"လူတိုင်းက ကမ္ဘာကြီးကို ကယ်တင်လိုကြတယ်။ ဒါပေမဲ့ အမေပန်းကန်ဆေးနေတာကို ၀ိုင်းမဆေး ပေးကြဘူး"တဲ့။
ငယ်ငယ်တုန်းက စာအုပ်ထဲမှာ ရေးမှတ်ခဲ့ဖူးတဲ့ "အနောက်တိုင်းစကားပုံ"တစ်ခုပါ။ လူတိုင်းမှာ ကြီးကျယ်ခန်းနားတဲ့ အိပ်မက်တွေ ရှိကြစမြဲပါ။ နိုင်ငံတစ်ခု သို့မဟုတ် တိုင်းပြည်တစ်ပြည်မှာလည်း ခမ်းနားထည်ဝါတဲ့ အိပ်မက်တွေ၊ စိတ်ကူးတွေ ဆိုတာ မလွဲမသွေရှိနေကြတာပါ။ အဲဒီအိပ်မက်တွေ၊ စိတ်ကူးတွေကို နိုင်ငံသားတိုင်းက မက်ကြတယ်။ စိတ်ကူးတွေယဉ်ကြတယ်။ ဖြစ်လာတာတွေလည်း ရှိတယ်။ ထင်သလိုဖြစ်မလာတွေလည်း ရှိတယ်။ လုံးဝဖြစ်မလာသေး တာတွေလည်း ရှိတယ်။
ကျွန်တော်တို့ နိုင်ငံကို တိုးတက်စေချင်ကြတယ်။ တခြားနိုင်ငံတွေနဲ့ယှဉ်ရင် မျက်နှာမငယ်ချင်ကြဘူး။ နောက်ဆုံး ကမ္ဘာ့အလယ်မှာ မြန်မာဆိုတဲ့အထိ တိုးတက်ချင်တယ်။ ကျယ်ပြန့်ချင်တယ်။ ဒါတွေက သင်စရာမလို၊ ပြောစရာမလို အားလုံးရဲ့ စိတ်ကူးအိပ်မက်တွေပါပဲ။ ယနေ့လိုအချိန်မျိုးမှာ အိမ်နီးချင်း နိုင်ငံတွေ၊ အနောက်နိုင်ငံတွေရဲ့ တိုးတက်မှုမြန်နှုန်းကို မြန်မာနိုင်ငံသားတွေက မြင်နေ၊ ကြားနေရတော့ အဲဒီအိပ်မက်တွေ၊ စိတ်ကူးတွေကို အမြန်ဆုံးပြည့်ချင်နေကြတယ်။
အဲဒီစိတ်ကူးအိပ်မက်တွေကို အစိုးရက အပြည့်အ၀ဖန်တီးပေးနိုင်ချင်မှ ပေးနိုင်လိမ့်မယ်။ အရမ်းကြီး အားကိုးလို့မရနိုင်ဘူး။ ကျွန်တော်တို့ကိုယ်တိုင်လည်း နိုင်ငံသားကောင်းတစ်ယောက်ရဲ့ စွမ်းဆောင်ရည်မျိုး ရှိထားရမယ်။ တချို့တချို့သော စိတ်ကူးအိပ်မက်တွေ ပြည့်စုံဖို့ ကျွန်တော်တို့နိုင်ငံသားတွေကိုယ်တိုင် လိုက်နာရမယ့် ကျင့်ဝတ်တွေရှိပါတယ်။ သင်ယူရမယ့် ပညာရပ်တွေရှိတယ်။ အတုယူအားကျရမယ့် နည်းစနစ်တွေရှိတယ်။ ပြုပြင်ပြောင်းလဲရမယ့် မူဝါဒတွေ၊ နည်းဥပဒေတွေရှိတယ်။ ပြုပြင်ပြောင်းလဲမှု ဖြစ်စဉ်တွေထဲမှာ ကျွန်တော်တို့နိုင်ငံသားတွေကိုယ်တိုင် မပါမဖြစ် ပါရမှာပါပဲ။
"တည်ငြိမ်အောင်ထိန်းထားတဲ့ ကမ္ဘာကြီး ပြောင်းလဲသွားခဲ့လျှင် မငိုကြွေးပါနဲ့။ ပြောင်းလဲမှုကင်းမဲ့နေသော အနေအထားများကသာ တကယ်ငိုရဖို့အကြောင်းပဲ"ဆိုသော အဆိုအမိန့်တစ်ခုကို သတိပြုသင့်ပါတယ်"။
ကျွန်တော်တို့အားလုံး ပြောင်းလဲချင်၊ တိုးတက်ချင်တဲ့သူတွေပါပဲ။ ပြောင်းလဲချင်၊ တိုးတက်ချင်ရင်" ကိုယ်ကိုယ်တိုင်"အရင်ပြောင်းလဲရမှာပါ။
အရင်အတိုင်း၊ အကျင့်ဟောင်းတွေအတိုင်း နေလို့မရပါဘူး။ ကျွန်တော်တို့အားလုံးကို
"ပြောင်းလဲပေးပါ" လို့လည်း မည်သည့်တန်ခိုးရှင်ကိုမျှ ဆုတောင်းနေလို့မရပါဘူး။ ကျွန်တော်တို့ကိုယ်တိုင် စတင် ပြောင်းလဲနိုင်မှသာ ကျွန်တော်တို့လိုချင်တဲ့ အပြောင်းအလဲဆိုတာကို မြင်တွေ့ရမှာပါ။ ကျွန်တော်တို့ မပြောင်းလဲ နိုင်သေးသရွေ့ အပြောင်းအလဲဆိုတာ အဝေးကြီးမှာပဲ ရှိနေဦးမှာပါ။
ကိုယ်ကိုယ်တိုင် ပြောင်းလဲရမယ်ဆိုတဲ့ စကားထဲမှာ"ကိုယ်"ဆိုတာ တိုင်းပြည်ကို အုပ်ချုပ်နေတဲ့ ခေါင်းဆောင်တွေ၊ အစိုးရတွေလည်း ပါတယ်။ အုပ်ချုပ်ခံနိုင်ငံသားတွေလည်း ပါတယ်။ သူ့နေရာနဲ့သူ ပါနေကြတာဆိုတော့ ပြောင်းလဲမှုရေစီးကြောင်းထဲ အားလုံးဟာ မပါမဖြစ်ပါဘဲ။ ဒါပေမဲ့ ပြောင်းလဲမှုက "မှန်ကန်တဲ့"ပြောင်းလဲမှုဖြစ်ဖို့တော့ လိုတယ်။ စစ်မှန်တိုးတက်တဲ့ ပြောင်းလဲမှုဖြစ်ဖို့ လိုတယ်ဆိုတာကို သတိပြုရမှာပါ။
ကျွန်တော်တို့နိုင်ငံသားတွေဆီမှာ ဖြစ်ချင်တာတွေ အများကြီးပါပဲ။ တောင်းဆိုနေကြတာတွေကလည်း အများကြီး။ စိတ်ကူးအိပ်မက်တွေလည်း တစ်ပုံတစ်အောကြီး။ ကမ္ဘာကြီးကို ကယ်တင်လိုတဲ့စိတ်မျိုးတောင် ရှိကြမှာပါပဲ။ ဒါပေမဲ့ ဖာထေးရမယ့်အရာတွေ၊ ပြုပြင်နေထိုင်ရမယ့် အရာတွေ၊ အတုယူရမယ့် နည်းစနစ်တွေရှိနေတယ်။ အဲဒီအရာတွေက မီးဖိုချောင်ထဲမှာ ပန်းကန်ဆေးနေတဲ့အမေ့ကို ထိုင်ကြည့်နေတဲ့ သားသမီးနဲ့တူနေတယ်။ အမေ့ကို မပင်ပန်းစေချင်ဘူးဆိုရင် အမေ့ပန်းကန်ကိုဝိုင်းပြီး ဆေးပေးလိုက်ခြင်း ကသာ မှန်ကန်တဲ့လုပ်ရပ်ဖြစ်မှာပါပဲ။
ကျွန်တော်တို့ နိုင်ငံရေးဖြစ်တည်မှု သဘောတရားကလည်း အဲဒီဥပမာလိုပါပဲ။ တချို့သော အပြောင်း အလဲတွေကို ကျွန်တော်တို့ကိုယ်တိုင် ပါဝင်ပြောင်းလဲပေးဖို့ပါပဲ။ အစိုးရကိုယ်တိုင်လည်း သိသာထင်ရှားစွာ ပြောင်းလဲမှုတွေလုပ်ဖို့လိုသလို ကျွန်တော်တို့ကိုယ်တိုင်ကလည်း အပြောင်းအလဲမှာ ပါဝင်ဖို့နဲ့ အပြောင်း အလဲနဲ့ လျော်ညီစွာနေတတ်ဖို့လည်း လိုပါတယ်။ ဘယ်သူမှ မပြောင်းလဲကြဘူးဆိုရင် ကျွန်တော် တို့ရဲ့ ခမ်းနားတဲ့ အိပ်မက်တွေနဲ့ ဝေးနေကြရဦးမှာပါ။
နိုင်ငံရေးအပြောင်းအလဲတွေနဲ့ ကျွန်တော်တို့ရဲ့ မြန်မာနိုင်ငံဟာ စစ်အစိုးရအုပ်ချုပ်တဲ့ နိုင်ငံကနေ အရပ်သား အုပ်ချုပ်တဲ့ ဒီမိုကရေစီနိုင်ငံအဖြစ် သက်တမ်းနှစ်နှစ်ကျော်ခဲ့ပါပြီ။ ဒီမိုကရေစီကို ကျင့်သုံးချင်၊ ရချင်ပြီဆိုရင် ကိုယ့်ဘက်ကလည်း ဒီမိုကရေစီစံနှုန်းနဲ့ညီအောင် ပြုပြင်နေထိုင်ကြရပါမယ်။ သူ့အခွင့်အရေး၊ ကိုယ့်အခွင့်အရေး၊ အများသူငါအခွင့်အရေးတွေကို ကွဲကွဲပြားပြားနားလည်ကြရပါမယ်။ ဒီမိုကရေစီနဲ့ ထိုက်တန်အောင် ကိုယ့်ဘက်က နိုင်ငံသားကောင်းတစ်ယောက် အမြဲပီသဖို့လိုပါတယ်။
ကျွန်တော်တို့နိုင်ငံမှာ ယိုယွင်းနေတဲ့ စိတ်ဓာတ်တွေ ရှိနေသေးတယ်။ ဖာထေးပြုပြင်ရမယ့် ကျင့်ဝတ်တွေ ရှိတယ်။ နိုင်ငံသားကောင်းတစ်ယောက် မပီသနိုင်သေးတဲ့ အမူအကျင့်တွေ လူတချို့မှာ ရှိနေသေးတယ်။ အဲဒီအရာတွေကို ကျွန်တော်တို့အားလုံး ပြုပြင်ကြရမှာပါ။ စည်းကမ်းမဲ့နေတာတွေကလည်း အမြစ်မပြတ် သေးဘူး။ ပြုပြင်ပြောင်းလဲရမှာတွေလည်း ရှိနေသေးတယ်ဆိုတာပါပဲ။
တိုးတက်ပြောင်းလဲနေတဲ့ နိုင်ငံတွေရဲ့ အမူအကျင့်တွေ၊ စံနှုန်းတွေ၊ ကြိုးစားမှုတွေ၊ စည်းကမ်းကောင်းရှိမှု တွေကိုလည်း လေ့လာသင့်၊ အတုယူသင့်တယ်။ အဲဒီအရာတွေအတွက်လည်း ပြုပြင်ပြောင်းလဲကြရမှာပဲ။ အဲဒီအရာတွေအားလုံးကို ကျွန်တော်တို့ စနစ်တကျ ပြုပြင်ပြောင်းလဲကြမယ်ဆိုရင် ပြုပြင်သင့်တာ ပြုပြင်ကြမယ်ဆိုရင် လိုက်နာသင့်တာ လိုက်နာကြမယ်ဆိုရင် အတုယူသင့်တာ အတုယူကြမယ်ဆိုရင် ကျွန်တော်တို့နိုင်ငံရဲ့ ရွှေအိပ်မက်ကြီးဟာ အမှန်တကယ် အစစ်အမှန်လက်တွေ့ကျတဲ့ အခြေအနေကြီး ဆီကို ရောက်လာမှာပါ။ ရွှေအိပ်မက်တွေ မပျက်စေချင်ပါဘူး။ အမေ့ပန်းကန်ကိုလည်း ကူဆေးကြရပါမယ်။ အိပ်မက်တွေ အကောင်အထည်ပေါ်နိုင်အောင်လည်း ကြိုးစားကြရပါမယ်။ တကယ်ဖြစ်နိုင်တဲ့ အိပ်မက်တွေ ကျွန်တော်တို့နိုင်ငံသားတွေဆီမှာ ရှိနေတယ်ဆိုတာ မမေ့စေချင်ပါဘူး။
Credit : (ဆောင်းပါးရှင် - ညီအောင်ညီ)
No comments:
Post a Comment
မိမိတို့၏အမြင်များကို လွတ်လပ်ပွင့်လင်းစွာရေးသားနိုင်ပါသည်။
ဘမ်းမည်မဟုတ်ပါ။