မိတ္ထီလာတွင်ကင်တားနားအားဆန္ဒပြမှု၈၈မျိုးဆက်အဖွဲ့ သဘောထား(လုံးဝ)မပါ၊မိတ္ထီလာမြို့ခံ ၈၈မျိုးဆက် ကျောင်းသားအဖွဲ့ဝင်များကိုလည်းပြင်းပြင်းထန်ထန် သတိပေးလိုက်ကြောင်းသိရ

မန္တလေးတိုင်း၊ မိတ္ထီလာမြို့တွင် ကုလသမဂ္ဂ၏ လူ့အခွင့် အရေး ဆိုင်ရာ အထူးကိုယ်စားလှယ် မစ္စတာ ကင်တားနားအား ဒေသခံ များနှင့် အတူ ဆန္ဒပြခဲ့ကြသော မိတ္ထီလာမြို့ခံ ၈၈ မျိုးဆက် ကျောင်းသား အဖွဲ့ဝင်များကို ပြင်းပြင်းထန်ထန် သတိပေးလိုက်ပြီး ထိုဆန္ဒပြမှုတွင်ရန်ကုန်ရှိ ၈၈ မျိုးဆက် ကျောင်းသားများ အဖွဲ့၏ သဘောထား လုံးဝ မပါဝင်ကြောင်း သိရသည်။

“ရန်ကုန်က ၈၈ မျိုးဆက် ကျောင်းသားအဖွဲ့၊ တာဝန်ရှိသူတွေရဲ့ သဘောထားအရ ဒီ ၈၈ မျိုးဆက် ကျောင်းသား အဖွဲ့ရဲ့ နာမည်ကို သုံးပြီး လုပ်ဆောင်ခွင့် မပြုပါဘူး။ ရန်ကုန် ၈၈ ကျောင်းသား ခေါင်းဆောင်တွေရဲ့ သဘောထားမပါဘဲ လုပ်တဲ့အတွက် သူတို့ကို လှမ်းပြောပြီး သတိပေးပြီးသား ဖြစ်တယ်။ နောက်နောင်တွေ ဒီလို မျိုး လုပ်တဲ့ ကိစ္စတွေမှာ ကြိုတင် အကြောင်းကြား အသိမပေးရင် ကျနော်တို့နဲ့ ဖြေရှင်းမှုတွေ လုပ်ရမယ်” ဟု ၈၈ မျိုးဆက် ကျောင်း သား များ အဖွဲ့မှ ကိုဇော်မင်းက ဧရာဝတီသို့ ပြောသည်။

သို့ရာတွင် အဖွဲ့အစည်းတခုခုမှ ဦးဆောင်ဦးရွက်ပြုပြီး မစ္စတာ ကင်တာနာကို ဆန္ဒပြခဲ့ကြခြင်း မဟုတ် ကြောင်း၊ နိုင်ငံရေးပါတီဝင်များ၊ လူမှုရေး၊ ဘာသာရေး အဖွဲ့အစည်းများ၊ ရဟန်းများ၊ ဒေသခံ လူထုဖြင့် စုပေါင်း လုပ်ဆောင်ကြခြင်း ဖြစ်ကြောင်း၊ မိမိတို့ ပူးပေါင်းရပ်တည်ခဲ့ခြင်းမှာ လည်း ၈၈ မျိုးဆက် ကျောင်းသားများအဖွဲ့ ကိုယ်စားပြုမဟုတ်ဘဲ မြို့ခံတဦးအနေဖြင့်သာ ပါဝင်ခဲ့ခြင်းဖြစ်ကြောင်း မိတ္ထီလာ မြို့ခံ ၈၈ မျိုးဆက် ကျောင်းသားများ အဖွဲ့မှ ကိုသီဟက ဧရာဝတီသို့ ပြောသည်။

“မြို့သူမြို့သားတွေ အကုန်လုံး စုပေါင်းပြီး လုပ်တာ။ ကျနော်တို့ တဖွဲ့တစည်းတည်းအနေနဲ့ ဦးဆောင် လုပ်တာ မဟုတ်ဘူး။ တောင်းဆိုထားတာက သူလာရင် အိတ်ဖွင့်ပေးစာ ပေးဖို့ပဲ တောင်းဆိုထားတာ။ ခွင့်ပြုချက် တောင်းထားတာ။ ကျန်တာ ဘာမှမပါဘူး။ကျနော်လည်း မြို့ခံတဦးအနေနဲ့ပဲ ၀င်ရပ်တည်တာပါ” ဟုကိုသီဟကဆိုသည်။အိတ်ဖွင့်ပေးစာကိုမိတ္ထီလာမြို့ခံ ၈၈ မျိုးဆက် ကျောင်းသားများ အဖွဲ့က မိတ္ထီလာ ခရိုင် အုပ်ချုပ်ရေးမှူမှတဆင့်မစ္စတာကင်တားနား ထံသို့ပေးအပ်ခဲ့ကြောင်း မိတ္ထီလာခရိုင် အထွေထွေ အုပ်ချုပ်ရေးမှူး ဦးတင်မောင်စိုးက ဧရာဝတီသို့ ပြောသည်။

အဆိုပါဆန္ဒထုတ်ဖော်မှုသည် တရားဝင်ခွင့်ပြုချက်တောင်းခံထားပြီးဖြစ်ကြောင်း၊ မိတ္ထီလာမြို့တွင် လက်ရှိ ကျင့်သုံးလျှက်ရှိသော ည၁၀နာရီနောက်ပိုင်းညမထွက်ရ အမိန့်ကို ကျော်လွန်ပြီးမစ္စတာ ကင်တားနား လာ ရောက်သည့် အချိန်အထိ စောင့်ဆိုင်းခဲ့ကြ သူများကိုလည်းအရေးယူရန် အစီစဉ်မရှိကြောင်း သိရသည်။

ထို့အပြင် မြို့ခံလူထု အနေဖြင့် မစ္စတာ ကင်တားနား တင်သွင်းခဲ့သော မြန်မာနိုင်ငံ လူ့အခွင့် အရေးဆိုင်ရာ အစီရင်ခံစာအား လုံးဝ လက်မခံကြောင်း၊ခိုးဝင်ဘင်္ဂါလီများကို နိုင်ငံသားဖြစ်ခွင့် ပေးသင့်သည်ဆိုသော တိုက်တွန်းချက်ကို လုံးဝကန့်ကွက်ကြောင်း၊၁၉၈၂ခုနှစ်မြန်မာနိုင်ငံသား ဖြစ်ခွင့်ဥပဒေကို ခြွင်းချက်မရှိ လက်ခံကြောင်း၊ မြန်မာတိုင်းရင်းသား လူမျိုးစု ၁၃၅ မျိုးထဲတွင် ရိုဟင်ဂျာဆိုသော လူမျိုးစု လုံးဝမရှိဟု လက်ခံထားကြောင်း၊ လူ့အခွင့်အရေးကို လေးစားသော် လည်း အမျိုးသားအခွင့်အရေးကို ဦးစားပေး သွားမည်ဖြစ်ကြောင်း၊ ငြိမ်းချမ်းစွာ အတူယှဉ်တွဲ နေထိုင်ခြင်းကို မူအားဖြင့် လက်ခံသော်လည်း တဖက် သတ် ထိပါးစော်ကားသည့် မည်သည့် ကိစ္စရပ်မျိုးကိုမဆို လုံးဝ လက်ခံမည် မဟုတ်ကြောင်းတို့လည်း ပါရှိသည်။

ကုလသမဂ္ဂ၏ လူ့အခွင့်အရေးဆိုင်ရာ အထူးကိုယ်စားလှယ် မစ္စတာ ကင်တားနား၏ ၁၁ ရက် အကြာ မြန်မာပြည် ခရီးစဉ်တွင် ရခိုင်ပြည်နယ်အပါအဝင် မြန်မာပြည်တွင်းရှိ သွေးထွက်သံယို မှုများ ဖြစ်ပွားခဲ့ရာ ဒေသများသို့ သွားရောက်ခဲ့ပြီး ယနေ့ညနေတွင်ရန်ကုန်မင်္ဂလာဒုံလေဆိပ်တွင် သတင်းစာရှင်းလင်းပွဲ ပြုလုပ်၍ ပြန်လည် ထွက်ခွာသွားပြီ ဖြစ်သည်။

ဧရာဝတီ