/*FB*/
/*FB*/
ကြွရောက်လာသူအပေါင်း ကိုယ်စိတ်နှစ်ဖြာ ကျမ်းမာချမ်းသာကြပါစေ

Thursday, January 23, 2014

.

တပ်မတော် နှင့် အမျိုးသားနိုင်ငံရေး

ကျွန်တော်တို့၏ တပ်မတော်သည် စတင်ဖွဲ့စည်း ကတည်းက “ လွတ်လပ်ရေးသည် ပထမ ၊ လွတ်လပ်ရေး သည် ဒုတိယ ၊ လွတ်လပ်ရေးသည် တတိယ ” ဆိုပြီး နိုင်ငံတော် လွတ်လပ်ရေး အတွက် အဓိက တိုက်ပွဲဝင် ခဲ့ကြသည်။ တပ်မတော်သည် နိုင်ငံတော် အတွက် ဖြစ်ရမယ် ဆိုတဲ့ တိုင်းပြည် ချစ်စိတ် ၊ နိုင်ငံ ချစ်စိတ်နဲ့ ဆောင်ရွက် ခဲ့ကြခြင်း ဖြစ်သည်။ ထို့အပြင် တပ်မတော်သည် နိုင်ငံတော် တည်ငြိမ် အေးချမ်း သာယာရေး နှင့် ဖွံ့ဖြိုး တိုးတက်ရေးကို အမြဲတမ်း ရှေးရှု ဆောင်ရွက်လျက် ရှိသည်။ တပ်မတော်မှ အမိမြန်မာ နိုင်ငံ တော်ကြီး အဓွန့်ရှည် တည်တံ့ ခိုင်မာစေရန် အတွက် အမြဲ အသင့်ရှိသည့် အဖွဲ့အစည်း တစ်ခု ဖြစ်သည်။


တပ်မတော်သည် နိုင်ငံတော်၏ ကာကွယ်ရေး တာဝန်ကို ထမ်းဆောင်ရန် အတွက် စနစ်တကျ ဖွဲ့စည်းထား သော ( ကြည်း/ ရေ/ လေ) လက်နက်ကိုင် အဖွဲ့အစည်း ဖြစ်ပြီး နိုင်ငံတော် ကာကွယ်ရေး တာဝန်ကို အဓိက တာဝန်ယူ ထားကာ နိုင်ငံတော် ဖွဲ့စည်းပုံ အခြေခံဥပဒေ ၌ ပါရှိသည့် အမျိုးသားရေး တာဝန်များ ဖြစ်သည့် ပြည်ထောင်စု မပြိုကွဲရေး ၊ တိုင်းရင်းသား စည်းလုံး ညီညွှတ်မှု မပြိုကွဲရေး ၊ အချုပ်အခြာ အာဏာ တည်တံ့ ခိုင်မြဲရေး စသော အမျိုးသားရေး တာဝန်များကို ကာကွယ် စောင့်ရှောက်လျက် ရှိသည်။

ပြည်ထောင်စု တစ်ခု နိုင်ငံတော် တစ်ခု အဓွန့်ရှည်ကြာ တည်တံ့ နေစေရန်မှာ ပြည်ထောင်စု အတွင်း မှီတင်း နေထိုင်ကြသော တိုင်းရင်းသား အချင်းချင်း စည်းလုံး ညီညွှတ်ရေး သည် အဓိက ဖြစ်သည်။ တိုင်းရင်းသား စည်းလုံး ညီညွှတ်ရေး အတွက် တပ်မတော် အား တိုင်းရင်းသား ပေါင်းစုံဖြင့် တပေါင်းတည်း ဖွဲ့စည်း ခဲ့သည်။ ထို့အပြင် ခန့်အပ် တာဝန်ပေး ရာတွင်လည်း အရည်အချင်း ကိုလိုက်၍ ရာထူး တာဝန်များ တိုးမြှင့် ပေးခဲ့သည်။ လူမျိုးအရ ခွဲခြားမှုမရှိ။ တပ်မတော်သည် တိုင်းရင်းသား အားလုံး အတွက်ပင် ဖြစ်သည်။ အန္တရာယ်သည် နိုင်ငံတော်ကို နှောင့်ယှက်ရန် အတွက် မြေပြန့်မှသာ ပေါ်ပေါက် လာမည်မဟုတ် ၊ တောင်ပေါ်နှင့် နယ်ခြားဒေသ အားလုံး တွင်လည်း ပေါ်ပေါက် လာတတ် ပေသည်။ တိုင်းရင်းသား စည်းလုံး ညီညွှတ်မှု တပ်မတော် နှင့် ပြည်သူ အတူရှိမှု သည် နိုင်ငံ၏ မရှိလျှင် မဖြစ်သော အင်အားကြီး တစ်ရပ် ဖြစ်သည်။

“ရဲဘော်တိုင်း သည် တိုင်းပြည် အတွက် ဖြစ်စေရမည် ၊ တိုင်းပြည်သည် ရဲဘော်အတွက် မဖြစ်စေရ ” ဟု ဗိုလ်ချုပ်အောင်ဆန်း က မှာကြား ခဲ့သည်။ ထိုနည်းတူ ဗိုလ်ချုပ်နေ၀င်း ကလည်း သူ၏ စစ်မှုထမ်းသက် အနှစ် ၃၀ ၊ စစ်ဦးစီးချုပ် သက်တမ်း ၂၅ နှစ်အတွင်း ထိုရည်မှန်းချက် ကို မပြတ် ထားရှိခဲ့သည်။ တပ်မတော် သည် လူတန်းစား တစ်ရပ် မဖြစ်စေရ ၊ တာဝန် တစ်ရပ်သာ ဖြစ်စေရမည်။ ပြည်သူ့ဝန်ထမ်း အဖွဲ့သာ ဖြစ်သည်။ ပြည်သူနှင့် မကင်းကွာသော ပြည်သူ့ အကျိုးကို မပြတ်ဆောင်သော ပြည်သူ့ တပ်မတော် ဖြစ်ရမည်။ စစ်ဝါဒ မရှိစေရ။ နိုင်ငံကို ကာကွယ်ခြင်း သည် ပြည်သူတို့ကပါ လိုအပ်သလို အလေ့ကျ တာဝန် ထမ်းဆောင်သော နိုင်ငံသား တာဝန် တစ်ရပ် ဖြစ်စေအပ်သည်။ သို့မှသာ အရွယ်ရောက်သူ ယောက်ျား ၊ မိန်းမတိုင်း ရဲဘော်ဖြစ်မည်။ ပြည်သူတိုင်း ရဲဘော် ဖြစ်မည်။ ရဲဘော်တိုင်း ပြည်သူ ဖြစ်သည်။ ဤ ဦးတည်ချက် ကို တပ်မတော်သည် မျက်ခြေမပြတ် ဆောင်ရွက်ခဲ့ပြီး ဤခံယူ ချက်ကို ဘယ်သော အခါကမျှ အမေ့ မခံခဲ့ပါ။

နိုင်ငံတော် ကာကွယ်ရန် အတွက် အထူး လိုအပ်ချက်မှာ လေ့ကျင့်မှုပင် ဖြစ်သည်။ လေ့ကျင့်သား မပြည့်ဝလျှင် ကြမ်းတမ်းသော စစ်မြေပြင်တွင် နေရ ၊ ထိုင်ရ ၊ တိုက်ခိုက်ရ သည့် စစ်သား ၊ စစ်ဗိုလ်တို့အား စည်းကမ်း စောင့်ထိန်းစေရန် မလွယ်လှပါ။ နေ့မြင် ညပျောက် ရသည့်ဘ၀ အလွန် စိတ်ခိုင်မှသာ သီလမြဲမြံ သည်။ စိတ်မခိုင်လျှင် ထင်ရာမြင်ရာ လုပ်ခြင်းများ ပြုမူလိမ့်မည်။ မူးယစ် သောက်စား ၊ သူ့အိမ်ရာ ကျူးလွန် ၊ သွေးဆာ ကြမ်းကြုတ်ခြင်း ဘက်သို့ ယိမ်းညွှတ်ချင် လိမ့်မည်။ ထို့ကြောင့် ဒါတွေကို အမြဲမပြတ် သတိဖြင့် စောင့်ကြည့် ခဲ့ရသည်။ ဆိုဆုံးမ ၊ တားမြစ် ၊ အရေးယူ ခဲ့ရသည်။ စည်းကမ်း ဖောက်ဖျက်လျှင် ရဲဘော် ၊ အရာရှိကြီး ငယ်မရွေး ထိုက်သင့်သော အပြစ်ဒဏ်ကို ကျခံ စေရသည်။ အာဏာနှင့် ယှဉ်သော တာဝန် များကို ထမ်းဆောင် ကြရသည့် အခါ အနားသို့ ချဉ်းကပ်ကာ နားဝင်ချိုသော စကားကိုဆို ၊ ကြိုက်တတ် သော အစာကိုကျွေး ၊ သူတို့ အလိုကျ လုပ်ဆောင် စေရန် ပရိယာယ် ဆင်ခြင်းမျိုးကို မြင်တတ်စေ ၊ တားမြစ် တတ်စေ ၊ အထူး သတိထားကြ ဟု မှာကြား ထားသည်။

ပြည်သူ့ တပ်မတော်သား ပီသ၏လား ၊ ပြည်သူ့ တပ်မတော်သား ၏ သီလ ပြည့်ဝခိုင်မာ ၏လားဟု မိမိကိုယ် မိမိ မပြတ် စစ်ဆေး ကြရမည်။ မိမိနှင့် တွေ့ဆုံရသော ပြည်သူ တစ်ဦးသည် ကြည်ဖြူ ရွှင်ပြုံး သည်လား (သို့မဟုတ်) မကြည်မလင် ငြိုညင်သည်လား သတိပြုပါ။ ပြည်သူသည် ပြည်သူ့ တပ်မတော်ကို အားကိုးသည်။ ပြည်သူ့ တပ်မတော် သည်လည်း ပြည်သူ့ထံမှ အားယူသည်။ တပ်နှင့် ပြည်သူ အမြဲကြည်ဖြူ စေရမည်။ ပြည်သူနှင့် တပ်မတော် ကင်းကွာကြလျှင် ရန်သူအတွက် အားဖြစ်စေသည် ကို အမြဲ ထာဝစဉ် အထူး သတိထား ကြရပါမည်။ ထို့အပြင် ကျွန်ုပ်တို့ နိုင်ငံ၏ ဖွဲ့စည်းထားသော တပ်မတော်သည် အခြား နိုင်ငံများ ကဲ့သို့ ကြေးစား တပ်မတော် ၊ အမြဲတမ်း တပ်မတော် အမျိုးအစား မဟုတ်ဘဲ နိုင်ငံတော် အတွက် သီးသန့် ဖွဲ့စည်း ထားသော မျိုးချစ် တပ်မတော် ဖြစ်သည်။ လူမျိုးရေးကို အလေးမပေး ၊ နိုင်ငံတော် ကိုသာ သစ္စာထားသည့် ကရင် တိုင်းရင်းသား အချို့ ရှိကြသည်။ ဗိုလ်မှူး ကယ်ဗင်အို လို ပုဂ္ဂိုလ်ဆိုလျှင် “ ငါ့ ဘာသာရေးက မေတ္တာပွား ရမည် ဆိုသည် ၊ ငါနှင့် ငါ့မိသားစုအား ထမင်းကျွေး သည်ကား နိုင်ငံတော် ဖြစ်သည်။ အချင်းချင်း သတ်ဖြတ်ကာ နိုင်ငံတော်ကို ဖျက်ဆီးသည့် အလုပ်ကို ငါမလုပ် ” ဟု ဆိုခဲ့သည်။ ကမ္ဘာပေါ်ရှိ နိုင်ငံတိုင်းတွင် မိမိ နိုင်ငံတော်ကို ကာကွယ်ဖို့ အတွက် တပ်မတော်များ ဖွဲ့စည်းထား ကြသည်။ ကျွန်တော်တို့ မြန်မာ့ တပ်မတော်၏ အနာဂတ် ရည်မှန်းချက် တာဝန်မှာ “ အင်အား တောင့်တင်း ခိုင်မာပြီး စွမ်းရည် ထက်မြက်သော ခေတ်မီ မျိုးချစ်တပ်မတော် ” ဟု ဖြစ်၍ တပ်မတော် အတွင်းရှိ တပ်မတော်သားများ သည်လည်း ပြည်ထောင်စုဖွား တိုင်းရင်းသား ညီအစ်ကို မောင်နှမများ နှင့်သာ ဖွဲ့စည်းထား၍ တပ်မတော်နှင့် အမျိုးသား နိုင်ငံရေး အဓွန့်ရှည်ကြာ တည်တံစေရန် အတွက် တပ်မတော် အင်အားရှိဖို့ လိုအပ်သည်။

ထိုသို့ တပ်မတော်သည် နိုင်ငံတော် ကာကွယ်ရေး တာဝန် ၊ ဖွဲ့စည်းပုံ အခြေခံဥပဒေ ကို ကာကွယ်ရေး နှင့် အမျိုးသား နိုင်ငံရေး တာဝန်များကို ကာကွယ်ရန် အတွက် တပ်မတော် အင်အားရှိဖို့ တပ်မတော်သား များတွင် သာမက နိုင်ငံအတွင်းရှိ တိုင်းရင်းသား ပြည်သူများမှာ ပါ တာဝန်ရှိသည်။ သို့မှသာ မြန်မာနိုင်ငံကြီး ထာဝစဉ် တည်တံ့ ခိုင်မြဲပြီး အမျိုးသား နိုင်ငံရေး တာဝန်များကို အောင်မြင်စွာ ထမ်းဆောင် နိုင်မည် ဖြစ်ပါတော့သည်။ 

(လွင်မိုးဦး)

Credit : ပြည်ချစ်သား

No comments:

Post a Comment

မိမိတို့၏အမြင်များကို လွတ်လပ်ပွင့်လင်းစွာရေးသားနိုင်ပါသည်။
ဘမ်းမည်မဟုတ်ပါ။