“ဒီနေရာမှာရပ်နေမှာမဟုတ်ဘူး” (ကိုမွန်းအောင်နဲ့ စကားပြောကြည့်ခြင်း)

အဆိုတော် မွန်းအောင်ဟာ ၁၉၈၁-၈၂ ကစပြီး ခေတ်ပေါ်တေးလောကမှာ ထင်ရှားတဲ့ အဆိုတော် တယောက် ဖြစ်လာပြီး ၁၉၈၈ စစ်အာဏာ သိမ်း ပြီးနောက် သူရဲ့ အောင်မြင်ကျော်ကြားမှုတွေကို စွန့်လွှတ်ကာ ကျောင်းသားတပ်မတော်ထဲ ၀င် ရောက်ခဲ့သူ ဖြစ်တယ်။ ပြည်တွင်းမှာ သူ့ တကိုယ်တော်သီချင်းခွေ ၄ ခွေ၊ ပြည်ပမှာ ၂ ခွေ ထုတ်ဝေဖြန်ချိခဲ့တယ်။ ပြီး ခဲ့တဲ့ မေလ တလလုံး အပတ်စဉ်စနေနေ့တိုင်း (တတိယအပတ်မှလွဲပြီး) နော်ဝေးနိုင်ငံ အော်စလိုမြို့ ပါလီမန် အဆောက် အဦ ရှေ့မှာ အဆိုတော် ကိုမွန်းအောင်နဲ့ သူ့မိတ်ဆွေတွေဟာ မြန်မာ့နိုင်ငံရေးအဖြစ်မှန်ကို နော်ဝေးပြည်သူများ သိရှိရေးနဲ့ သမ္မတ ဦးသိန်းစိန်ကို ၂၀၁၃ ခု နိုဘယ်လ်ဆုအတွက် အမည်စာရင်းတင်သွင်းထားမှုကနေ နောက်ထပ် စကာတင်အ ဆင့်ထိ နာမည်မတက်လာဖို့ နိုဘယ်လ်ဆုရွေးချယ်ရေးကော်မတီကို လက်မှတ် ထိုး တောင်းဆိုမှု ကင်ပိန်းတခုကို လုပ်ခဲ့ ကြတယ်။ ဒီအခြေအနေတွေနဲ့ပတ်သက်ပြီး အဆိုတော် မွန်းအောင်နဲ့ မေးမြန်းထားတာကို တင်ဆက်လိုက်ပါတယ်။

မေး… အခုလှုပ်ရှားမှုဟာ ဘယ်လောက်ထိရောက်မှုရှိတယ်လို့ မြင်သလဲ

ဖြေ… ဘယ်လောက် ထိရောက်တယ်ဆိုတာ အတိုင်းအတာအရ ပြောရခက်သည့်တိုင်အောင် ကျနော့အနေနဲ့ ဘာကို ယူသလဲဆိုတော့ လုပ်နိုင်ခဲ့တယ်ပေါ့။ ဒါဟာ လူစုလူဝေးနဲ့ ဆန္ဒပြတာ မျိုးမဟုတ်တော့ လူများများမလိုဘူး၊ ဦးသိန်းစိန် နိုဘယ်လ်ဆုနဲ့ မထိုက်တန်ဘူးဆိုတာ ပြသပြီး လက်မှတ် စုဆောင်းတဲ့ပွဲ ဖြစ်တယ်။ ဒါဟာ ပထမဦးဆုံး လှုပ်ရှားမှုတခု အနေနဲ့ စလုပ်လိုက်တာပဲ။

မေး… အလားတူ လှုပ်ရှားမှုတွေ ဆက်လုပ်သွားဖို့ အစီအစဉ်ရှိလား

ဖြေ… အခုအော်စလိုလှုပ်ရှားမှုမှာတော့ လူတွေရဲ့ စူးစမ်းမှု၊ အာရုံစိုက်မှုတွေရခဲ့တယ်။ မြန်မာပြည် အကြောင်း ပြောပြခွင့် တွေရတယ်။ ဒီဟာက ဒီနေရာမှာ ရပ်သွားမှာမဟုတ်ဘူး။ ကျနော် စဉ်းစားတာက ဥရောပထဲမှာ ကျနော်တို့ နိုင်ငံအများ ကြီးမဟုတ်တောင် ကိုယ်သွားနိုင်တဲ့ နိုင်ငံတချို့တော့ အဲဒီက မိတ်ဆွေတွေနဲ့ ဆက်သွယ် ညှိနှိုင်းပြီးသွားမယ် စိတ်ကူး တယ်။ လာမယ့်လထဲမှာ ဂျာမဏီသွားမလို့ စဉ်းစား ထားတယ်။ ပြီးရင် ဇူလိုင်လထဲ ဒိန်းမတ် အစီအစဉ်လည်း စဉ်းစား ထားတယ်။ အနီးအနားနိုင်ငံတွေက မိတ်ဆွေ ရဲဘော်ဟောင်းတွေကို ဆက်သွယ်မယ်၊ ကိုယ်နဲ့သဘောထား နီးစပ်သူ တွေနဲ့ဆုံဖို့လိုတယ်။ ကျနော် လူကိုယ်တိုင်သွားမယ်။

မေး… ဒီကနေ့ မြန်မာ့နိုင်ငံရေးအပြောင်းအလဲတွေအပေါ် ဘယ်လိုမြင်လဲ

ဖြေ… လက်ရှိ အနေအထားတွေကြောင့် ဒီမိုကရေစီအင်အားစုတွေဟာ မရေမရာနဲ့ ဘာလုပ်ရမှန်းမသိ၊ ဘယ်ပေါ်မှာ ရပ်ရမလဲဆိုတာ အမျိုးမျိုးရှိနေလိမ့်မယ်။ ကျနော့အမြင်မှာတော့ မြန်မာ့နိင်ငံရေးမှာ စစ်တပ် က ပါဝင်မယ်လို့ ဦးသိန်းစိန် က အမေရိကားလိုနိုင်ငံမျိုးမှာ အတိအလင်းပြောသွားတယ်။ ဒါဟာ သူတို့ဘက် က ဘာလုပ်မယ်ဆိုတာ အတိအလင်း ကြေငြာလိုက်တာပဲ။ အဲဒီတော့ ကျနော်တို့ရဲ့ အခုလို ရပ်တည်ချက် ဟာ မမှားဘူး။ စည်းကမ်းရှိတဲ့ ဒီမိုကရေစီဆိုတာ မလိုချင်ဘူး၊ စစ်မှန်တဲ့ ဒီမိုကရေစီကို ကျနော်တို့ လိုချင် တယ်။ အဲဒီအတွက် ကျနော်တို့ တိုက်ပွဲဝင်ရမယ်။ အထူးသဖြင့် စစ်တပ်က အနာဂတ်နိုင်ငံရေးမှာ အခန်း ကဏ္ဍတခုကနေ ပါဝင်နေမယ်ဆိုတာကို ကျနော်တို့ လက်မခံနိုင်ဘူး။ အဲလို မဖြစ်အောင်လဲ ဆက်လက် ဆန့်ကျင်နေမှာပဲ။ နောက်ပြီး ဆန်ရှင် (စီးပွားပိတ်ဆို့မှု) တွေ ဖွင့်ပေးနေတာတွေရှိတယ်။ အမေရိကား ကလည်း လက်ကျန်တချို့ပြန်ဖွင့်ပေးတာတွေရှိတယ်။ ဗမာပြည်မှာ စီးပွားရေးလုပ်ငန်းတွေ ၀င်လာရင် တောင် စီးပွားရေးကို ဘယ်လိုပုံစံမျိုး လုပ်သလဲဆိုတဲ့မေးခွန်းကလည်း ရှိသေးတယ်။ ပြည်သူတွေရဲ့ သဘော ထားလည်း စောင့်ကြည့်ရအုံးမယ်။ လူတွေကပြောနေသလို ဦးသိန်းစိန်က ပြုပြင်ပြောင်းလဲရေးကို ဦးဆောင်နေတာတော့ မဟုတ်ဘူး၊ သူဟာ ပြုပြင်ပြောင်းလဲရေးရဲ့ ရုပ်သေးရုပ်တရုပ်သာ ဖြစ်တယ်။ ဗမာပြည်ကို အရင်နဲ့မတူအောင် နည်းနည်းပါးပါး လုပ်ပြတော့ နိုင်ငံခြားအစိုးရတွေက တကယ်ပြောင်းလဲ နေပြီလို့ ထင်နေကြတယ်။ ကျနော့်အမြင်က အာဏာကို ပုံစံတ မျိုးနဲ့ သူတို့လက်ထဲမှာရှိနေအောင် ပြောင်းလဲယူနေတဲ့ လှည့်စားဖန်တီးမှုပါ။ ကျနော်တို့ကတော့ ပြည်တွင်းနိုင်ငံရေး ဖြစ် စဉ်ထဲကနေ အမှန်တရားကိုစွဲကိုင်ပြီး သူတို့ဟာ လုပ်ဇာတ်ကြီးတခု ဖန်တီးနေတယ်ဆိုတာ သက်သေတွေ ထုတ်ပြသွား ရမှာပဲ။

မေး… သမ္မတဦးသိန်းစိန်ကို နိုဘယ်လ်ငြိမ်းချမ်းရေးဆုရှင် ဖင်လန်သမ္မတဟောင်းက၂၀၁၃ နိုဘယ်လ် ငြိမ်းချမ်းရေးဆု အတွက် အမည်စာရင်းတင်သွင်းတယ်။ သမတ ဦးသိန်းစိန်ရဲ့ လှုပ်ရှားမှုကို ဘယ်လိုမြင်လဲ

ဖြေ… သူက ငြိမ်းချမ်းရေးဆုနဲ့ မထိုက်တန်သူပါ။ သူဟာ အာဏာရှင်စနစ်နဲ့ ရာထူးကြီးကြီးယူပြီး ဖိနှိပ်အုပ်ချုပ်ခဲ့သူ ဖြစ်တယ်။ ဘ၀တလျှောက်လုံး လက်နက်ကိုင်စစ်သားအဖြစ် အသက်မွေးဝမ်းကြောင်း လုပ်ခဲ့သူ ဖြစ်တယ်။ ဗမာပြည်မှာ ၁၉၆၂ ခု စစ်အာဏာသိမ်းပြီးချိန်ကစပြီး ၁၉၈၈ အာဏာသိမ်း န၀တနဲ့ နအဖ စစ်အစိုးရအဆက်ဆက်မှာ အာဏာရှင်စနစ် ကြံ့ခိုင်အောင် ထမ်းပိုးပေးခဲ့တယ်။ ၂၀၁၀ ရွေးကောက် ပွဲကျမှ စစ်ဦးထုတ်ချွတ် ခေါင်းပေါင်းပေါင်းပြီး သမ္မတ တက်လုပ်တဲ့လူ ဖြစ်တယ်။ ငြိမ်းချမ်းရေး နိုဘယ်လ်ဆု အတွက် နာမည်စာရင်းပေးသင့်တဲ့ စံချိန်စံညွှန်းတောင်မမီသူလို့ ပြောချင် တယ်။ သူ့ကိုအမည်စာရင်း သွင်းတာ နိုဘယ်လ်ဆုတီထွင်ခဲ့တဲ့ အဲလ်ဖရက် နိုဘယ်လ်ကိုတောင် အရှက်ရစေပါတယ်။ ဗမာပြည်မှာရော ကမ္ဘာကြီးမှာရော ဦးသိန်းစိန်ထက် ပိုပြီး နိုဘယ်လ်ဆုနဲ့ထိုက်တန်သူတွေ အများကြီးရှိပါတယ်။

ဒီကနေ့ အပြောင်းအလဲဟာ ဦးသိန်းစိန်ပြောင်းလဲပေးခဲ့တာ မဟုတ်ဘူး၊ စစ်အုပ်စု လမ်းကြောင်းထဲက သွားနေတဲ့ အစီ အစဉ်တခုသာ ဖြစ်တယ်။ ဦးသိန်းစိန်ဟာ စစ်အုပ်စုရဲ့ အရုပ်တရုပ်ပဲ။ သူတို့ဟာ အနှစ် ၂၀ ကျော် အခြေခံဥပဒေမရှိဘဲ အုပ်ချုပ်တဲ့ဘ၀ကနေ နောင်နှစ်ပေါင်းများစွာ သူတို့စိတ်ကြိုက်ရေးဆွဲထားတဲ့ အခြေခံဥပဒေနဲ့ အုပ်ချုပ်ဖို့ ကြံစီနေတာ ဖြစ်တယ်။ ပြီးတော့ ဗမာပြည်မှာလဲ ဒီမိုကရေစီပြောပြီး အတိုက် အခံမရှိသလို ဖြစ်နေတယ်။ ရထားတဲ့အခွင့်အရေးလေး ပျောက်သွားမလား စိုးရိမ်စိတ်နဲ့ မတရားမှန်း သိလည်း ဘာမှမပြောရဲ မဆိုရဲကြဘူး၊ နိုင်ငံရေးပါတီတွေ၊ နိုင်ငံရေးခေါင်း ဆောင်တွေနဲ့ မီဒီယာအများစု ကလည်း နှာစေးနေကြတယ်။

မေး… ကိုမွန်းအောင် အောင်မြင်နေတဲ့အချိန် တောခိုခဲ့ရတာဆိုတော့ အနုပညာထက် မိမိယုံကြည်မှုကို ပိုပြီးတန်ဘိုး ထားတာလား

ဖြေ… သီချင်းတွေတီးရဆိုရတာ ကျနော် ပျော်တယ်။ သီချင်းတီးခတ်သီဆိုနေရရင် ခန္ဓာကိုယ်အစိတ်အပိုင်း တွေအားလုံး သက်တောင့်သက်သာ ဖြစ်သွားသလိုပဲ။ တယောက်ယောက်ကို သီချင်းဆိုပြလိုက်ရရင် ရင်ထဲမှာ ပီတိဖြစ်နေတာမျိုးပါ။ သီချင်းတွေကို ၀ါသနာအရဆိုတာ ဖြစ်တယ်။ တကယ်တမ်း သီချင်း ဆိုစားတာမျိုးတော့ ကျနော် စိတ်မ၀င်စားဘူး။ ကျနော်က ဟိုးကတည်းက တော်လှန်ရေးသီချင်းတွေ ဆိုချင်ခဲ့တယ်။ ငြိမ်းချမ်းရေးတိုက်ပွဲသီချင်းဆိုချင်လို့ သီချင်းရေး တဲ့ ကိုနေ၀င်းကို ပုသိမ်အထိ သွားတွေ့တယ်။ ကိုနေ၀င်းကတော့ ခွင့်ပြုချက်ပေးပါတယ်။ ဒါပေမဲ့ ၈၂ အင်းယားအခွေ မသွင်းခင် အဲဒီသီချင်းနာမည်နဲ့ အခွေထုတ်ဖို့လုပ်တော့ ဆုံးသွားတဲ့ ကိုမောင်မောင်က “မင်း ဒီသီချင်းဆိုရင် အနောက် နိုင်ငံမှာတော့ နာမည်ကြီးသွားနိုင်တယ်၊ ဒီနိုင်ငံမှာတော့ ဘယ်သူမှမသိလိုက်ဘဲ ထောင်ထဲဝင်သွားရ လိမ့်မယ်” လို့ ကျနော့်ကို ပြောခဲ့တယ်။ သူ့စကားက ကျနော့နားထဲ စွဲသွားတယ်။ ဒါနဲ့ ငြိမ်းချမ်းရေး တိုက်ပွဲသီချင်းကို အသံသွင်းထားပြီးမှ ဖြုတ်ထားခဲ့ရတယ်။ မှတ်မှတ်ရရ လွမ်းရတဲ့ညတွေ လွန်ပါစေ အခွေထွက်တော့ ကျနော့ ထုတ်လုပ်သူကို “ နောက် တခါဆိုရင် အခွေသွင်းရင် ဆင်ဆာဘုတ်အဖွဲ့ကို မဖြတ်တော့ဘူး” လို့ ပြောခဲ့ဖူးတယ်။ တကယ်လည်း ဆင်ဆာဘုတ် မဖြတ်ခဲ့ရဘူး၊ အဲဒီလွမ်းရတဲ့ညက နောက်ဆုံးအခွေ ဖြစ်သွားခဲ့တယ်။ ကျနော်လည်း တောထဲရောက်ခဲ့တယ်။

မေး… ကိုမွန်းအောင်က နိုင်ငံရေးယုံကြည်ချက်နဲ့ သီချင်းဆိုနေတာလား

ဖြေ… နိုင်ငံရေးယုံကြည်ချက်နဲ့ဆိုတာလို့ ပြောတာထက်စာရင် နိုင်ငံရေးရဲ့ ရိုက်ခတ်မှုကို အနုပညာသမားလည်း ခံရ တယ်။ စာရေးဆရာ၊ ကဗျာဆရာတွေလည်း သူပတ်ဝန်းကျင်မှာဖြစ်နေတဲ့ လှိုင်းဂယက်တွေကိုသူတို့အတတ်ပညာနဲ့ ဖော်ပြကြသလိုပေါ့၊ သီချင်းသမားကလည်း သူဖြတ်သန်း နေတဲ့ခေတ်ကြီးရဲ့ ရင်ခုံသံကိုပြောတာပါပဲ။ ဥပမာ ကျနော် ဒီမှာဆိုခဲ့တဲ့ အတ္တဖြုတ်ချ ဆိုတဲ့ သီချင်းဟာ ကျနော်ရန်ကုန်ကို ကျောင်းသားဘ၀နဲ့ မရောက်ခင်ကတည်းက ကိုရဲလွင် ရေးထားတာပါ။ ဒီသီချင်းကို သူက ဘေးနားမှာ (NFS) လို့ ရေးထားတယ်။ Not for Sale ရောင်းရန် မဟုတ်ပေါ့။ ကျနော်က အဲဒီသီချင်းကို ကြိုက်တယ်။ စီစစ်ရေးအဖွဲ့ကလည်း အကျိုးပြုသီချင်းအနေနဲ့ တောင်းတယ်။ ဒီသီချင်းက လည်း အကျိုးပြုအမြင်နဲ့ကြည့်ရင် ဘောင်ဝင်နေတယ်။ ကိုရဲက ကျနော့ကို မရောင်းဘူး၊ ပေးဆိုတယ်။ သူ့အပြောအရ အတ္တဖြုတ်ချရဲ့ အဓိပ္ပါယ်က အနတ္တကအစိုးမရဘူး၊ အတ္တက အစိုးရတယ်။ အဲဒါကြောင့် အတ္တဖြုတ်ချ (အစိုးရဖြုတ်ချ) ဆိုတဲ့ အဓိပ္ပါယ်ဝှက်သီချင်း။ ဆင်ဆာလွတ်ပေမဲ့ အဲဒီသီချင်းက အကျိုးပြု သီချင်းအတွက်လိုအပ်လို့ ရေးထားတာ မဟုတ်ဘူး၊ နဂိုကတည်းက ကိုယ့်အဓိပ္ပါယ်နဲ့ကိုယ် ရေးထားပြီးသား သီချင်း။ ပြောရရင် ရည်ရွယ်ချက်နဲ့ရေးထားတဲ့ နိုင်ငံရေးသီချင်း။ ဒါပေမဲ့ ဒီလူတွေက နိုင်ငံရေးသမားတွေ မဟုတ်ဘူး၊ အနုပညာသမားတွေ။ ဘာလို့ နိုင်ငံရေးထဲပါလာလဲ ဆိုတော့ ကိုယ်ဖြတ်သန်းနေတဲ့ ခေတ်ကာလကြီးရဲ့ ဂယက်ရိုက်မှုကို ခံခဲ့ရလို့ပါ။ ကျနော်ကိုယ်တိုင်လည်း နိုင်ငံရေးသမား မဟုတ်ဘူး၊ ကျနော်ကြီးပြင်းလာတဲ့ ခေတ်တလျှောက်လုံး မတရားမှုတွေကို ကြုံခဲ့ရတဲ့အခါကျတော့ ဒီစနစ်ကြီးရဲ့ မကောင်းမှုကို နိုင်ငံရေးအမြင်နဲ့မဟုတ်ဘဲနဲ့လည်း သိနေမြင်နေရတယ်။ တချိန်မှာ အနုပညာသမား တယောက်အနေနဲ့ ကိုယ်တတ်နိုင်တဲ့ဘက်ကနေ ကိုယ့်အနုပညာနဲ့လုပ်ခဲ့တာပါပဲ။

မေး… ကိုမွန်းအောင်ပရိဿတ်တွေကို ဘာပြောချင်သေးလဲ

ကျနော်ဟာ မဟုတ်မမှန်တာ မတရားတာ ဖိနှိပ်မှုတွေ၊ မျက်ရေတွေ၊ အသက်တွေ ဘ၀တွေနဲ့ ဖတ်ခဲ့ဖူးတဲ့ စာတွေကို ရင်းနှီးပြီး တော်လှန်သွားမယ့် တော်လှန်ရေးသမားသက်သက် ဖြစ်တယ်။ ပြီးတော့ သီချင်းဆိုတဲ့လူတယောက်၊ တော်လှန်ရေးအတွက် တော်လှန်ရေးသီချင်းတွေဆိုနေအုံးမယ့် တော်လှန်သူ တယောက်သာ ဖြစ်တယ်။

ကိုညို (အော်စလို)

ဓါတ်ပုံ .. ကိုညို