ပုဂ္ဂလိက သတင်းစာများ ဂျာနယ်ပုံပေါက်နေဟု စာဖတ်သူများ ဝေဖန်

ဧပြီလဆန်းပိုင်းမှ စတင်ထွက်ပေါ်လာသည့် ပုဂ္ဂလိကသတင်းစာများကိုဖတ်ရှုရသည်က သတင်းစာ ဖတ်ရသည့် အရသာမျိုးမပေးစွမ်းနိုင်သေးကြောင်း မန္တလေးမြို့နေ စာဖတ်သူအသိုင်းအ၀ိုင်းက သုံးသပ် ပြောဆိုကြသည်။

“ ကျွန်တော် ၀ယ်ဖတ်ကြည့်တယ် ၊ ကြည့်တော့ သတင်းစာပုံစံ မပေးနိုင်သေးဘူး ၊ ကြည့်ရတာ သတင်းကို မနည်း ပြည့်အောင်ဖြည့်နေတဲ့ ပုံရှိတယ် ၊ ဂျာနယ်ပုံစံပဲ ဖြစ်နေတယ် ”ဟု အောင်မြေသာစံမြို့နယ်အတွင်းရှိ အမျိုးသား စာဖတ်သူတစ်ဦးက ပြောသည်။

လက်ရှိထုတ်ဝေလျက်ရှိသည့် သတင်းစာများမှာ ခရီးသွား ဆောင်းပါးများ ပါဝင်သင့်ပြီး အခြားကဏ္ဍများနှင့် လည်း စာဖတ်သူ စိတ်ပါဝင်စားစေရန် တင်ဆက်သင့်သည်ဟု အကြံပြု ပြောဆိုလျက်ရှိသည်။

“ အမှန်အတိုင်းပြောရရင်တော့ မပေးနိုင်သေးဘူးပေါ့ ၊ ဂျာနယ်အကျင့်ကနေ ရုန်းထွက်နိုင်ဖို့ ခက်နေတဲ့ အနေအထားမှာပဲ ရှိနေသေးတယ် ” ဟု ရန်ကုန်အခြေစိုက် မြန်မာအင်ဒီပင်းဒန့်သတင်းဂျာနယ်မှ အယ်ဒီတာတစ်ဦးဖြစ်သူ မသီတာ(စမ်းချောင်း)က သုံးသပ်သည်။

ပုဂ္ဂလိကသတင်းစာများတွင် အစိုးရနှင့်ပတ်သက်သည့်သတင်းများ မတင်ဆက်နိုင်သေးကြောင်း အစိုးရသတင်းများကို အစိုးရပိုင်သတင်းစာများ၌သာ တွေ့မြင်ရဆဲဖြစ်ကြောင်းနှင့် ထုတ်ဝေနေသည့် ပုဂ္ဂလိက သတင်းစာအသစ်များအနေဖြင့် ဂျာနယ်ရပ်တည်မှု လမ်းကြောင်းအတိုင်းသာ သွားနေသေး ကြောင်းများကို ၄င်းက ဆက်ပြောသည်။

“ အားအနည်းဆုံးထဲမှာ Art of Editing ကိုဘယ်သူမှ တခုတ်တရ မပြောကြဘူးတဲ့အတွက် Rule of Editor နဲ့ Art of Editing က အားအနည်းဆုံးပဲ အဲ့ဒီဟာက ဖြည့်ကိုဖြည့်ရမယ့်ကိစ္စပဲ ၊ တစ်ချို့ သတင်းတွေမှာ စကားပြေနဲ့ ရေးတာတွေ တွေ့ရသလို စကားပြောနဲ့ ရေးနေတာတွေလဲတွေ့တယ် ၊ နောက်ပြီး တိုက်တစ် တိုက်ရဲ့ House of Style ကိုလည်း မတွေ့ရတာတွေရှိတယ် ” ဟု ဆရာမ မသီတာ(စမ်းချောင်း)က ပြောသည်။

မန္တလေးမြို့ရှိစာဖတ်သူတစ်ဦးဖြစ်သည့် ဓါတ်ပုံဆရာဦးမောင်မောင်လတ်(ချစ်ညို)က ၎င်းတို့ကြုံတွေ့ခဲ့ ရသည့် သတင်းစာခေတ်နှင့် ယခုထွက်ရှိနေသည့်သတင်းစာများအား ယခုလိုနှိုင်းယှဉ်ပြောကြားခဲ့သည်။

“ ပြည်ထောင်စုနေ့စဉ်သတင်းစာဆိုဒ်ကတော့ အရင်တုန်းကထွက်ခဲ့တဲ့ အရွယ်အစားတိုင်းပဲ ၊ ဒါပေမဲ့ အရင်တုန်းက သတင်းစာဆိုတာ မနက်မိုးလင်းတာနဲ့ အိမ်ရောက်နေပြီ ၊ (၁၀)နာရီလောက် ဆိုရင်ကို အဲ့ဒီသတင်းက ဟောင်းသွားပြီ ၊ အခု အစိုးရထုတ်သတင်းစာတွေက နေ့လည်ပိုင်းမှ အိမ်ကိုရောက်တယ် ” ဟု ဓာတ်ပုံဆရာ ဦးမောင်မောင်လတ်(ချစ်ညို)က ပြောသည်။

နှစ်(၄၀)ကြာပျောက်ကွယ်ခဲ့သော ပုဂ္ဂလိကပိုင်သတင်းစာများကို ၂၀၁၃ ဧပြီလဆန်းပိုင်းတွင် ပြန်လည် ထုတ်ဝေခွင့်ရရှိခဲ့ကြသည်။

“ ကျန်တာတွေ များတယ် ၊ အားလုံး အကုန်မရောင်းရသေးဘူး ၊ လူတိုင်း မဖတ်ကြသေးတာပေါ့ ” ဟု ဂျာနယ်လက်ပွေ့ သမားတစ်ဦးက ပြောသည်။

ထုတ်ဝေခွင့်ရှိသည့်သတင်းစာများအနက် The Voice Daily ၊ ပြည်ထောင်စုနေ့စဉ် ၊ စံတော်ချိန် နှင့် ရွှေနိုင်ငံသစ် သတင်းစာများထုတ်ဝေခဲ့ကြပြီး လတ်တစ်လော အချိန်တွင် စောင်ရေအများအပြား မရောင်း ချရ သေးကြောင်း မန္တလေးမြို့ရှိ ဂျာနယ်လက်ပွေ့ အရောင်းသမားများထံက သိရသည်။

မင်းမင်းလတ် (မြစ်မခ) 

Credit : Here