နိုင်ငံစုံပါဝင်မည့် (၁၅)ကြိမ်မြောက် မီးပုံးပျံ ပျံသန်းမှု ဒီဇင်ဘာလ တတိယပတ်မှ ဇန်နဝါရီလဆန်းအထိ ပြုလုပ်မည်

မြန်မာနိုင်ငံရှိ ခရီးသွားများ သွားရောက်လည်ပတ်မှု များပြားသော နေရာဒေသများသို့ ဒီဇင်ဘာ ၂၁ ရက်နေ့မှ ဇန်န၀ါရီလ ၈ ရက်နေ့အထိ ၁၉ ရက်ကြာ မီးပုံးပျံ ခြောက်လုံးဖြင့် ပျံသန်းရန် စီစဉ်နေကြောင်း Golden Express ခရီးသွားကုမ္ပဏီမှ သတင်းရရှိသည်။ ယင်းမီးပုံပျံ ခရီးစဉ်မှာ (၁၅) ကြိမ်မြောက် ပျံသန်းခြင်းဖြစ်ပြီး ယခုအကြိမ်တွင် မီးပုံးပျံခြောက်လုံးဖြင့် အင်းလေး၊ ဖယ်ခုံ၊ လွိုင်ကော်၊ ဟဲဟိုး၊ မန္တလေးနှင့် စစ်ကိုင်းတို့တွင် ပျံသန်းမည်ဖြစ်ကာ လေထီးခုန်ချမည့် အစီအစဉ်လည်းရှိကြောင်း သိရှိရသည်။

“တစ်နေ့ကို နှစ်ကြိမ်၊ မနက်ပိုင်း ခပ်စောစောနဲ့ ညနေပိုင်း နေ၀င်ချိန်လောက်ကို ပျံသန်းဖို့ စီစဉ်ထားပါ တယ်။ သူတို့က မြောက်ဦးကိုပါ သွားချင်တာ။ ဒါပေမယ့် ကျွန်တော်တို့က စီစဉ်မပေးနိုင်ဘူး။ သူတို့ တစ်ခုခု ဖြစ်သွားရင် ကျွန်တော်တို့ တာဝန်ယူရမှာဆိုတော့ အာမမခံနိုင်ဘူး။ အဲဒါကြောင့် ဒီခရီးစဉ်ကိုပဲ စီစဉ်ပေး ဖြစ်တာပါ။

မီးပုံးပျံမောင်းမယ့် သူက ခုနစ်ယောက်နဲ့ လေထီးခုန်မယ့် ယောကျာ်းလေးက နှစ်ယောက်ပါမယ်။ သူတို့ပျံသန်းတဲ့ တစ်ချိန်လုံးကို မီးပုံးပျံသယ်ဖို့အတွက် ဒိုင်နာကားသုံးစီးနဲ့ မီးပုံးပျံစီးတဲ့အဖွဲ့တွေ စီးဖို့အတွက် ကားတွေနဲ့ တောက်လျှောက် လိုက်မှာဆိုတော့ တစ်နာရီလောက်ပဲ ပျံသန်းဖြစ်ပါမယ်” ဟု Golden Express ခရီးသွားကုမ္ပဏီမှ မန်နေဂျင်းဒါရိုက်တာ ဦးတင့်နောင်က ပြောကြားခဲ့သည်။

ယင်းခရီးစဉ်တွင် ဆွစ်ဇာလန်နိုင်ငံမှ Mr.Peter Blaser တို့ စုံတွဲက ဦးဆောင်မည်ဖြစ်ပြီး ဂျာမနီ၊ သြစတြေးလျနှင့် ပြင်သစ် စသည့်နိုင်ငံပေါင်းစုံမှ နိုင်ငံခြားသား ၂၉ ဦး ပါဝင်မည်ဖြစ်ကြောင်း သိရှိရသည်။

ယင်းအဖွဲ့သည် ၁၉၉၉ ခုနှစ်မှ စတင်ကာ မြန်မာနိုင်ငံသို့ နှစ်စဉ်နှစ်တိုင်း မီးပုံးပျံ စီးနင်းပျံသန်းပြီး ယခုကဲ့သို့ လာရောက် လည်ပတ်လေ့ရှိကြောင်း ၂၀၁၂ ခုနှစ် ဒီဇင်ဘာလ ၁၂ ရက်နေ့ထုတ် Weekly Eleven ဂျာနယ်တွင် ဖော်ပြထားပါသည်။