(ကျားဖြူ)ပါတီမှ၊ သီပေါမြို့နယ် ပြည်သူ့လွှတ်တော်ကိုယ်စားလှယ် ဦးရဲထွန်း၏ အမြင်တွင်၊ ပြဿနာပေးနေသည့် ဥပဒေပုဒ်မမှာ လွှတ်တော်ဆိုင်ရာဥပဒေများတွင်ပါရှိသော အခန်း(၁)၊ ပုဒ်မ(၂) အပိုဒ်ခွဲ(ဇ) တွင်ဆိုထားသည့်-
ပြည်ထောင်စုအဆင့်အဖွဲ့အစည်းဆိုသည်မှာ ဖွဲ့စည်းပုံအခြေခံဥပဒေအရ ဖွဲ့စည်းသော ပြည်ထောင်စုအစိုးရအဖွဲ့၊ အမျိုးသားကာကွယ် ရေးနှင့်လုံခြုံရေးကောင်စီ၊ဘဏ္ဍာရေးကော်မရှင်၊ ပြည်ထောင်စုတရားလွှတ်တော်ချုပ်၊ နိုင်ငံတော်ဖွဲ့စည်းပုံအခြေခံဥပဒေ ဆိုင်ရာခုံရုံး၊ပြည်ထောင်စုရွေးကောက်ပွဲကော်မရှင်၊ ပြည်ထောင်စုစာရင်းစစ်ချုပ်နှင့် ပြည်ထောင်စုရာထူးဝန်အဖွဲ့တို့ကို လည်းကောင်း၊ ပြည်ထောင်စုလွှတ်တော်၊ ပြည်သူ့လွှတ်တော်နှင့် အမျိုးသားလွှတ်တော်တို့ကဖွဲ့စည်းသည့် ကော်မတီ၊ ကော်မရှင်နှင့် အဖွဲ့တို့ကိုဆိုသည်။
ထိုအပိုဒ်တွင်ပါရှိသော လွှတ်တော်များကဖွဲ့စည်းသည့်ကော်မတီ၊ ကော်မရှင်နှင့် အဖွဲ့တို့ကိုပြည်ထောင်စုအဆင့် အဖွဲ့အစည်းဟုအဓိပ္ပါယ်ဖွင့်ဆိုသတ်မှတ်ခြင်းမှာ အခြေခံဥပဒေနှင့်မညီဟု ခုံရုံးကဆိုပြီး၊ သမ္မတ၊ ပြည်ထောင်စုအစိုးရအ ဖွဲ့နှင့် တပ်မတော်တို့ကထောက်ခံလျက်ရှိသည်။
ပြည်ထောင်စုလွှတ်တော်ကိုယ်စားလှယ်များဘက်ကမူ လွှတ်တော်ကော်မတီ၊ ကော်မရှင်နှင့်အဖွဲ့များကို မဆို ထားဘိ ကိုယ်စားလှယ်တစ်ဦးချင်းသည်ပင်လျင် ပြည်ထောင်စုအဆင့်ဥပဒေပြုအဖွဲ့အစည်းဝင်ဖြစ်သည်ဟု ဦးရဲထွန်းက မှတ်ယူသည်။ ပြည်ထောင်စုအဆင့်ဥပဒေပြုအဖွဲ့အစည်းဝင်ဟု သုံးနှုံးသင့်ကြောင်း၊သို့မှသာ ဖွဲ့စည်းပုံအခြေခံဥပဒေအရ သတ်မှတ်ထား သောပြည်ထောင်စုအဆင့်ပုဂ္ဂိုလ်ဆုိုသည်နှင့်ခြားနားမည်ဖြစ်သည် ဟုဆိုပါသည်။ အကြောင်း မှာ အခြေခံဥပဒေအရ ဥပဒေပြုသည့်လွှတ်တော်များမှာ ပြည်နယ်နှင့် တိုင်းဒေသကြီးအဆင့်နှင့် ပြည်ထောင်စုအဆင့် ဟု နှစ်ဆင့်သာရှိသောကြောင့်ထိုယူဆချက်မှာ အခြေခံဥပဒေနှင့်ကိုက်ညီမှုရှိပါသည်ဟု ဦးရဲထွန်းကဆိုပါသည်။
သို့ဖြစ်၍ အထက်ဖေါ်ပြပါ ပုဒ်မ(၂) အပိုဒ်ခွဲ(ဇ) ပါအဓိပ္ပါယ်ဖေါ်ပြချက်ကို ရှင်းလင်းတိကျအောင်ခွဲခြားရေးသား ကာ ဥပဒေသစ်ပြဌာန်းနိုင်ပြီး နိုင်ငံတော်သမ္မတက ခုံရုံးသို့တင်ကာထပ်မံမကန့်ကွက်မှသာလျှင် ပြဿများအေးအေးချမ်း ချမ်းနှင့်ပြီးစီးသွားနိုင်ကြောင်းသိရပါသည်။
ဦးရဲထွန်းတင်ပြသည့်အကြံပြုချက်မှာ အဆိုပါအပိုဒ်ကိုအောက်ပါအတိုင်း ပြင်ဆင်ရေးသားသင့်သည်ဟုဆိုသည်။ ပြည်ထောင်စုအဆင့် အဖွဲ့ အစည်း ဆိုသည်မှာပြည်ထောင်စုအစိုးရအဖွဲ့၊ အမျိုးသားကာကွယ်ရေး နှင့်လုံခြုံရေး ကောင်စီ၊ ဘဏ္ဍာရေး ကော်မရှင်၊ ပြည်ထောင်စုတရားလွှတ်တော်ချုပ်၊ နိုင်ငံတော်ဖွဲ့စည်းပုံအခြေခံဥပဒေဆိုင်ရာခုံရုံး၊ ပြည်ထောင် စုရွေး ကောက်ပွဲ ကော်မရှင်၊ ပြည်ထောင်စုစာရင်းစစ်ချုပ်နှင့် ပြည်ထောင်စုရာထူးဝန်အဖွဲ့တို့ကိုခေါ်သည်။
လို့ရေးသားပြီး နောက်တစ်ပိုဒ်မှာ -
- ပြည်ထောင်စုအဆင့်လွှတ်တော်အဖွဲ့အစည်းဆိုသည်မှာ ပြည်ထောင်စုလွှတ်တော်၊ ပြည်သူ့လွှတ်တော်နှင့် အမျိုးသားလွှတ်တော်များက ဖွဲ့စည်းထားသည့် ကော်မတီ၊ ကော်မရှင်နှင့် အဖွဲ့တို့ကိုခေါ်သည်။
လို့ ခွဲခြားပြီးအဓိပ္ပါယ်ဖွင့် သင့်တယ်လို့ ပြောကြားပါတယ်။ ထိုသို့ရေးသားမှသာလျင် ပြည်နယ်နှင့် တိုင်းဒေသကြီးအ ဆင့် လွှတ်တော်အဖွဲ့အစည်းများနှင့်ရောထွေးမှုမရှိဘဲ ကွဲပြားခြားနားမှာဖြစ်တယ်လုိ့ ဦးရဲထွန်းကဆိုပါသည်။
ပြည်ထောင်စုအဆင့်လွှတ်တော်များကဖွဲ့စည်းတဲ့ ကော်မတီ၊ ကော်မရှင်နဲ့ အဖွဲ့များသည် ပြည်ထောင်စုအဆင့်ရှိ ကြောင်းကို အခြေခံဥပဒေ ပုဒ်မ ၁၄၀ (ခ) နှင့် ပုဒ်မ ၁၆၀ (ခ) တို့အရရှင်းလင်းစွာသိမြင်နိုင်သည်ဟုဦးရဲထွန်းကဆို သည်။
ထိုအပိုဒ်တွင်ရေးသားထားသည်မှာ -
ပြည်သူ့လွှတ်တော်ကော်မတီများ၊ ကော်မရှင်များနှင့် အဖွဲ့အစည်းများ၏ အစည်းအဝေးများသို့ ယင်းကော်မတီ၊ ကော်မရှင် သို့မဟုတ်အဖွဲ့အကြီးအမှုး၏ ခွင့်ပြုချက်ဖြင့်တက်ရောက်သည့်အခါ မိမိအဖွဲ့အစည်းနှင့်သက်ဆိုင်သောဥပဒေ ကြမ်းများ သို့မဟုတ် ကိစ္စရပ်များနှင့်စပ်လျဉ်း၍ရှင်းလင်းပြောဆိုဆွေးနွေးခွင့်ရှိသည်။
ယခုအခါ ပြည်ထောင်စုလွှတ်တော်၊ ပြည်သူ့လွှတ်တော်နှင့် အမျိုးသားလွှတ်တော်များ၏ ဥပဒေ ပုဒ်မ(၂) အပိုဒ်(ဇ) ပါ ပြည်ထောင်စုအဆင့်အဖွဲ့အစည်းများဆိုသည်မှာ လွှတ်တော်ရေးရာကော်မတီများ၊ ကော်မရှင်များနှင့် အဖွဲ့များကို ရည်ညွှန်းကြောင်းနှင့် ဖွဲ့စည်းပုံအခြေခံဥပဒေနှင့်လည်း ညီညွတ်ပါသည်ဟု ပြည်ထောင်စုလွှတ်တော်ကိုယ်စားလှယ်များ က ရပ်ခံထားသဖြင့် လွှတ်တော်နှစ်ရပ်၏ ဒုတိယဥက္ကဌများမှာ တည်ဆဲဥပဒေများအရ နူတ်ထွက်ရမည့်အနေအထား ဖြစ်နေကြောင်းဦးရဲထွန်း က သုံးသပ်ပြောဆိုပါသည်။ မနူတ်ထွက်ပါက ထိုကိစ္စကို ပြည်ထောင်စုအစိုးရ ရှေ့နေချုပ်က ထောက်ပြ ကန့်ကွက် လာနိုင်ကြောင်းဆိုပါ သည်။
တည်ဆဲ ပြည်သူ့လွှတ်တော်နှင့် အမျိုးသားလွှတ်တော်ဥပဒေပုဒ်မ (၁၇)တွင် လွှတ်တော် ဥက္ကဌ၊ ဒုဥက္ကဌများကို ရည်ညွှန်းလျက် ဆိုထားသည်မှာ -
၁၇ ။ ဥက္ကဌ၊ သို့မဟုတ် ဒုတိယဥက္ကဌ သည် ပြည်ထောင်စုအဆင့် အဖွဲ့အစည်း တစ်ရပ်ရပ်တွင် တာဝန်ပေးအပ်ခြင်းခံရပါက ဥက္ကဌ သို့မဟုတ် ဒုတိယဥက္ကဌအဖြစ်မှ နုတ်ထွက်ပြီးဖြစ်သည်ဟု မှတ်ယူရမည်။
လွှတ်တော်နှစ်ရပ်ရှိ လွှတ်တော်အခွင့်အရေးကော်မတီ ဥက္ကဌများဖြစ်ကြသော လွှတ်တော် ဒုတိယဥက္ကဌ များမှာ လွှတ်တော်နည်းဥပဒေ ၅၄ အရတာဝန်ထမ်းဆောင်နေခြင်းမှာတစ်နှစ် ကျော်ကာလသို့ပင်တိုင်ခဲ့ပြီဖြစ်ကြောင်း သိရှိရပါသည်။ ၎င်းက ဆိုထားသည်မှာ -
၅၄။ လွှတ်တော်အခွင့်အရေးကော်မတီကို ၁၅ ဦးထက်မပိုသော လွှတ်တော်ကိုယ်စားလှယ် များဖြင့်ဖွဲ့စည်းရမည်။ ယင်းသို့ဖွဲ့စည်းရာတွင် လွှတ်တော်ဒုတိယဥက္ကဌသည် ရာထူးအလျောက် ကော်မတီ၏ ဥက္ကဌအဖြစ်ဆောင်ရွက်ရမည်။ထိုသို့ဖြစ်နေခြင်းကြောင့် ထိုကိစ္စကိုနှစ်ဦးနှစ်ဘက်အကျိုးရှိစွာဖြေရှင်းနိုင်ရေးအတွက် သမ္မတ နှင့်ခုံရုံး ဘက်ကလည်း ပြည်ထောင်စုအဆင့်လွှတ်တော်များ ကဖွဲ့စည်းသည့်ကော်မတီ၊ ကော်မရှင်နှင့် အဖွဲ့တို့ကို ပြည်ထောင်စုအဆင့်လွှတ်တော်အဖွဲ့အစည်းများဖြစ်ကြသည် ဟု ပြင်ဆင်ရေးသားမည်ကိုလက်ခံရန်လိုအပ်ကြောင်း ။
ပြည်ထောင်စုလွှတ်တော်ကိုယ်စားလှယ်များဘက်ကလည်း - ပုဒ်မ (၂) ၊ အပိုဒ်(ဇ) ပါ ပြည်ထောင်စုအဆင့်အဖွဲ့အစည်းဆိုသည်မှာ ဆိုသည့်စကားရပ်သည် လွှတ်တော်များကဖွဲ့စည်း သည့် ကော်မတီ၊ ကော်မရှင်နှင့် အဖွဲ့တို့ကိုရည်ညွှန်းခြင်းမဟုတ်ကြောင်းကို ပုဒ်မ(၁၇) နှင့် နည်းဥပဒေပုဒ်မ (၅၄) ကိုထောက်၍ လက်ခံသင့်ကြောင်း ဦးရဲထွန်းက ဖွင့်ဆိုရှင်းပြခဲ့ပါသည်။
ထိုသို့နှစ်ဦးနှစ်ဘက်လက်ခံခဲ့ပါလျင်ဖွဲ့စည်းပုံအခြေခံဥပဒေကိုပြင်ဆင်ရန်လည်းကောင်း၊ ခုံရုံးကို စွပ်စွဲပြစ်တင်ကာ ဖြုတ်ချပစ်ရန်လည်းကောင်း၊ လိုအပ်မည်မဟုတ်တော့ဘဲ အေးအေး ချမ်းချမ်းဖြင့်ပြီးစီး သွားနိုင်ကြောင်း သိရှိရပါသည်။
မှတ်ချက်။ ။ ပြည်သူ့လွှတ်တော်ဆိုင်ရာဥပဒေ၊ အမျိုးသားလွှတ်တော်ဆိုင်ရာဥပဒေတို့တွင်ပါရှိသော ပုဒ်မ(၁၇) မှာလည်း ဖွဲ့စည်းပုံအခြေခံဥပဒေ ပုဒ်မ ၂၀၁ နှင့်ညီညွတ်မှုမရှိပါ။ ထိုပုဒ်မတွင် လွှတ်တော်ဥက္ကဌများကို ပြည်ထောင်စု အဆင့် အဖွဲ့အစည်းဖြစ်သော အမျိုးသားကာကွယ်ရေးနှင့်လုံခြုံရေးကောင်စီအဖွဲ့ဝင်အဖြစ်ပါဝင်ထည့်သွင်း ဖွဲ့စည်းထား သဖြင့် ထိုပုဒ်မ (၁၇)ကိုလည်းအောက်ပါအတိုင်းပြင်ဆင်သင့်ပါသည်။
၁၇ ။ ဥက္ကဌ၊ သို့မဟုတ် ဒုတိယဥက္ကဌ သည် အမျိုးသားလုံခြုံရေးနှင့်ကာကွယ်ရေးကောင်စီမှ အပ ဖြစ်သောပြည်ထောင်စုအဆင့် အဖွဲ့အစည်း တစ်ရပ်ရပ်တွင် တာဝန်ပေးအပ်ခြင်းခံရပါက ဥက္ကဌ သို့မဟုတ် ဒုတိယဥက္ကဌအဖြစ်မှ နုတ်ထွက်ပြီးဖြစ်သည်ဟု မှတ်ယူရမည်။
Myanmar Express
No comments:
Post a Comment
မိမိတို့၏အမြင်များကို လွတ်လပ်ပွင့်လင်းစွာရေးသားနိုင်ပါသည်။
ဘမ်းမည်မဟုတ်ပါ။