/*FB*/
/*FB*/
ကြွရောက်လာသူအပေါင်း ကိုယ်စိတ်နှစ်ဖြာ ကျမ်းမာချမ်းသာကြပါစေ

Thursday, January 23, 2014

.

မိကျောင်းကန်ကိစ္စလွှတ်တော်သို့တင်၊ တတိယအကြိမ် သပိတ်စခန်းဖွင့်ဖို့ ဆန်အိတ်တွေစုနေဟုဆို



မိကျောင်းကန်ရပ်ကွက်ရှိ မြေယာသိမ်းခံရမှုများကို ကတိပြုခဲ့သည့်အတိုင်း မိကျောင်းကန် မြေယာ သိမ်းမှု ကိစ္စများနှင့် ပတ်သက်သည့် အထူးအစီရင် ခံစာ တစ်စောင်ကို ပြည်ထောင်စုလွှတ်တော်သို့ တင်ပြထားပြီဖြစ်ကြောင်း ရန်ကုန်တိုင်းဒေသကြီး လယ်ယာမြေစုံစမ်းရေးကော်မရှင်ဥက္ကဋ္ဌ ပြည်သူ့ လွှတ်တော်ကိုယ်စားလှယ် ဦးအောင်သိန်းလင်းက ပြောကြားသည်။ အဆိုပါ အစီရင်ခံစာကို မတင်မီ မိကျောင်းကန် မြေယာသိမ်းကိစ္စများသည် ဥပဒေ နှင့်အကျုံးဝင်ညီညွတ်ခြင်းရှိ၊ မရှိ မေးခွန်းတစ်ခုကို လွှတ်တော်သို့ မေးမြန်းခဲ့ရာ လွှတ်တော်တွင် မဖြေကြားဘဲ စာဖြင့်သာ ပြန်လည်ဖြေကြားခဲ့သည်။


“သူတို့ ပြန်ဖြေတဲ့အထဲမှာ ဗိုလ်တထောင်ကတော့ မြေခွန်ကြွေးကျန်လို့ သိမ်းတယ်ဆိုတဲ့ ယေဘုယျသဘော ဖြစ်နေတယ်။ မိကျောင်းကန်ကိစ္စ ကျွန်တော်မရှင်းတာက ၂ နှစ်လောက် လစ်လပ်ထားတဲ့မြေ ဖြစ်တဲ့ အတွက် သိမ်းတယ်ဆိုပြီးတော့ သူတို့ ဖြေတယ်။ ကျွန်တော်သိထားတာက အဲဒီလိုမဟုတ်ဘူး။ ဒါက လွှတ်တော်ထဲမှာ မေးထားတယ်။ လွှတ်တော်ထဲမှာ ဖြေရမှာ။ အဲလိုမဖြေဘဲနဲ့ ကျွန်တော့်ကို စာနဲ့ဖြေတော့ ကာယကံရှင်တွေသိအောင် ပြောဖို့ ကျွန်တော့်မှာ တာဝန်ရှိပါတယ်။ ဒီတစ်ပတ်ပြန်သွားရင် ကျွန်တော် ဆက်သွယ်ပြီး ပြောမှာပါ”” ဟု ဦးအောင်သိန်းလင်းက ဆိုသည်။

အထူးအစီရင်ခံစာတွင် လေ့လာတွေ့ရှိချက်၊ အကြံပြုသုံးသပ်ချက်များ၊ ဘိုးဘွားပိုင်ဖြစ်ကြောင်း သက်သေ အထောက်အထားများ ပါဝင်ပြီး ယင်းကိစ္စကို လွှတ်တော်က ဆုံးဖြတ်မည်မဟုတ်ဘဲ အာဏာပိုင် အစိုးရကသာ ဆုံးဖြတ်သွားလိမ့်မည်ဖြစ်ကာ ဦးစားပေးဆောင်ရွက်လိမ့်မည်ဟု ယူဆကြောင်း ၎င်းက ပြောသည်။ မိကျောင်းကန်ရပ်ကွက်ရှိ မြေယာသိမ်းခံရသူများကမူ ယခုကျင်းပနေသည့် လွှတ်တော်တွင် ကျေနပ်လောက်သည့် ဆုံးဖြတ်ချက်အဖြေတစ်ခု မရရှိပါက တတိယအကြိမ် သပိတ်စခန်းဖွင့် ဆန္ဒဖော် ထုတ် ရန်အတွက် ဆန်အိတ်များပင် စုဆောင်းနေကြပြီဟု သိရသည်။

မိကျောင်းကန်ရပ်ကွက်ရှိ မြေဧကများကို မြို့ရွာနှင့် အိုးအိမ်ဖွံ့ဖြိုးရေးဦးစီးဌာနက ကနဦးသိမ်းယူခဲ့ခြင်း ဖြစ်ပြီး ယခုအခါ တပ်မြို့စည်ပင်သာယာရေးအဖွဲ့က လက်ပြောင်းရယူထားသည်။ မိကျောင်းကန်ပြည်သူ များသည် မြေယာသိမ်းခံရမှုများအတွက် ခုနစ်ကြိမ်တိုင် ဆန္ဒဖော်ထုတ်ခဲ့ပြီး သပိတ်စခန်း နှစ်ကြိမ် ဖွင့်လှစ်ခဲ့ပြီးဖြစ်သည်။ ရန်ကုန်တိုင်းဒေသကြီး လယ်ယာမြေစုံစမ်းရေး ကော်မရှင်ဥက္ကဋ္ဌက မိကျောင်းကန် ပြည်သူများ ဆက်လက်ဆန္ဒဖော်ထုတ်ခဲ့ပါက ပြည်သူ့ဘက်ကသာ ရပ်တည်သွားမည်ဖြစ်ပြီး မြေသိမ်းခံရ သည့် ကိစ္စများကို တတ်နိုင်သရွေ့ဆောင်ရွက်ပေးရန် မိမိတို့တွင် တာဝန်ရှိပါကြောင်း ပြောကြားထား ခဲ့သည်။

By 7Day Daily Newspaper

No comments:

Post a Comment

မိမိတို့၏အမြင်များကို လွတ်လပ်ပွင့်လင်းစွာရေးသားနိုင်ပါသည်။
ဘမ်းမည်မဟုတ်ပါ။