှ နှစ်စဉ် ဆက်ကြေးအဖြစ် အိမ်ထောင်စုတစ်စုလျှင် ဆန် တစ်တင်းခွဲ နှုန်း၊ လယ်/ယာမြေတစ်ဧကလျှင် တရုတ်ယွမ် ၁၅၀၀ နှုန်းအား ဇန်န၀ါရီ ပထမပတ်မှစ၍ ကောက်ခံလျက်ရှိ ကြောင်း မန်ဝိန်းကြီးရွာမှ ဒေါ်နန်းမူ၏ ပြောပြချက်အရ သိရသည်။

``အခု KIA က ဒုက္ခသည်တွေကို ထောက်ပံ့ပေးဖို့ဆိုပြီး ငွေ သုံးသောင်း ကောက်တယ်။ အဲဒီတောင်းတဲ့ငွေ ပေးဖို့ ဒီမန်ဝိန်းကြီးကနေ နောင်တောင်းကို ကြံတွေ သွားရောင်းတယ်။ ပန်ခမ်းဂိတ်မှာ ကြံကားတစ်စီးကို ယွမ် (၇၀)နှုန်းနဲ့ KIA က ဂိတ်ကြေးကောက်နေတယ်။ KIA က ခေါင်းစဉ်အမျိုးမျိုးပြပြီး ကျွန်တော်တို့ ဒေသခံရှမ်းတွေ ဆီက ဆက်ကြေးတွေကောက်နေတာပါ´´ ဟု ကြံစိုက်တောင်သူ ကိုစိုင်းကလည်း ပြောကြား သွားခဲ့သည်။

cradit to : နော်မိုင်

No comments:

Post a Comment

မိမိတို့၏အမြင်များကို လွတ်လပ်ပွင့်လင်းစွာရေးသားနိုင်ပါသည်။
ဘမ်းမည်မဟုတ်ပါ။