လူမျိုးရေး၊ ဘာသာရေး ဆူပူ အကြမ်းဖက် ဖျက်ဆီးမှုများ ပဲခူးတိုင်း အနောက်ခြမ်းဒေသများသို့ ပျံ့နှံ့ လာ ရာ ဇီးကုန်း၊ နတ္တလင်း မြို့တွင် ဗလီနှင့် မွတ်စလင်များ၏ နေအိမ်၊ ဈေးဆိုင် များ ဆက်လက် ဖျက်ဆီး ခံခဲ့ရ ကြောင်း သတင်းရရှိသည်။
နတ္တလင်းမြို့ မြို့နယ်အုပ်ချုပ်ရေး တာဝန်ရှိသူများ၊ ဘုန်းတော်ကြီးများ၊ ဘာသာရေး ခေါင်းဆောင်များ၊ နိုင်ငံရေးတက်ကြွ လှုပ်ရှားသူများနှင့် နိုင်ငံရေးပါတီများမှ စောင့်ကြပ်နေ သည့် ကြားမှပင် လူ ၁၅၀ ခန့် စတင် စုဝေးလာရာမှ လူအုပ်စုမှာ ပိုမိုများပြားလာပြီး လုံခြုံရေး တပ်ဖွဲ့များက လူစုခွဲသော်လည်း မရတော့ဘဲ အဆောက်အအုံများကို ဖျက်ဆီးကြခြင်း ဖြစ်ကြောင်း သိရှိရသည်။
နတ္တလင်းမြို့ခံ ဦးအုန်းသန်းက “ဖျက်ဆီးရေး ခေါင်းဆောင်တွေက မီးရှို့ဘူး၊ လူမသတ်ဘူး၊ ပစ္စည်းမယူဘူး ဖျက်ပဲဖျက်မယ်၊ တားဆီးတာတွေ မလုပ်ပါနဲ့ ဆိုတဲ့ ခြိမ်းခြောက်စကားတွေ ပြောလာတဲ့အတွက် အကြမ်းမ ဖက်အောင် အာဏာပိုင်တွေ နောက်ဆုတ်ပေးလိုက်ရတယ်။ အဲဒါမှာ အန္တရာယ် မရှိတော့ဘူးဆိုပြီး လူတွေ ပိုရဲတင်းလာတယ်” ဟု ဆိုသည်။
ထို့နောက် မွတ်စလင်များ ပိုင်ဆိုင်သော ပစ္စည်းများကို လမ်းပေါ်သို့ သယ်ယူပြီး မီးရှို့ကြကြောင်း၊ တချို့သော မွတ်စလင်များမှာ ၎င်းတို့ပိုင် ပစ္စည်းဥစ္စာများနှင့် အတူ ညနေပိုင်းကတည်း မြို့ခံ ဗုဒ္ဓဘာသာ ဘုန်းကြီးကျောင်း များနှင့် အိမ်တချို့သို့ ပြောင်းရွေ့ထားသည့် အတွက် ဖျက်ဆီးခြင်းမှ လွတ်မြောက် သွားကြောင်း ၎င်းက ဆက်ပြောသည်။
အိမ်နှင့် ဆိုင် ဖျက်ဆီးခံရသည့် မွတ်စလင်တဦးဖြစ်သူ ဦးတင်အေးက မိမိတို့ နတ္တလင်းမြို့ ၌ နေထိုင် လာသည် မှာ နှစ်ပေါင်း ၄၀ ခန့် ရှိပြီဖြစ်ကြောင်း၊ ဒေသခံ ဘာသာခြားများဖြင့်လည်း ညီရင်းအစ်ကို တမျှ နေထိုင် ခဲ့ကြောင်း၊ ယခုကဲ့သို့ ဖျက်ဆီးမှုမျိုး မကြုံဖူးကြောင်း၊ အုပ်ချုပ်ရေး ကင်းမဲ့သွားပြီဟု ခံစား ရကြောင်း၊ ပြောသည်။
“ကျနော်တို့ ပုန်းနေရတယ်။ တအိမ်လုံး ရစရာမရှိဘူး၊ ဖျက်ဆီးသွားတာ။ ချွေးနဲစာနဲ့ ရှာထားရတာတွေ ကုန်ပြီ။ ဘယ် သူ့ကို အားကိုးရမှန်း မသိတော့ဘူး” ဟု ၎င်းက ဆိုသည်။
အလားတူ ဇီးကုန်းမြို့တွင်လည်း ဗလီနှင့် မွတ်စလင်များ၏ နေအိမ်၊ ဆိုင်များကို ဖျက်ဆီးခံ ရကြောင်း ဒေသခံများထံမှသိရသည်။
ဇီးကုန်းမြို့ အမျိုးသားဒီမိုကရေစီ အဖွဲ့ချုပ် (NLD) မှ ဒေါ်ခင်ဝိုင်းက “တမြို့ထဲနေတဲ့ မွတ်စလင်တွေကို လူသားချင်း စာနာဖို့တော့ ကောင်းပါတယ်။ အခု ဖျက်ဆီးတဲ့လူတွေလက်ထဲမှာ ပုဆိန်၊ ဓား၊ သံတူရွင်း အစုံပါတယ်။ မင်းမဲ့စရိုက်တွေ ဖြစ်နေပြီ” ဟု ဆိုသည်။
ဇီးကုန်းဗလီမှာ အနည်းငယ်သာ ပျက်စီးသွာသော်လည်း ထပ်မံဖျက်ဆီးမည်ဟု သတင်းများ ထွက်ပေါ်လာ သည့်အတွက် ယခုအခါ မွတ်စလင်များမှာ ထိတ်လန့်တုန်လှုပ်နေကြောင်း သိရသည်။
အဆိုပါ ဆူပူမှုနှင့် ပတ်သက်ပြီး ဇီးကုန်း NLD မှ ကိုအောင်မြတ်သူ အပါအ၀င် တခြားသော ၁၀ ဦးကိုလည်း ထိန်းသိမ်းထားကြောင်း သိရသည်။
မိတ္ထီလာမြို့မှ စတင်ခဲ့သည့် လူမျိုးရေး၊ ဘာသာရေး အဓိကရုဏ်းများသည် ယခုအခါ ပဲခူးတိုင်း အနောက်ခြမ်း မြို့များဖြစ်သည့် ကြို့ပင်ကောက်၊ အုတ်ဖို၊ မင်းလှ၊ နတ္တလင်းမြို့ များသို့ ပြန့်နှံ့ လာခြင်း ဖြစ်သည်။
ယမန်နေ့ညက ကြို့ပင်ကောက်၊ အုတ်ဖို၊ မင်းလှမြို့များ၌ ပုဒ်မ ၁၄၄ ထုတ်ပြန်ခဲ့ပြီး ည ၆ နာရီမှ နံနက် ၆ နာရီအတွင်း လမ်းပေါ် မထွက်ရန်၊ လူစုခြင်း၊ ဟောပြောခြင်း၊ စီတန်းလမ်းလျှောက်ခြင်း၊ လှုံ့ဆော်ခြင်း၊ တိုက်တွန်းခြင်းမပြုလုပ်ရန် ကြေညာထားသည်။
အုတ်ဖိုမြို့နယ် အိုးသည်ကုန်း အုပ်စု၌ ဖြစ်ပွားသည့် ဆူပူအကြမ်းဖက်မှုတွင် ပါဝင်သည်ဟု ယူဆရသူ ၅ ဦးကို မင်းလှရဲစခန်းက ဖမ်းဆီး ထိန်းသိမ်းထားသည်ဟု အစိုးရသတင်းစာ များ တွင် ဖော်ပြထားသည်။
မြန်မာနိုင်ငံ အလယ်ပိုင်းမှ ရန်ကုန်သို့ လမ်းတလျှောက်ရှိ မြို့များတွင် ဆူပူ ဖျက်ဆီးမှုများ ကူးစက်ဖြစ်ပေါ်နေခြင်း အပေါ် သက်ဆိုင်ရာ အုပ်ချုပ်ရေး အာဏာပိုင်များ၏ တရားဥပဒေစိုးမိုးရေး ကိုင်တွယ်မှုကို ဝေဖန်မှုများ ရှိနေသည်။
ပြည်မြို့တွင်လည်း ဆူပူအုံကြွအောင် လှုံ့ဆော်စာများ ဝေငှသည်ဟု သိရကြောင်း၊ ထိုမှတဆင့် ရန်ကုန်-ပြည် အဝေးပြေး ကားလမ်းအတိုင်း ရန်ကုန်ဘက်သို့ ဆင်းလာကာ အုတ်ဖို၊ နတ္တလင်း၊ ဇီးကုန်း၊ ကြို့ပင်ကောက်မြို့၊ ပုတီးကုန်းမြို့ တို့တွင် ထပ်မံ ဖြစ်ပေါ်ခဲ့ရာ အဝေးပြေး ကားလမ်းမပေါ်ရှိ မြို့များ တလျောက် ဖြစ်ပျက်ခဲ့သည်ကို မတားဆီးနိုင်သေးသည်က သံသယ ရှိစရာကောင်းကြောင်း ၈၈ မျိုးဆက် ကျောင်းသားခေါင်းဆောင်တဦးဖြစ်သူ ဦးမင်းကိုနိုင်က ပြောသည်။
Credit : Here
No comments:
Post a Comment
မိမိတို့၏အမြင်များကို လွတ်လပ်ပွင့်လင်းစွာရေးသားနိုင်ပါသည်။
ဘမ်းမည်မဟုတ်ပါ။