လူကုန်ကူးမှု ပူးပေါင်းတိုက်ဖျက်ရေးရုံးများကြောင့် တရားမ၀င် မြန်မာလုပ်သားများ ဖမ်းဆီးခံရခြင်း လျော့နည်းဟုဆို

မြန်မာ-ထိုင်း နှစ်နိုင်ငံ ပူးပေါင်းဆောင်ရွက်မှုဖြင့် ဖွင့်လှစ်ထားသော လူကုန်ကူးမှု တိုက်ဖျက်ရေး ရုံးများ ကြောင့် မြန်မာနိုင်ငံမှ တရားမ၀င် သွားရောက်သော လုပ်သားများ ဖမ်းဆီးခံရမှုသည် တာချီလိတ်ဘက် တွင် လျော့နည်းလာ သည်ဟု တာချီလိတ် လူကုန်ကူးမှု တားဆီးကာကွယ်ရေးအဖွဲ့မှ ဒုတိယရဲမှုးကြီး ယဉ်ယဉ်အေးက မဇိ်္ဈမကို ပြော သည်။

ယခင်က ထိုင်းနိုင်ငံအတွင်းသို့ တရားဝင်အထောက်အထား၊ ခွင့်ပြုချက်များမရှိဘဲ နယ်စပ်ဖြတ်ကျော်ခြင်း များကို ထိုင်းအစိုးရမှ ဖမ်းဆီးအရေးယူမှုများရှိခဲ့သော်လည်း နယ်စပ် လူကုန်ကူးမှု ပူးပေါင်း တိုက်ဖျက် ရေးဆိုင်ရာ ဆက်ဆံရေးရုံးများ BCATIP (Border Cooperation Against Trafficking In Person) ဖွင့်လှစ် ပြီးနောက်ပိုင်း တရားမ၀င် မြန်မာအလုပ်သမားများ ဖမ်းဆီးခံရမှုများ လျော့နည်းသွားသည်ဟု ၎င်းက ပြောခြင်း ဖြစ်သည်။

၎င်းက “ ရက်ရှည် ဖမ်းဆီးထားတာမျိုး မပြုတော့ဘဲ အပြင်မှာ အားလုံးကို ထိန်းသိမ်းထားတယ်၊ တာချီလိတ် က နယ်စပ် လူကုန်ကူးမှု တားဆီးရေးအဖွဲ့ဆီ ချက်ချင်း အကြောင်းကြားပေးတယ်၊ ထိန်းသိမ်း ထားတဲ့ တရားမ၀င် အလုပ်သမားတွေကို မြန်မာနိုင်ငံဘက်ကို အပတ်စဉ် အင်္ဂါနဲ့ သောကြာနေ့တွေမှာ ပုံမှန် လွှဲပြောင်းပေးပါတယ် ”ဟု ပြောသည်။

တာချီလိတ်-မယ်ဆိုင် BCATIP ရုံးကို ပြီးခဲ့သည့် ၂၀၁၂ ခုနှစ် မတ်လအတွင်းက ဖွင့်လှစ်ခဲ့ခြင်းဖြစ်ပြီး ကော့သောင်း-ရနောင်း BCATIP ရုံးကိုမူ သြဂုတ်လအတွင်းက ဖွင့်လှစ်ခဲ့သည်။

ယင်းသို့ တာချီလိတ် – မယ်ဆိုင်ရုံး ဖွင့်လှစ်ထားခြင်းကြောင့် ဗန်ကောက်၊ ချင်းမိုင်၊ ချင်းရိုင်၊ ဖယောင်း၊ တာ့ခ်ျခရိုင်များ ရှိ လူကုန်ကူးမှု တိုက်ဖျက်ရေးလုပ်ငန်း ဆောင်ရွက်နေသည့် ကိုယ်စားလှယ်များအနေဖြင့် ယင်းရုံးများသို့ ဆက်သွယ် လာနိုင်သည်ဟု ၎င်းက ပြောသည်။

ထိုင်းနိုင်ငံသို့ တရားမ၀င် ၀င်ရောက်ခြင်းကြောင့် ပြန်လည်လွှဲပြောင်းပေးခဲ့သည့် ရွှေ့ပြောင်းအလုပ်သမား အရေအတွက်မှာ ယခု ဇူလိုင် ၂၈ ရက်အထိ တစ်လမပြည့်သည့် အချိန်မှာပင် ၁၆ ဦးရှိပြီဖြစ်သည်။

ဒုရဲမှုးကြီး ယဉ်ယဉ်အေးက “ရွေ့ပြောင်းအလုပ်သမားတွေ ပါလာတဲ့ ကားတွေထဲမှာ တချို့ ဆွေမျိုးမရှိဘဲ ထိုင်းဘက် သွားတာမျိုးနဲ့ တရားဝင် အထောက်အထားမရှိတဲ့ သူတွေဆို အသိပညာပေး ဟောပြောမှုတွေ လုပ်ပြီး နေရပ်ပြန်ဖို့ ဆောင်ရွက်ပေးနေပါတယ် ”ဟု ပြောသည်။

ဇူလိုင်လ ဒုတိယအပတ်အတွင်းကလည်း မြန်မာ-ထိုင်းနှစ်နိုင်ငံ လူကုန်ကူးမှု ပူးပေါင်းတိုက်ဖျက်ရေးဆိုင်ရာ တတိယအကြိမ် အစည်းအဝေးပွဲကို ထိုင်းနိုင်ငံ ချင်းရိုင်မြို့တွင် ကျင်းပခဲ့သည်။ BCATIP ရုံးများကို လက်ရှိတွင် နယ်စပ်ဒေသနှစ်ခု၌ ဖွင့်လှစ်ထားပြီး မြ၀တီ-မဲဆောက်ရုံးကိုလည်း ယခုနှစ်အတွင်းတွင် ဖွင့်လှစ်သွားရန် ရှိသည်။ ယင်းအပြင် တရုတ်-မြန်မာ နယ်စပ်တွင်လည်း BCATIP ရုံးများ ဖွင့်လှစ်သွားရန် ရှိသည်။

source: http://www.mizzimaburmese.com/news/regional/12852-2013-07-29-02-09-04.html